¹ O Diedo go den yedi Moyiisi: ² Israyeli yua, lanyaaka ya caano n ye Israyeli diema nni, ki cedi ke bi padi o biga o bulo Moloki po, ban kpa o. U dogu nni niba n ba lugdi o a tana wan kpe. ³ N ba ñɔli ki ŋa lanya nibuolu, ki cedi ban ñani ba n buolu siiga. ⁴ O ya padi o biga o bulo Moloki po, ke o dogu nni yaaba ŋmini ki nua o, kaa lugdi o a tana ki kpa o, ⁵ Mini n ba tuni o li tagli yeni yaaba n ŋua o kuli. N ba paadi ki ñani ba n buolu yaaba siiga. Yaaba n yie n ñɔmaama, ki ŋua ki pugi o bulo Molo ki, n ba tieni bikuli yeni i. ⁶ N ba buli n nunga yaaba caa ti baadi ya jabaaba n buu yeni bi tinkpiba kani, bii yaaba n caa a lingda kani ku baagu po. N ba buli ba n nunga, ki paadi ki ñani ba n buolu yaaba siiga. ⁷ Gagdi ki ŋanbi mani i yula, ki ya ŋani n kpiagdi po, kelima Mini n tie O Diedo i Tienu. ⁸ Yin fangi i yula, ki cɔlni n ñɔbona kuli bonŋanla. Mini n tie O Diedo, yua n gagdi ki lugdi yi i buoli kuli siiga, ke yin ya kpigdi nni. ⁹ Nilo ya soli o naá bii o báa, yin kpa o. wani n ba tugi o kuuma tagli. ¹⁰ Yua n dua yeni nitiano denpua, yin kpa bani bilie, o ja yeni o pua kuli. ¹¹ Ja ya dua yeni o báa denpua, o fiagi o báa n yeni. Li buali ke yin kpa o ja yeni o pua kuli; bani n ba tugi bi kuuma tagli. ¹² Ja ya dua yeni o bijuaga, yin kpa bani bilie, o ja yeni o pua kuli. Bi tieni ti cancagindi, ki dagdi yeni ban tugi bi kuuma tagli. ¹³ Jaba lie ya dua yeni bi lieba nani o ja n dua yeni o pua maama yeni, bi sɔni cancagintuonli, ki dagdi yeni mi kuuma. Bani n ba tugi bi kuuma tagli. ¹⁴ Ja ya taani ki kuani pua yeni o naá, bi tieni cagindi i. Li buali ke ban sia ba u mu, ban kpe, ke i siiga nilo n da ti togdi bi tuadbiidi. ¹⁵ Ja ya dua yeni yanga, yin kpa wani yeni ki yanga kuli. ¹⁶ Pua mo ya dua yeni yanga, yin kpa wani yeni ki yanga kuli. bi kuuma tagli ba do biyula po i. ¹⁷ Ja ya dua yeni o ninsalo, o báa bii o naá bisalo, bi taani ki la bi mubila n yeni. Li buali ke ban paadi ki ñani ba u buolu yaaba siiga. Bi ba pa bi tuobiadi pani. ¹⁸ Ja ya dua yeni pua ke o ye o faadi nni, li buali ke ban paadi ki ñani ba u buolu yaaba siiga, kelima bi juogi ki la bi mubila yeni mi sɔma. ¹⁹ Ja kan dua yeni o puoli bii o naawaali, kelima li jɔgni yeni nilo ń taani yeni o kpiilo, ki la bi mubila. Li buali ke lan tuni ba i tagli, o jo yeni o pua kuli. ²⁰ Ja ya dua yeni o baawaali bii o baakpeli denpua, o fiagi o baawaali lanyaaka o baakpeli n yeni. Ban sɔni ya cagindi yeni ba do bi yula po. Bi ba kpe, kaa mali ya bila n ba di bi faali. ²¹ Ja ya kuani o ninjua denpua, o biidi o nijua dansanu n yeni, li tie tuonbiadi i. bi ba kpe kaa mali ya bila n ba di bi faali. ²² Yin cɔlni n yiko yeni n ñɔbona lan buali maama, lani n tie ban da ñani yi min caa yeni yi ya diema nni yeni. ²³ Yin da togdi min ba deli ki yaani yaaba i liiga, yin caa naani yeni tuada yeni bi tɔgu. N yama ñani bi niinni, kelima bi den tiendi lanya tuadbuoli kuli. ²⁴ Ama n den yedi yi, "Yinba n ba diedi bi diema. N ba puni yi, yin kali mi niinni, ki yendi ma, ya diema n kpiagi, ki gbie yeni ti siadi yeni mi naaŋanma. Mini n tie O Diedo, yua n gagdi ki gandi yi i buoli kuli siiga." ²⁵ Lanwani ii, yin bandi ya yandi yeni ya bonfuoda n jɔgni npo yeni ya bonfuoda n ŋani npo. Da ŋmani mani ya yandi, ya bonyugda, ya bonfuoda bii ya bonbalinkaana n jɔgni npo, ki jɔgni i yula. ²⁶ I baa ye nani ya nitaanli n gagdi ki ŋanbi bi yula n ya kpiagdi po yeni, kelima Mini, O Diedo, N gagdi ki ŋani, ki go tieni bonli kuli n kpiagdi po. N gagdi ki lugdi yi i nibuoli siiga, ke yin ya tie n ya nibuolu. ²⁷ Ja bii pua yua buu yeni a tinkpila bii yua n buu baadi kuli, li buali ke ban lugdi ba a tana, ki kpa ba; bani n ba tugi bi kuuma tagli.'"