¹ O Diedo go den yedi Moyiisi, ² "Maadi yeni Israyeli nitaanli, ki yedi ba ya maama ne: 'Li buali ke yin gagdi ki ya ŋani, kelima O Diedo, i Tienu gagdi ki ŋani, ki bua yin ya tie nani wani yeni. ³ Yuakuli ń cɔlni o báa yeni o naá, ki baa li miafagli. I go baa cɔlni Saba, mi fuodma daali. O Diedo i Tienu n bili yi ke yin cɔlni lanya ñɔmaama. ⁴ Yin da pugi i buli yaali n ki pia mayuli, yin da duadi kudi buli, ki ya pugi. O Diedo n tie i Tienu; wani n maadi yi ya maama ne, wani baba n tie ya Tienu ke i baa pugi. ⁵ O Diedo go maadi mine: 'A ya cua yeni paabu ki bua yidi salga ki mia O Diedo taanyenma yeni o, yin tieni maama ke o ba fidi ki ga i paabu. ⁶ Bi ŋmani ti padnandi li padli daali mɔno i, ti ya sieni i ba fidi ki ŋmani li daalieli. Ama, ya padnandi n sieni li daataali daali, li buali ke lan sia ki buoni ti i. ⁷ I ya ŋmani padnandi li daataali daali, li jɔgni O Diedo po, o kan ga i paabu. ⁸ Yua n ŋmani padnandi li dataali daali, i tagli ba tugi o yuli po, kelima waa cɔlni yaali n gagdi ki ŋani O Diedo po. lanwani ii, waa dagdi wanya ye N buolu yaaba siiga. ⁹ I ya cili i kuanu nni u jetaagu, yin ŋa poyenpo, ki da yendi, ki go da gaani yaali n baali, mi liegma po. ¹⁰ A ya taa a jiedi a kuanu nni ki gbeni, ŋan da guani mi liema ki taa ki ledi, ki go da tɔgni ki gandi ya jiedi n baa. Lanya jiedi tie a luoda yeni bi canba yaaba n ye i siiga nni yeni ya liegma po i. Mini O Diedo n bili yi ke yin cɔlni lanya ñɔbona. ¹¹ ŋan da su nilo bonli ŋan da pua tofaama ŋan da bɔndi a lielo mo ¹² Yin da taa O Diedo yeli ki pua tofaama, kelima i ba biidi U Tienu yeli. Yin da sindi ke Mini n tie O Diedo i Tienu. ¹³ Yin da di nilo jodi, ki de janbi nilo o bonli po I ya bili ke i ba pa i tuonsɔmba ya pani, yin pa ba lan buali maama, yin da guudi daali ń pendi ke yii pani. ¹⁴ Yin da soli womo, ki da bili bontuudkaali juamo po, wan da ti tuudi ki baa. Mini O Diedo n bili ke yin cɔlni li ñɔbona. ¹⁵ Ya ya jiagi ya buudi n tiegi, i buujiali nni, yin da taani o luodo po, yin go da taani o piado po, yin li jia ya buudi n tiegi nani lan buali maama. ¹⁶ Yin da tieni tingbangbaabu buoluba po. Yin da tie kasiedi-tofaadanba, ban kpa i lielo fanfanma. Mini O Diedo n bili ke yin cɔlni li ñɔbona. ¹⁷ Yin da nani i nisaalilielo. Li buali ke yin cegli a lielo bonŋanla, ki da ti tugi o tuonbiadi tagli i yula po. ¹⁸ Yin da bobni pantuuli i lielo po, bii ki fiini i pabienli opo lan waagi. Ama yin buadi i lielo nani yin bua i yula maama yeni. Mini O Diedo n bili ke yin cɔlni li ñɔbona. ¹⁹ Yin cɔlni N yikodi Yin da cedi yanbuoli lie, yii n ki taa, ń do biyaba Yin da buli buli bonbuoli lie ki ŋmandi kuanyendu po. Yin da la ya tiagu n lugi yeni gaalbuoli lie. ²⁰ Ja ya dua yeni ya potuado n tie nitiano cikpenga, ama ke o nan ki daa ki faabi o ka,bani niba lie yeni tugi i tagli. Ama wan dá den tie potuado yeni, li ki buali ke ban kpa wani yeni li jaconconli. ²¹ Ama, li jaconconli ba cua yeni patonli, u kadkaanu gbandieli bulñɔbu kani, ki padi o tuonbiadi po. ²² Salga yidkaciamo ba padi li patonli, ki mia Mini, O Diedo ń di sugli o tuonbiadi po. ²³ I ya kua min niani yi ya diema nni yeni, ki ŋuu tiiluonkaadi, i kan mua li tiidi luana hali bina taa. ²⁴ Li binnaali, li buali ke yin gagdi ki taa li tiidi luana kuli ŋan tua paabu O Diedo po. I ba gagdi li luana, ki ŋanbi a, ŋan tua ya luana n gagdi ki ŋani Mini O Diedo kpiagdi po. ²⁵ Ama i ba fidi ki mua li tiidi luana li binmuuli. I ya tieni yeni, i tiidi baa luoni bonŋanla. Mini O Diedo n niani yi lanya ñɔnianu. ²⁶ Yin da ŋmani yanga nandi yeni mi sɔma. Yin da gedi mani jaba kani, ki bu baadi, yin da bu baadi. ²⁷ Yin da kuo ki kogdi i yula nani bi nilanba ń tie maama yeni. ²⁸ Yin da pali i gbanu po tinkpilo tanpala, Yin go da tuutuu i gbanu po. Mini O Diedo n bili ke yin cɔlni li ñɔbona. ²⁹ Yin da niini i bisiaba ki kuani ba mi conconma nni, ban jɔgni bi yula. I ya cedi ke bi tua concona, mi diema baa ti gbie yeni a poconcona i, ki kuani i siiga nni i nibuoli cancagin-tuada yeni bi tɔgbiardi. ³⁰ Yin ya cɔlni Saba, mi fuodma daali, ki go ya fangi N kaangagdiŋamu, kelima Mini n tie O Diedo. ³¹ Yin da cengi yaaba n bu ti baadi yeni a tinkpila maama. I ya tieni yeni, N ji kan cengi i maama. Mini n tie O Diedo, i Tienu. ³² Fii ki sedi o nikpelo nintuali, ki waani ŋan pia ya fangli a nikpela po. Lan dɔgdi ke a cɔlni Mini yua n tie O Diedo yeni i Tienu. ³³ Nicanba ya ye i siiga, yin da janbi ba. ³⁴ Yin ya nua ba nani yin nua bi dogtieba maama yeni. Yin buadi ba nani yin bua i yula maama yeni, yin da sundi ke yimo den tie canba i Ejipti diema nni, ke Ejipti yaaba den kubi yi ti yonbdi nni. Mini O Diedo, i Tienu, n waani yi ke yin cɔlni li ñɔbona. ³⁵ I ya bua bigni bonli ki diidi li fagmu, bii li kpiagu, lanyaaka li yabnu, yin lɔgdi i janbi. ³⁶ Yin ya bigindi yeni ya bonbiginkaali n tiegi, ki wangi u fagmu, u kpiagu yeni u yabnu lan buali maama. Mini n tie i Tienu, yua n ñani yi Ejipti diema nni. ³⁷ Yin cɔlni n yikodi yeni n ñɔbona bonŋanla. Mini O Diedo n yedi ke yin tieni li ñɔbona ń buali maama.'"