¹ O Diedo go den yedi Moyiisi, "Maadi yeni Haarɔn bijaba, salga yidkaaba, ki yedi ba ya yaama ne, ² 'Yinba, salga yidkaaba, li ki buali ke yin jɔgni i yula, ki gbali n tuonli, kelima i nagni ki sii tinkpilo. I ba fidi ki sii i kpiiba yaaba n kuu yi baba i, nani i báa, i naá, i bijua, i bisalo, bii i ninjua. ³ I ba fidi ki sii i ninsalo kuuma, li ya tie ke o dá ki kuni ja, ki li ye i deni i, kelima o dá ki pia ya ja n ba pii o. ⁴ Yinba salga yidkaaba, i kan jɔgni i yula, ki gbali n tuonli kelima i sii i naataano yua n ki kuu yi kuuma. ⁵ Yinba salga yidkaaba, i kan kuo i yudi, i kan kogdi i langbiali, i kan pali i kpiilo kutanpala. ⁶ Li buali ke i tuada ń ya tiegi nani Mini i tienu ń waani yi ke yin gagdi ki ya ŋani maama, ki tie n salga yidkaaba yeni i. I kan fali i Tienu. Yinba n padi ban puuni nni ya padjuukaana n tie Mini ya jiema. Lanwani ii, i tuada ba kadi ki waani ke i tiegi kelima i kpiagdi n yeli. ⁷ Yinba salga yidkaaba, i kan kuani poconconli, i kan kuani ya pua n ñani o calo kani,lanyaaka ban biidi ya pua, kelima bi gagdi ki ŋanbi yi U Tienu po i. ⁸ Yin ya tiani ke n gagdi ki ŋanbi yi ke yin ya pugi nni i. Li tie nani yinba n puuni Mini i Tienu mi jiema yeni. Yin taa ibá ki cabi nni, kelima Mini O Diedo n gagdi ki ŋanbi yi, ke i tua salga yidkaaba, ke n mo ki bua jɔgindi, n gagdi ki ŋani cain. ⁹ Salga yidka bisalo ya jɔgni o yuli yeni mi conconma, o fali o báa i, li buali ke lan sia o u mu wan kpe. ¹⁰ Salga yidkaciamo n tie salga yidkaaba yudaano, bi wuli o ya yuli po i mi kpaŋanma, ki gagdi ki ŋanbi o, wani n dagdi yeni wan la ya tialakaadi n gagdi ki dagdi yeni O Diedo kpiagdi. O kan ŋa yubegdi, kaa caadi, o kan padi o tialakaadi ki kua o kpiilo kuuma pabɔnli nni. ¹¹ O kan kua kudiegu, o kan nagni kuuma. Bá o báa bii o naá n ya kpe, o kan tieni lani,ki gbali o tuonli, ki go jɔgni u kaangagdiŋamu. ¹² O kan siedi ki ŋa li gbandieli ki ya caa kudiegu. O kan siedi ki ŋa li yogu li gbandieli, kelima ban sɔgi o mi kpaŋanma yeni, bi gagdi ki ŋanbi o, ke wan ya tuuni O Diedo tuona li gbandieli nni i. Mini O Diedo n waani yi ke yin cɔlni li ñɔbona kuli. ¹³ Yinba salga yidkaaba, yin ba kuani ya pua baa tie powandiali i. ¹⁴ Yinba salga yidkaaba kan kuani pakuali, i kan kuani poconconli, i kan kuani ya pua n ñani o calo kani. O ba kuani ya powandiali n tie o buolu nni yua i. ¹⁵ Kelima o kan kuani buolfanu niba o puolŋuani siiga, u buolu yaaba n yie ke bi kan tua salga yidkaaba. Mini O Diedo n gagdi ki ŋanbi salga yidkaaba n kpiagdi po, ke ban ya pugi nni. ¹⁶ O Diedo go den yedi Moyiisi, ¹⁷ "Yedi Haarɔn ya maama ne: 'A puolŋani siiga, yua ya gbanu po pia pɔdi, kan nagni li padbinbindli kani, ki yidi salga Mini yua tie nani N jiema yeni. ¹⁸ Ya ja n pia pɔdi nani juamo, diamo, manfadma, nigundigu, ¹⁹ taajenli bii nuujenli, ²⁰ golga, nikɔkɔbga, ninpenli bii ni nfiagu, yua ya gbanu po pia ŋmaali bii yianu bá, bii yua ya koncana n fadi. ²¹ Haarɔn, yua n tie cincinli salga yidkaciamo ya puolŋuanu yua n pia pɔdi kuli, o kan nagni li padbinbindli kani, ki padi Mini o Tienu ya po padjuukaali. ²² Salga yidkaaba yaaba n pia pɔdi ba fidi ki taani ki di ya padjiema n gagdi ki ŋani cain yeni ya jiema n ŋani. ²³ Ama, bi pɔdma po, bi kan nagni bu kpaldɔginkaabu bii li padbinbindli kani, kelima bi ya nagni, bi ba jɔgni n kaangagdiŋamu. Mini n tie O Diedo yua n gagdi ki ŋanbi li kaangagdiŋami, Mini ya po yeni n kpiagdi po.'" ²⁴ Lanwani ii, Moyiisi den maadi Haarɔn yeni o bijaba yeni Israyeli nitaanli kuli li ñɔbona.