¹ O Diedo go den maadi yeni Moyiisi, ki yedi o, ² "O gbaado ŋanbima ya ñɔmaama n ne. ³ Nitiano n ba gedi ki waani salga yidkaciamo li gbaado maama. Salga yidkaciamo ba ña ti jondi niinpo, ki diidi o yiamo gbanu. Li ya tie ke o gbaadma gbeni, ⁴ Salga yidkaciamo ba cedi nitiano n cua yeni nuanmu lie, yaamu n ki pia pɔdi, ki teni O Diedo, yeni cediri benu, i gaalmɔni yeni Isopa daadi, ya gbaado n bua ŋanbi yeni po. ⁵ Salga yidkaciamo ba cedi ban kodi nuanyenga ya tandi tiagu ke bi tieni mi ñinpuubkaama li niinni. ⁶ Salga yidkaciamo ba taa ki nuanfuodga, i gaalmɔni, Sediri muanu yeni Isopi ki tuuni ban kodi ya nuanga mi yeni sɔma yaama n ŋmadi yeni mi ñinpuubkaama yeni nni. ⁷ O ba miimii mi sɔma yeni mi ñima yeni yua n bua ŋanbi obá yeni po taalma lele. O ji ba yuandi ki kadi ki waani ke yua n den pia mi gbaadma yeni ba fidi ki guani ki kua bi niba siiga. Salga yidkaciamo ji ba ŋa ya nuanfuodga n sieni yeni, kan yugi ki yaadi. ⁸ O gbaado yua n paagi yeni, ba ŋuudi o tiadi, ki kuo o gbanu po kobdi kuli, ki wuli. O ya tieni lankuli, bi ji ba cabi o, wan kua tijondi nni, ama, o baa ye o jongu niinpo i, hali dana lele. ⁹ Li daaleleli daali, o go ba kuo o gbanu po kobdi kuli, ki taani yeni o langbiali yeni o nungbankobdi. O go ba ŋuudi o tiadi, ki wuli. O ya tieni lankuli ki gbeni, o ji ba fidi ki kua o kpiiba siiga. ¹⁰ O ya kua o jongu nni ke li fandi, o ba cua yeni patonbimu lie yeni ya pasiaga n pia binyenli; li yanpadkaadi kan ya pia pɔdi. O go ba cua yeni mi yoma, cilo bona yian, ke mi ŋmadi yeni mi kpama, mi jiema salga po, yeni mi kpama liirli bɔgdima. ¹¹ Ya nilo n waani ke o gbaado yeni yianu gbeni yeni, n ba yegi yeni o yeni wan bua puni O Diedo ya paabu, ki cua li gbandieli bulñɔbu kani. ¹² Salga yidka ba taa patonbiyenga, ki yugdi ga yeni mi kpama O Diedo nintuali, ki waani ke li tie ti tuonbiadi sugli miabu ya salga i, kelima o yiamo ki den tiadi ki teni O Diedo wan buali o ya paabu. ¹³ Salga yidkaciamo ba yuandi ki kodi ki pabiga, ban kodi naani ti padyandi yeni. Nani ti candandi miabu padli yeni, ti tuonbiadi padli ne gagdi ki ŋani O Diedo po cain. Lanwani ii, ki padyanga nandi tie salga yidkaciamo ya biinu i. ¹⁴ Salga yidkaciamo ba tuu ki padyanga sɔma, ki tieni yua n bua mi ŋanbima yeni jienu tubfaagu po, o jienu nuubijali o yeni o jienu taabijali po. ¹⁵ Salga yidkaciamo ba yuandi ki tieni mi kpama o nuuganpangu nni. ¹⁶ O ji ba tuu yeni o jienu nuubili, ya kpama n ye o ganu nuupangu nni yeni, ki miimii O Diedo nintuali taalma lele. ¹⁷ O ba yuandi ki tuu ya kpama n ye o nuupangu nni yeni, ki tieni yua kpaani mi ŋanbima yeni tubjienu po, o jiennuubijali po yeni o jientaabijali po. O ba tieni mi kpama o yiamo po wan bi kpia ki tieni mi sɔma naani yeni i. ¹⁸ Salga