¹ O Diedo den yedi Haarɔn yeni Moyiisi: ² "Nilo ya la ke o gbanu po pia fadga, bii legli, bii ya yiagu n naani yeni gbaadma, libuali ke ban ciani o Haarɔn lanyaaka o bijua yua n tie salga yidka kani. ³ Salga yidka ba kpaagi, ki diidi o gbanu. Li ya tie ke likani kobdi pendi, ke li yiagu jiidi ki pendi li gbanli, li tie ya gbannanyianu n ba fidi ki puodi nitiano i. Salga yidkaciamo ya diidi ki sua yeni i, o ba waani li nilo ke o ye yeni jɔgindi i, ke li ki buali ke wan ya ye bi niba siiga. ⁴ Li legli ya pieni, ama, ke ku yiagu ki ñuagi ki pendi li gbanli, li buali ke salga yidka ń paadi ki luoni o dana lele i, wan da nagdi nilo. ⁵ Dana lele ya pendi, salga yidka go ba kpaagi ki diidi li nilo goga. O ya diidi ki sua ke ku yiagu ki lebdi, kaa tandi, kaa go dɔlni, o go ba paadi ki luoni o dana lele goga. ⁶ Li daaleleda ya pendi, salga yidkaciamo go ba kpaagi ki diidi li daano gbanu. O ya diidi ki sua ke ku yiagu ya gbendi, kaa dɔlni, salga yidkaciamo ba yedi li daano ke waa jɔgni, ke o ba fidi ki kua bi niba siiga. Ke ban la ya yiagu tie ya nafanli n kan fidi ki tuadi nilo. Li nilo ya ŋuudi o tiadi, salga yidkaciamo ba fidi ki cabi o wan guani ki kua bi niba siiga. ⁷ Ama ku yiagu yeni ya guani ki tandi, ki dɔlni, li nilo ba guani salga yidkaciamo kani. ⁸ Salga yidkaciamo go ba diidi o mi liema; ku yiagu ya dɔlni ki tuadi kaantianu, lanwani ii, li tie ya gbannanyianu n ba fidi ki puodi nilo i. Salga yidkaciamo ba kadi ki waani li nilo ke li tie gbaadma i, ke o kan fidi ki kua bi niba siiga. ⁹ Nilo ya pia ya gbannanyianu n puodi, li buali ke nilo ń ciani o salga yidkaciamo kani. ¹⁰ Salga yidkaciamo ba diidi o gbanu. Li ya tie ke ku yiagu pieni, ki cedi ke li kani kobdi mo pieni, li ya tie ke li yiagu mɔndi ki kɔni, ¹¹ Lanwani ii, li tie gbaadkpelma n guani ki fii. Salga yidka ba kadi ki waani li nilo ke li tie gbaadma i, ke o jɔgni, ki kan kua niba siiga. Li ji ki buali ke salga yidkaciamo ń luoni o dana lele goga, ki diidi, kelima o bandi ke li nilo ki dagdi wan kua niba siiga. ¹² Li yianu ya yadi ki gbie nilo gbanu po, ke salga yidkaciamo diidi ki sua ke li yianu cili li yuli ki ban jiidi hali a taana, ¹³ ki cedi ke o gbanu kuli pendi, yaali n wangi ke li yianu ji gbendi opo i, salga yidkaciamo ba kadi ki waani li nilo, ke wan da jie yeni wan kua niba siiga. ¹⁴ Ama, ya daali ke bi la ke li nilo gbanu po cili ki tieni a legmɔna, lanwani ii, li ni pia u yianpuodkou, o jɔgni n yeni. ¹⁵ Salga yidkaciamo ya la legmɔna nilo gbanu po, o ba kadi ki waani o ke o pia mi gbaadma, o jɔgni, ki kan kua o lieba siiga. ¹⁶ Ama a legmɔna yeni ya guani ki pendi, o ba guani ki la salga yidkaciamo. ¹⁷ Salga yidkaciamo go ba diidi o gbanu, a lega yeni ya pendi, o ba kadi ki waani o ke o ji ba fidi ki guani, ki kua bi niba siiga. ¹⁸ Nilo kaanu ya mɔli, ki ti gbeni, ¹⁹ Ama li mɔli n bi ye naani yeni, bi ya la legpienli, bii legmɔnli, li buali ke wan gedi ki la salga yidkaciamo. ²⁰ Salga yidkaciamo ba diidi o gbanu, li ya tie ke ku yiagu ñua, ki pendi li gbanli, ke likani kobdi pieni, li tie yianpuodkou n cuo o li mɔli ń den ye naani yeni. Lanwani ii, salga yidkaciamo ba kadi ki waani, ke li nilo jɔgni, ki kan fidi ki kua bi niba siiga. ²¹ Ama salga yidkaciamo ya diidi ki sua kobpiendi ki ye li legli nni, ke li legli yeni maa u gbanu po baba i, kaa mɔndi, lanwani ii, salga yidkaciamo go ba paadi ki luoni o dana lele. ²² Ama ku yiagu yeni ya dɔlni,li tie yianpuodkou i, salga yidkaciamo ba kadi ki waani, ke li nilo jɔgni, ki kan fidi ki kua bi niba siiga. ²³ Ama li legli yaki lebdi, kaa dɔlni, lanwani ii, li tie li mɔli ya yiagu baba i, O ba kadi ki waani li nilo ke o ki jɔgni, ke o ba fidi ki kua bi niba nni. ²⁴ Mu ya midi nilo, ke legpienli bii legmɔnli tieni li kaanu, ke li yiagu kɔni boncianla, ²⁵ Salga yidkaciamo ba diidi li nilo gbanu. Li legli kani kobdi ya pieni, ke ku yiagu ñuagi ki pendi li gbanli, lanwani ii, yianpuodkou n cuo o u mu ń den midi o naani. Salga yidkaciami ba kadi ki waani li nilo ke o jɔgni, ki kan fidi ki kua bi niba siiga. ²⁶ Ama salga yidkaciamo ya diidi ki sua ke kobpiendi ki ye likani, ke li legli dagdi li gbanli po i, kaa jiidi, ki cili ki wadi, li buali ke wan paadi ki luoni o dana lele i, wan da taani yeni nilo. ²⁷ Dana lele ya pendi, salga yidkaciamo go ba guani ki diidi o gbanu. Li ya tie ke ku yiagu yeni dɔlni, lanwani ii, li tie yianpuodkou i. Salga yidka ba kadi ki waani li nilo ke o jɔgni, ki kan fidi ki kua niba siiga. ²⁸ Ama, li legli yeni ya ki lebdi, ki wadi, lanwani ii, li tie muyiagu baba i; salga yidkaciamo ba kadi ki waani li nilo ke waa jɔgni, ke o ba fidi ki guani ki kua bi niba siiga. ²⁹ Li ya tie ke Ja bii pua pia naabinsankuangu o yuli po bii o langbiali nni, ³⁰ Salga yidkaciamo ba diidi li nilo gbanu. O ya la ke li legli yeni ñuagi ki pendi li gbanli, ke Likani kobdi tundi, ki naani bonduudi, li waani ke gbaadma n cuo o likani. Lanwani ii, salga yidkaciamo ba kadi ki waani ke li nilo jɔgni, ki kan fidi ki kua o lieba siiga. ³¹ Ama salga yidkaciamo ya diidi ki sua ke li legli yeni ye u gbanu po baba i, ke kobdi ki tundi likani, o ba paadi ki luoni o dana lele i, wan da taani yeni nilo. ³² Dana lele ya pendi, salga yidkaciamo ba guani ki diidi o gbanu. Ku yiagu ya ki tandi, ke kobtuntuna ki ye likani, ke li legli yeni dagdi u gbanu po baba i kaa jiidi, ³³ Li nilo ba fidi ki kuo, ki nan ŋa, ki da kuo li legli kani, salga yidkaciamo go ba fidi ki paadi ki luoni o dana lele ki pugni. ³⁴ Li daaleleli daali, salga yidkaciamo go ba diidi ku yiagu yeni. ku ya ki tandi, kaa dɔlni, ki dagdi li gbanli po baba, kaa jiidi, O ba kadi ki waani li nilo, ke o ba fidi ki kua bi niba siiga. Li nilo ba ŋuudi o tiadi, ki gua ki kua o lieba siiga. ³⁵ Ama, li legli yeni ya piagi ki pugni, ³⁶ Salga yidkaciamo go ba diidi o gbanu. li legli ya tandi ki pugnu, li ji ki buali ke salga yidka ń diidi kobduudi ya ye, kelima li dɔgdi ki waani ke li nilo pia