¹ Haarɔn bijaliedba ń kpe kalima bi den nagni ki juu O Diedo po tolaali kaa cɔlni wan den kuani ba o ñɔmaama nni yaali, ki tieni yaali n ki dagdi, O Diedo den maadi yeni Moyiisi. ² O den yedi o, "yedi a ciamo, Haarɔn, ke wan da pendi bu kpadɔginkaaba, ki kua liiga po, u kaangagdiŋanmɔnu, a ñɔmaatana kpagu yeni ku bonbiili n ye naani, ke N mo ye ti talwadi nni, likani yeni. Haarɔn ya ya pendi ki kua likani, ke u yogu dá ki pundi, o ba kpe! ³ Ki fidi Haarɔn ń kua li gbandieli nni, u kaangagdiŋanmɔnu nni, o ba cua yeni naatonli, lin tua ti tuonbiadi po paabu, wan padi, ki go cua yeni patonli, wan ba padi yaali, ki juu bonmunli, li padbinbindli po. ⁴ Yaali n pugdi, Haarɔn ba wuli, ki ŋuudi o gbanu kuli, ki la leni gaali liagaalgu yeni leni benŋuunu, ki ñagni leni cabñagdu o ciaga nni, ki fini o yuli li finfinjuali. Tini n tie o tialakaadi yaadi n gagdi ki ŋani, ki dagdi. ⁵ Israyeli nitaanli mo ba baa ŋuabuana lie, ban ba padi yaa, bi tuonbiadi po, ki pugni patonli, yaali n ba padi, ki juu bonmunli li padbinbindli po. ⁶ Haarɔn ba teni ya paabu n tie naatonli, wan ba padi yaali, min di sugli o tuonbiadi po yeni o diegu tuonbiadi po. ⁷ O go ba cua yeni ŋuabuana lie, li gbandieli bulñɔbu kani. ⁸ O ba tɔa tiatia, ŋuabuana lie yeni siiga, ki gandi wan ba padi yaali, yeni wan ba ŋa yaali bonfuodli. ⁹ Haarɔn ba nagni n kani yeni lan gandi ya ŋuabuali, ki ba padi. Li baa tie paabu, li nitaanli tuonbiadi po. ¹⁰ Haarɔn ba nagni yeni ya ŋuabuali n sieni mo, ama, o kan kodi lini. Li baa fo i, ki waa. Haarɔn ya cedi ke bi gedi yeni li ŋuabuali, ki ŋa mi fanpienma nni, ke li waa, ki fo, N ba di sugli li nitaanli tuonbiadi po. ¹¹ Lanwani ii, Haarɔn ba cua yeni ki naatonga mini O Diedo kani, lan tua paabu, wani yeni o diegu yapo. O ba kodi li naatonga, bi tuonbiadi padli po, ki ga mi sɔma, tadga nni. ¹² O ba yuandi ki padi a mukuana ti kumɔndi tiagu nni, ki tieni a tulaali juutiagu nni. O ba jobi li ŋubliŋanli, nuupuogu. O ba kua yeni tolaali juutiagu yeni li ŋubli, li gbandieli nni, u kaagagdiŋanmɔnu kani. ¹³ O ba tieni li ŋubŋanli yeni tulaali ya kuana n co po, O Diedo nintuali. Li ŋubli muñiigu ba fii yeni ti talwadi, a ñɔmaatana kpagu bonbiili po. O ya cɔlni lankuli, wan ba waani o paabu kuli ya yognu, O Diedo kani, o kan kpe. ¹⁴ Haarɔn ba yuandi ki tuu o nuubili mi sɔma nni, ki miimii a ñɔmaatana kpagu bonbiili po, ki go miimii li sɔma ku kpagu kani. ¹⁵ Haarɔn ba yuandi ki ña li gbandieli nni, ki kodi li ŋuabuali, yaali n ba padi li nitaanli tuonbiadi po. O kua yeni li padsɔma bu kpaldɔginkaabu liiga po, u kaangagdiŋanmɔnu kani. O ba miimii li sɔma ku kpagu bonbiili po, ki go miimii ku kpagu liiga po, nani wan tieni maama yeni ki naatonga sɔma yeni. ¹⁶ O ya tieni yeni, o ba gagdi ki ŋanbi u kaangagdiŋanmɔnu. O ba miimii u kadkaanu gbandieli kani mi sɔma boncianla, kelima N ye li gbandieli nni, bi siiga, ke bi nan jɔgni boncianla, bi tuonbiadi po. ¹⁷ Haarɔr ya kua li gbandieli nni ki bua gagdi ki ŋanbi u kaangagdiŋanmɔnu, obakuli ki pia ya sanu ke o baa ye u kadkaanu gbandieli kani. Kase wan padi ki mia nni min di sugli wani yeni o diegu yeni Israyeli nitaanli tuonbiadi kuli po, salga yidka bakuli kan nagni u kadkaanu gbandieli. ¹⁸ Lani ya pendi, Haarɔn ba ña li gbandieli nni, ki gagdi ki ŋanbi li padbinbindli. O ba faani li padbinbindli yina po yeni ki naatonga sɔma yeni li ŋuabuali sɔma, ki go kagni ki lindi. ¹⁹ Haarɔn ba yuandi ki tuu o nuubili mi sɔma nni, ki miimii li padbinbindli po taalma lele. O ya tieni yeni, o ba gagdi ki ŋanbi li padbinbindli, kelima Israyeli yaaba tuadbiadi yeni bi tuonbiadi po. O ba ŋanbi li padbinbindli lan gagdi ki dagdi Mini O Diedo po. ²⁰ Haarɔn ya kua ki ŋanbi kaangagdiŋanmɔnu, ki ñani ki ŋanbi u kadkaanu gbandieli kani yeni li padbinbindli ki gbeni, o ba nagni yeni ban gandi ya ŋuabuali ke o baa waa ki fo yeni. ²¹ O ba maani o nuuliedi kuli li ŋuabuali yuli po, ki maadi ki dɔgdi Israyeli nitaanli tuonbiadi kuli. O ya tieni yeni, li waani ke o tugni li nitaanli tuonbiadi kuli li ŋuabuali yuli po i. O ji ba yuandi ki gandi ya nilo n ba gedi yeni li ŋuabuali, ki ban ŋa li mi fanpienma nni. ²² Mini O Diedo ji ba tuni li ŋuabuali i, Israyeli nitaanli tuonbiadi kuli ya tagli, ki yaani li, lan gedi mi fanpienma nni, ki tikuonga po. ²³ Haarɔn ya gbeni u kaangagdiŋanmɔnu nni bogda, ki ñani u kadkaanu gbandieli kani, o ba landi wan bi lani ya leni tialakaadi yaadi n gagdi ki ŋani ki dagdi yeni, ki bili li gbandieli nni. ²⁴ O ji ba la ya kaanu n dagdi, ki wuli, ki la o tiafandi, ki ji padi wan bua juu ya padyandi bonmunli li padbinbindli po, o tuonbiadi po yeni Israyeli nitaanli tuonbiadi po. Lanwani ii, O Diedo ba di sugli bi tuonbiadi po. ²⁵ O go ba juu wan bi kpia ki padi ya yanlierdi yeni kpama li padbinbindli po. ²⁶ Ban gandi yua ke wan gedi yeni li ŋuabuali mi fanpienma tinkuonga po yeni, ya gedi ki guani, o ba ŋuudi o tiadi, ki wuli, ki fidi ki kua ti jondi nni, bi niba siiga. ²⁷ Ban padi ya naatonga yeni ya ŋuabuali, ti tuonbiadi po yeni, bi ba ñani li nandi, li gbandi yeni ti nuadi, li yuli yeni a taabiana kuli, ti jondi niinnpo, ki ban sia ki buoni lankuli. ²⁸ Ya nilo n ba sia ki buoni li nandi, ba ŋuudi o tiadi, ki wuli, ki fidi ki kua ti jondi nni, bi niba siiga. ²⁹ O ŋmaalelelo, o danpiiga, min ba gandi ya daali, ikuli ba loli bu ñɔbu, ki ga fala, i kan sɔni tuonli bakuli. Ne tie ya ñɔmaama ke i baa kubi yognu kuli, ki cɔlni, yinba u dogu nni maabila yeni ya canba n ye i siiga kuli. ³⁰ Li daali, Haarɔ ba padi, ki tieni a bogda, ki mia nni, min di sugli ikuli po, ki ŋuudi ki ñani i tagli kuli, ki ŋanbi yi, yin ya tie yaaba n dagdi yeni O Diedo ń bua maama. ³¹ Li daali baa tie i po fuoma daali nani Saaba yeni, i ba lloli bu ñɔbu, ki ga fala. Li tie ya ñɔmaama ke ikuli ba cɔlni hali yeni ya yognu kuli. ³² Ban ba sɔgi ya salga yidka, ki gagdi ki ŋanbi o o lieba siiga, wan tua salga yidkaciamo yeni, wani n ba bobni sugli miabu salga, o ba la leni tialakaadi yaadi n gagdi ki dagdi O Diedo kpiagdi po, ³³ ki tieni salga bogda, O ba tieni li bogda, ki ŋuudi ki ŋanbi u kaangagdiŋanmɔnu, u kadkaanu gbandieli, li padbinbindli, salga yidkaaba yeni Israyeli nitaanli, nani Haarɔn ń tieni maama yeni. ³⁴ Ya ñɔmaama ne baa tie ya bogdili ke i baa kubi, ki cɔlni, ki ya tiendi yenma binli nni kuli, ki miadi nni ke min di sugli Israyeli nitaanli ń tieni ya tuonbiadi kuli po." Moyiisi den cɔlni O Diedo ń den bili o ya ñɔmaama kuli.