yidkaciamo ba taa ya kpama n sieni ki ye o nuupangu nni yeni, ki sɔgi yua n bua ŋanbi obá yeni yuli po; lan waani ke O Diedo dini sugli o tuonbiadi po. ¹⁹ Salga yidkaciamo ba yuandi ki kodi wan cua yeni ya pasali yeni o nilo yeni tuonbiadi po, O Diedo ń di opo sugli. Lani ya pendi, salga yidkaciamo ba kodi ki pabiliega, ki juu ga li padbinbindli po, bonmunli. ²⁰ O go ba juu mi jiema paabu li padbinbindli po, ki taani yeni li padjuukaali kuli. Lan ba tieni maama ban cabi li nilo, wan guani ki kua ti jondi nni, ki taani yeni o kpiiba n yeni. ²¹ Ya nilo n paagi yeni ya tie luodo, ki kan fidi ki bobni lan buali ke wan cua yeni yaali kuli, o ba gedi yeni pabiyenga, ki teni salga yidkaciamo, wan yugdi, ki waani O Diedo nintuali. Li ba tua ya salga n wangi ke li nilo ki den tiadi ki ba teni O Diedo wan den buali o yaali. O go ba cua yeni mi yoma, ke mi ŋmadi yeni mi kpama cilo bona taa, yeni mi kpama liirli bɔgdima, mi jiema paabu po. ²² O go ba cua yeni kpaajiemu lie bii kpaajenawuundi lie, yenga baa tie o tuonbiadi po, yaaga n sieni mo, ban juu ga bonmunli li padbinbindli po. ²³ Li daaniinli daali i ke o ba taani o paabu kuli, ki cua, ki teni salga yidkaciamo, u kadkaanu, li gbandieli bulñɔbu kani O Diedo po. ²⁴ Salga yidkaciamo ba yuandi, ki taa ti candandi pabiga yeni mi kpama, ki yugdi ki waani O Diedo nintuali, ki waani o ke o paabu n yeni. ²⁵ Salga yidkaciamo ba kodi li pabiga, ki ga mi sɔma, ki tieni yua bua li ŋanbli yeni tujienu po, o jienu nuubijali po yeni o jienu taabijali po. ²⁶ Salga yidkaciamo ba yuandi ki taa mi kpama, ki tieni wani mɔno ya ganu nuupangu nni. ²⁷ ki ji tuu yeni o jiennuubili mi kpama nni, ki miimii talma lele, O Diedo nintuali. ²⁸ O ba tuu mi kpama, ki tieni li nilo po wan bi tieni mi sɔma naani yeni. ²⁹ O ba taa ya kpama n sieni o nuupangu nni yeni, ki sɔgi yua n bua ŋanbi obá yeni yuli po. Li ba waani ke O Diedo dini li nilo tuonbiadi po sugli. ³⁰ Lani ya pendi, salga yidkaciamo ba padi wan cua yeni ya kpaajiemu bii ya kpaajenaawuundi. ³¹ Yenga baa tie o tuonbiadi po padli, yaaga n sieni mo, ban juu ga bonmunli li padbinbindlipo, ki taani yeni mi jiema paabu. Salga yidka ba tieni yeni i, ki mia sugli yua lingi li ŋanbli po yeni. ³² Ya bogda ne nua yua lingi mi gbaadma po li ŋanbli, ki nan tie luodo, ki kan fidi ki bobni lan buali yaali kuli ya ñɔmaama n yeni. Ban ba bogdi o maama wan guani ki kua bi niba nni n yeni. ³³ O Diedo go den yedi Haarɔn yeni Moyiisi, ³⁴ "N bobindi ki ba teni yi Kanana diema yin diedi ma, ki kali mi niinni n yeni. I ya kua ki kali li diema nni, u yogu ye, ke i ba la mi gbaadma lega dieli nni. ³⁵ Li ya tieni yeni, o diedaano ń gedi ki la salga yidkaciamo, ki yedi o, 'N dieli nni pia a lega ke a naani gbaadma lega.' ³⁶ Salga yid ba jiini o, 'Ñani ya bona n ye li dieli nnikuli, min cua ki diidi li lega. A ya ki tieni yeni, n ya cua, n ba waani ke u yianu puodi li dieli nni bona kuli, ki jɔgni a o. ³⁷ O diedaano ya ñani li dieli nni bona ki gbeni, salga yidkaciamo ba kua li dieli nni, ki diidi li lega. Li ya tie ke li dikpinli po lega tie legmɔna bii legwaanuama, li waani ke li lega ki maa li dikpinli po baba ka, ke a kua ki miini. ³⁸ Salga yidkaciamo ba ña, ki luoni li dieli hali dana lele. ³⁹ Li daalelelidaali, o go ba guani ki diidi li dieli. O ya diidi ki sua ke li lega dɔlni, ⁴⁰ Salga yidkaciamo ba cedi ban kpiedi ki ñani li lega, ki wodi ki ban wuli ti jondi niinpo, li tinbenli po. ⁴¹ O diedaano ba fidi li dieli tiipo, ki kɔdi li bɔlindi, ki wodi lankuli, ki ban wuli ti jondi niinpo, li tinbenli po. ⁴² O diedaano ba guani ki cie, ki do bɔlni (taani) li dieli, ki lebdi ban kpaa ya tana ke a lega ye apo yeni, ki kpaa tantɔna li dieli dikpinli po. ⁴³ Bi ya fidi, ki guani ki cie, ki kɔdi ti bɔlindi, ki guani ki bɔlni, ke a lega guani ki tieni li dieli nni, ⁴⁴ salga yidkaciamo ba guani ki diidi li dieli, a lega yeni ya dɔlni, li waani ke ya legbuolu n ba fidi ki di ki biidi li dieli i, lanwani ii, nilo ji kan kua li dieli nni. ⁴⁵ Li buali ke lan mudi li dieli cain, ki wodi li dieli bonbaanbidi kuli , ki gedi ki wuli ti jondi niinpo, li tinbenli po. ⁴⁶ Ban luoni li dieli yeni, nilo ya kua lieni nni, o baa ye yeni jɔgindi i hali ku yenjuogu. ⁴⁷ Ya nilo n duani, lanyaaka ki dini li dieli nni, li buali ke wan ŋuudi o tiadi. ⁴⁸ Ama, salga yidkaciamo ya diidi ki sua ke ban tieni yaali kuli li dieli nni yeni, ke a lega yeni ji ki dɔlni, o ba kadi ki waani ke bi niba ba fidi ki kua li dieli nni kelima li lega bodi. ⁴⁹ Ama, ki fidi nilo ń kua li dieli nni, bi ba bobni, nuanmu lie, yaamu n ki pia pɔdi, ki teni O Diedo, ki taani yeni sediri benu, i gaalmɔni yeni Isopa daadi, ⁵⁰ Salga yidkaciamo ba cedi ban kodi nuanyenga ya tandi tiagu ke bi tieni mi ñinpuubkaama li niinni. ⁵¹ Lani ya pendi, wan taa sediri daagu, Isɔpi daagu, i gaalmɔni yeni ki nuanfuodga, ki tuuni ya ñima n pia ki nuanga sɔma yeni nni, ki miimii li sɔma yeni li ñima li dieli po taalma lele. ⁵² O ya tieni lankuli, o ba bobni, ki ŋanbi li dieli yeni, o diedaano ǹ fidi ki kua li niinni, ke maama ki ye. ⁵³ O ji ba yuandi ki ña ti jondi niinpo, ki ŋa ki nuanfuodga kan yugi ki yaadi. Wan tieni ya bogdili yeni, li waani ke o ba cedi o diedaano ŋanbi li dieli n yeni, ke nilo ba fidi ki kua li niinni. ⁵⁴ Ya ñɔmaama ne tie mi gbaadma, ku naabinsankuagu, ⁵⁵ ti tiadi po yeni a diena nni lega, ⁵⁶ a mɔla, u gbanu po lega ti yiadi yeni a titiba; ⁵⁷ Li ñɔmaama n ba waani nilo n ba fidi ki sii ya bonli, yeni yiko ń ki cabi ke wan sii ya bonli."