¹ Yaalidgu uu? Li tieni ledi i ke wula yeni ya tana n pia mayuli, ki ñilgi pilpilpil ti yindi ki duadi ii! Ban den gagdi ya tana n pia mayuli, O Diedo po n ji ti bili i kaani kuli, a sanjala po. ² Siyɔn bijaba yaaba n den cie wula mɔno, ama mɔla wani ii, bi ji ki yɔgu bobli dunga, o bobmaalo ń maa yaali yeni o nui! ³ Bá o fuasangbanlo pia mi yama, ki ŋaani o bila, ama, n dogu nni ya puoba, bani yaaba pia mi buama booncianla, ji kpandi ki tua tugmɔndanba, nani mi fanpienma nni tɔgtