¹ O Diedo go den yedi Moyiisi, ² "Maadi Israyeli yaaba ya maama ne npo: 'Nilo ya niani O Diedo ñɔnianu, ke li tie ke o gagdi nitiano i, ke o baa tie O Diedo yua, o diedo ba fidi ki cabi o, li ya tie ke o bua pa ligi ki faabi wan niani yua, o ba fidi ki gedi ki la salga yidkaciamo, wan waani o wan ba pa ya dibala, ki faabi o. Salga yidkaciamo ba diidi ya dibala n ye u kaangagdiŋamu i, ki bili o, wan ba pa maama. ³ O Di ń bili ya dunga li ñɔnianbuolu po n ne: Nilo yua n pia bina piilie, ki ya caa bina piiluoba, o ba pa dibala piimu i, li ya tie ja; ⁴ li ya tie ya pua n ye bina piilie yeni bina piiluoba siiga nni, o ba pa dibala piitaa. ⁵ Li ya tie ya nilo n ye bina mu, ki ya caa bina piilie siiga, ja po, o ba pa dibala piilie, pua po, wan pa dibala piiga. ⁶ Li ya tie ya biga n ye ŋmaayendo yeni bina mu siiga, o ba pa dibala mu, bonjaga po, ki pa dibala taa, bonpuoga po. ⁷ Li ya tie ya nilo n pendi bina piiluoba, ja po, o ba pa dibala piiga a mu, pua po mo, dibala piiga. ⁸ Li ya tie ke yua n niani yeni tua luodo, ki kan fidi ki pa ki daa ki faabi wan niani ya nilo, o ba gedi yeni li nilo salga yidkaciamo kani, wan waani o wan ba pa maama ki daa ki faabi o. ⁹ Li ya tie ke nilo niani O Diedo ya yanga n ŋani, ki tuo opo, lanya yanga gagdi ki tie O Diedo baba ya yanga i. ¹⁰ Yua n niani li yanga yeni, kan guani ki lebdi, ki teni yantianga, wan niani yaaga yeni yapo. O kan lebdi, ki teni ya yanga n ŋani, yaaga n ki ŋani yapo; o go kan lebdi ki teni ya yanga n ki ŋani, yaaga n ŋani yapo. O ya tieni yeni, tini yandi lie kuli ba gagdi ki ya tie O Diedo ya yandi i. ¹¹ Li ya tie ke wan niani ya yanga, ki tie yaaga n gagdi ki ŋani, ki dagdi paabu, O Diedo po, o ba gedi yeni li yanga salga yidkaciamo kani. ¹² Salga yidkaciamo ba diidi ki yanga dunga, ke li ŋua kan ya tie ya yanbuolu. Salga yidkaciamo ya seni ya dunga, ki yanga mayuli n yeni. ¹³ Li nilo ya bua wan guani ki daa o yanga, o ba pa salga yidkaciamo ń bili ya dunga, ki go maani dibala mu po kuli, dibali. ¹⁴ Li ya tie ke nilo niani o diegu i, ki bua kun gagdi ki ya tie O Diedo ya diegu, salga yidkaciamo ba diidi ki bandi li diegu mayuli, ke li ŋua li diegu ń tie ya diebuolu, yeni gun tie maama. Salga yidkaciamo ya seni ya dunga, li diegu mayuli n yeni. ¹⁵ Li ya tie ke nilo niani o diegu, O Diedo kpiagdi po, ki ti bua wan guani ki daa li diegu, o ba pa li diegu dunga, ko go maani dibala mu po kuli dibali, lani n tie li diegu ń guani ki tua o diecelu. ¹⁶ Li ya tie ke nilo niani o tinfanma, bii o diegu tinfanma, O Diedo kpiagdi po, li tinfanma mayuli ba cɔlni ya dibima n ba fidi ki buli li tinfanma kuli i. Dibima kilo kobi taa ń ba buli ya tinfanma po, o ba pa dibala piiga. ¹⁷ Li ya tie ke li nilo bo niani li tinfanma mi faabma binli nni i, li dunga baa tie ban seni maama i, li kan wadi. ¹⁸ Ama, li ya tie ke mi faabma binli pendi yo, ke o puni O Diedo li tinfanma, li dunga baa ŋua ya bina n sieni yeni ya faabma binli n ŋua i. Li ya tie ke ya bina n sieni ji ki yabi, bi ba fidi ki wadi ki dunga. 