¹ O Diedo go den yedi Moyiisi, ² Maadi yeni Haarɔn yeni o bijaba yeni Israyeli nitaanli kuli. Yedi ba ke N bili bipo ya ñɔmaama ne: ³ A ya bua padi yanga; naatonli, pabiga, ŋuabo, li buali ke ŋan cua yeni li yanga u kadkaanu, li gbandieli bulñɔbu kani i, ban fidi ki waani nni li yanga likani. ⁴ A ya kodi li yanga kaantianu, ke li tie padli i , apo, lan tie tijondi nni yo oo, niinnpo yo oo, a ba tugi i tagli, kelima a wuli li yanga sɔma ya kaanu n jɔgni, kaa dagdi yeni salga yidma. A ya tieni yeni, a ji ki dagdi yeni ŋan ya ye O Diedo nitaanli siiga. ⁵ O Diedo waani yin ba tieni maama, ki da yidi salga i kuani nni, ama yin cɔlni lan buali ya sanu, ki cua yeni i paabu, u kadkaanu, li gbandieli bulñɔbu kani, ki teni salga yidkaciamo, wan padi, ki mia taanyenma yeni O Diedo. ⁶ O ya padi ki yanga, o ba miimii mi padsɔma li gbandieli bulñɔbu kani, li padbinbindli po, ki juu li yanga kpama, mi nuulmanu ń mangi O Diedo pali. ⁷ Yinba li nitaanli, i kan padi padli, ki pugi bulo bii sanpoli. Yinba li nitaanli, yin cɔlni ya nɔbonli ne, hali ya yognu ń tuu ya yognu kuli. ⁸ O Diedo go den yedi Moyiisi ya maama ne: "Yedi Haarɔn yeni o bijaba, ke ban yedi li nitaanli, ke Israyeli nilo bii ya caano n ye i siiga ya cua yeni paabu, ki teni salga yidkaciamo, li padbinbindli po padjuukaali po, bii bu ya tie paatianbu, ⁹ Li ya ki tie ke o cua yeni li paabu u kadkaanu, li gbandieli bulnɔbu kani, ki ba padi Mini O Diedo po, li nilo ji ki dagdi ke wan ya ye N buolu siiga. ¹⁰ Ya nilo n ŋmani yanga sɔma, gan tie ya yanbuolu kuli, wan tie Israyeli yua yo oo, nicaano, ke o ye i siiga aa, N ba paadi ki ñani o n buolu yaaba siiga. ¹¹ Kelima yanga kuli miali ye mi sɔma nni i. N kadi ki waani ke ban miimii li padbinbindli po mi sɔma, min fidi ki di li nitaanli tuonbiadi po sugli. ¹² Lanyapo i, ke N yedi, ke yinba Israyeli yaaba yeni ya canba n ye i siiga nni ne kuli, oba kuli kan ŋmani sɔma. ¹³ I siiga nni Israyeli yua bii ya caanio n ye i siiga ya gedi waalu, ki kpa yanga bii bonyugdili, min cabi ke yin ya ŋmani ya bonfuoda siiga, wan wuli o sɔma tinga nni, ki piini ma yeni mi tama. ¹⁴ Lanyapo i ke n tuodi ki kadi ki waani ke yinba Israyeli buolu yaaba, yua n ŋmani sɔma, o ji ki dagdi yeni wan ya ye N buolu yaaba siiga, kelima, bonfuodli kuli miali ye o sɔma nni i. ¹⁵ Yinba Israyeli yaaba siiga bii ya caano n ye i siiga nni ne ya ŋmani yankpienandi, bii fuayanga ń cuo ya yanga nandi, li buali ke wan ŋuudi o tiadi, ki wuli ki ŋuudi o gbanu bonŋanla, ki ya ye yeni ti jɔgindi hali yeni ku yenjuogu. ¹⁶ Yua n ki cɔlni li kuali kuli, ki tieni lan buali maama, o ba tugi i tagli o yuli po.