gbaadma i. ³⁷ Ama, li ya tie ke li legli yeni ki lebdi, ke ti kobŋandi ye likani, li waani ke li legli yeni ji gbendi i, salga yidkaciamo ba kadi ki waani ke li nilo ŋani, ki ba fidi ki guani ki kua bi niba siiga. ³⁸ Li ya tie ke ja bii pua gbanu po pia bonlegpiena, ³⁹ Salga yidkaciamo ba diidi o gbanu. Ama li ya tie ke li lega pieni waamu, li waani ke li tie ŋmaali i. Salga yidka ba kadi ki waani ke li nilo ba fidi ki kua o lieba siiga. 0 Li ya tie ke ja yuli pidi, ki ŋa o yumilinli, li kibuali ke ban kuani o bi niba nni kuama. ⁴¹ Li ya tie ke o yudi cili li yutunli kani, ki pidi, ki caa hali li yuli siiga, o tie yupidli i, li nan ki bia. ⁴² Ama o ya pia ya legli n ñilgi o yupidlipo, bii o yutunli po, li waani ke o pia yianpuodkou i. ⁴³ L buali ke salga yidkaciamo ń diidi o gbanu i. Li legli yeni ya mɔli, ki pieni, nani mi gbaadma lega ń tie maama yeni, ⁴⁴ Salga yidkaciamo ba kadi ki waani ke li nilo pia gbaadma i, ke o kan fidi ki kua niba siiga. ⁴⁵ Ya nilo n pia mi gbaadma, o ba la tiacadi i, o kan caadi o yudi. O ya nagdi niba, o ba pii o nunga, ki ya yigni, 'Da nagni nni mani! jɔgindi yee! jɔgindi yee! ⁴⁶ Li ki buali ke wan ya ye bi niba nni, o yianu yaa gbeni. O ba ña ti jondi nni, ki ban ya kua obá. ⁴⁷ Yogtianu, gbaadma lega ba fidi ki ya ye nilo tiadi yaadi n lugi yeni pakobdi bii yeni leni gaali. ⁴⁸ Li lega ba fidi ki ya ye suobu, bii ya tiagu n jabi yeni ku gbangu. ⁴⁹ Legmɔna bii legwaanuama ya ye pakobdi bii leni gaali tiagu bii ya tiagu n jabi yeni gbangu po, li buali ke o bondaano ń taa li tiagu, ki waani salga yidkaciamo. ⁵⁰ Salga yidkaciamo ba diidi li tiagu, ki paadi ki bili gu dana lele. ⁵¹ Li daaleleli daali, o go ba diidi li tiagu. li legli yeni ya dɔlni, li waani ke li legli di ki biidi lan ye yaali ya po yeni i, lanwani ii, li ji ki buali ke li tiagu ń go sɔni tuonli. ⁵² Li buali ke li tiagu daano ń sia li tiagu, gun buodi cain, hali gun tie ya tiabuolu kuli. ⁵³ Ama salga yidkaciamo ya diidi li tiagu, ki sua ke li legli yeni ki dɔlni, ⁵⁴ O ba maadi o tiadaano ke wan ŋuudi gu. O ba yuandi ki paadi ki bili li tiagu dana lele goga. ⁵⁵ Dana lele ya pendi, salga yidkaciamo go ba diidi li tiagu. Li legli yeni nannanli ya ki lebdi, bá yeni lan ki dɔlni kuli, li ki buali ke li tiagu ń go sɔni tuonli. Li ki buali li legli yeni ya maa bii li ya ye tugu nni, li buali ke lan sia ki buoni li tiagu i. ⁵⁶ Ama, ban ŋuudi li tiagu yeni, salga yidka ya diidi ki sua ke li legli yeni pendi, ki caa mi bodma, o ba waani o tiadaano wan jia ki legdi likani. ⁵⁷ Li ya tie ke li legli guani ku tiagu po, li waani ke li dɔlni i, li buali ke o tiadaana ń sia li tiagu i. ⁵⁸ Ama, o ya ŋuudi li tiagu, ke li legli yeni ñani, li buali ke o tiadaano ń ŋuudi ki ledi i. Li tiagu go baa pia mi buama. ⁵⁹ Mi gbaadma ń cuo ya tiagu n lugi yeni pakobdi bii leni gaali; bii ya suobu lanyaaka ya tiagu n lugi yeni gbangu ya ñoɔmaama n yeni. Mi dɔgdi ki wangi o tiadaano, li tiagu ya ŋani bii ku jɔgni i."