9 Li ya tie ke yua den puni mi tinfanma yeni, bua wan guani ki daa o tinga, o ba pa salga yidkaciamo ń den seni li tinga dungs maama i, ki go maani dibala mu kuli po dibali, yeni n tie wan guani ki diedi o tinga. ²⁰ Ama, o ya ki guani ki daa li tinga, bii bi ya kuadi li tinga nitiani po, li gbeni opo n yeni, o ji kan guani ki daa li tinga , ki diedi. ²¹ Mi faabma binli ya pundi, li tinga ji ba tua O Diedo ya paabu n gagdi ki ŋani, hali yeni ya yognu kuli. Bi ba puni salga yidkaciamo i li tinfanma. ²² Nilo ya taa wan daa ya tinga, ke ki tua ya paabu n gagdi ki ŋani O Diedo po, ya tinfanma n ki taa ki tindaakaaga ni wani tie u diegu ya faali i, o tindaano n die, ²³ Salga yidkaciamo ba cɔdi ya bina n sieni yeni ya faabma binli n ŋua i, ki seni li tinga dunga. Yua n bua daa yeni ba pa yenma i, li daali mɔno, ki diedi o tinga. Wan pani ya ligi yeni n ba tua ya paabu n gagdi ki ŋani O Diedo po. ²⁴ Ama, mi faabma binli ya pundi, yua n den kpia ki kuadi li tinga yeni, ya diegu n den yeni ki tinga yeni n ba diedi o tinfanma. ²⁵ Ban ba pa ya dibala kuli ba cɔlni U kaangagdiŋamu nni dibala mayuli i. ²⁶ Nilo ki pia ya sanu ke o ba taa , nua yo oo, pia yo oo, ya bikpiaga ki puni paabu, kelima li yandi bikpiamu tuodi ki tie O Diedo ya paabu i. ²⁷ Nilo ya puni O Diedo ya yanga n ki ŋani, O ba guani ki daa, ki diedi li yanga, ki pa ban bili ya dunga, ki go pugni dibala mu po kuli dibali. O ya ki guani ki daa, ki diedi ga, bi ba kuadi ga, ku dunga ń dagdi maama i. ²⁸ Ama, nilo ń die ya yonbo, ya yanga bii ya tinfanma, ki taa ki poli ki niani O Diedo, bi kan fidi ki kuadi, bi go kan fidi ki daa mo, li paabu ji ba tua ya paabu n gagdi ki dagdi yeni O Diedo i, hali ya yogu ń tuu ya yogu. ²⁹ Nilo ya tieni bonli, ke O Diedo diidi ki sua ke li tie tuonbiadi i, bii, bi ya poli, ki niani nilo, li nilo kan yaadi fanma. Li buali ke li nitaanli ń kpa o i. ³⁰ Nilo ń koni ki baa yaali, bii o tiidi ń loni ya bonluana, ki o cie, o ya bɔgdi o kpaangu taalma piiga, biinyendu tie O Diedo ya biinu i. ³¹ Yua n bua wan guani ki daa li biinu, li buali ke wan pa ban seni li biinu dunga maama i, ki go maani dibala mu po kuli, dibali. ³² Bi ya taa deni yandi, yandi piiga siiga, yanyenga tie O Diedo yaaga i. O yankpaali ya taa o gbiamu, ki tuugi, ki cɔdi li yandi, o ya tuu yandi piiga, ya yanga n ŋua tie O Diedo yaaga i. ³³ O ya tieni yeni, li ki pia ke ban lugdi ya yandi n ŋani, ki ŋa ya yandi n ki ŋani, lanyaaka ban lebdi ya yandi n ki ŋani, ki taa ya yandi n ŋani. O ya lebdi yanga, ki taa tianga, tini yandi lie kuli ba tua O Diedo paagagdikaabu i. O yankpaalo kan fidi ki guani ki daa ba, ki diedi." ³⁴ O Diedi ń bili ya ñɔmaama Sinaayi juali po, ki maadi Moyiisi ke wan waani li nitaanli n yeni.