¹ O Diedo go den yedi Moyiisi yeni Haarɔn, ² Yedi mani Israyeli nitaanli yaama ne: Janyianu ya cuo yua, ke i la ke sinma bii biidi ña o jadi nni, obakuli ń da nagni ki sii li nilo. ³ Li sinma bii li biidi ya cuudi bii ki kaa cuudi, ki taabi o, oba ń da sii o. ⁴ Oba kuli ń da sii wan duani ya duanu po, bii wan kali ya bonkalkaali po. ⁵ Yua n sii o duanu kuli, li buali ke wan ŋuudi o tiadi, ki wuli, ki ya ye yeni ti jɔgindi hali yeni ku yenjuogu. ⁶ Yua n kali wan kali ya bonkalkaali po, li buali ke wan ŋuudi o tiadi, ki wuli, ki ya ye yeni ti jɔgindi hali yeni ku yenjuogu. ⁷ Yua n sii li nilo kuli, li buali ke wan ŋuudi o tiadi, ki wuli, ki ya ye yeni ti jɔgindi hali yeni ku yenjuogu. ⁸ Li nilo ya sii o ñɔsandi, keti baa nilo po,wan da cedi nitiano ń sii o. li buali ke wan ŋuudi o tiadi, ki wuli, ki ya ye yeni ti jɔgindi hali yeni ku yenjuogu. ⁹ Ya nilo po ke li sinma bii li biidi ña opo, ya yagi bonli, kudtaama, taama bii ŋunbo, nilo ń da sii li bonjagkaali. ¹⁰ Yua n kali bii ki sii li nilo ń kali yaali ya po, bii wan kali naani, wan da cedi nitiano ń sii o hali ku yenjuogu. Yua n yugdi li nilo ń kali yaali ya po, li buali ke wan ŋuudi o tiadi, ki wuli, ki ya ye yeni ti jɔgindi hali yeni ku yenjuogu. ¹¹ Mi sinma bii ti biidi ń ye yua ya po yeni ba fidi ki ya bua wan sii nitiano; li buali ke wan ŋanbi ki nidi yo, ki fidi ki sii li nilo; o ya ki nidi, ki sii nilo, li buali ke wan sii yua ń ŋuudi o tiadi, ki wuli, ki ya ye yeni ti jɔgindi hali yeni ku yenjuogu. ¹² Li nilo ya sii tandi tiagu, li buali ke lan mudi li tiagu i. Li ya tie daagu tiagu i, ke o sii, li buali ke lan candi li tiagu bonŋanla i. ¹³ O nilo yeni janyianu ya gbeni, o ba guudi dana lele i. Ki yuandi, ki ŋuudi o tiadi, ki wuli mi n̄inpuubkaama nni (kpenu bi bɔngu) nni. O ya tieni yeni, o ji ba fidi ki kua bi niba siiga. ¹⁴ Li daaniinli daali, o ba baa kpaajiemu lie, bii kpaajenawuundi lie, ki cua li gbandieli bulñɔbu kani, O Diedo nintuali, ki teni salga yidkaciamo. ¹⁵ Salga yidkaciamo ba padi mu. O ba padi yenga li nilo tuonbiadi po, kipadi yaaga n sieni, ki juu lipadbinbindli po bonmunli. Lanya bogdili ya tieni, li waani ke li nilo ŋanbi, ki dagdi O Diedo po n yeni. ¹⁶ Ja ya jɔgni o bandli yeni punñima, li buali ke wan wuli, ki ya ye yeni ti jɔgindi hali yeni ku yenjuogu. ¹⁷ Punñima ya sii tiayiekaagu, bii suobu, li buali ke lan ŋuudi li tiagu i, nilo ń da sii li tiagu hali yeni ku yenjuogu. ¹⁸ Ja yeni pua ya dua lieba, ki mangi yaba, li buali ke bani bilie kuli ń wuli, ki ya ye yeni ti jɔgindi hali yeni ku yenjuogu. ¹⁹ Pua ye ye o faadi nni, nilo ka sii o hali dana lele. Nilo ya sii o li dana nni, o baa ye yeni ti jɔgindi hali yeni ku yenjuogu. ²⁰ Nilo kan sii o duanu bii o bonkalkaali li dana nni. ²¹ Nilo ya sii o duanu, li buali ke wan ŋuudi o tiadi, ki wuli, ki ya ye yeni ti jɔgindi hali yeni ku yenjuogu. ²² Yua n sii li pua ń kali yaali ya po kuli, li buali ke wan ŋuudi o tiadi, ki wuli, ki ya ye yeni ti jɔgindi hali yeni ku yenjuogu. ²³ Yua n sii ya bonli n sii o duanu bii o bonkalkaali, o baa ye yeni ti jɔgindi hali yeni ku yenjuogu. ²⁴ Ja ya dua yeni ya pua n ye o faadi nni, ke li sɔma ŋudi o, o baa ye yeni ti jɔgindi hali dana lele, nilo go kan sii li wan duani ya duanu po mo. ²⁵ Pua puoma nni ya ña sɔma, ke maa tie o faadi, lanyaaka o faadi dana ya pendi, ke sɔma da ki sedi, o baa ye ti jɔgindi nni hali yeni li sɔma kɔlima. ²⁶ Nilo bakuli kan sii wan dua bii wan kaa yaali yapo hali yeni mi sedma, nani wan ye o faadi nni ya yogu yeni. ²⁷ Yua n sii li pua bonli, li buali ke wan ŋuudi o tiadi, ki wuli, ki ya ye yeni ti jɔgindi hali yeni ku yenjuogu. ²⁸ Li pua sɔma ya sedi, li buali ke wan tieni dana lele, nilo kan sii o. ²⁹ Li daaniinli daali, o ba baa kpaajiemu lie bii nawuundi lie, ki cua ligbandieli bulñɔbu kani, O Diedo nintuali, ki teni salga yidkaciamo. ³⁰ Salga yidkaciamo ba padi yenga o tuonbiadi po, ki padi yaaga n sieni mo, ki juu li padbinbindli po bonmunli. Lani n tie wan guani ki ŋanbi nani O Diedo ń bua maama. ³¹ Yin ba tieni maama, li nitaanli nni, yua n jɔgni ń da fidi ki jɔgni N kaangagdiŋamu yu n ye bi siiga nni yeni. Kelima bi ya jɔgni N yekaanu, bi ba kpe i. ³² Ya ñɔmaama ne nua ya ja n pia janyianu, ke sinma bii biidi ye opo, bii ya ja n ŋudi obá yeni o jama, li waani ke o ye ti jɔgindi nni n yeni; ³³ Lanyaaka pua ya ye o faadi nni, bii ja ya dua yeni pua ke o ye o faadi nni po i.'"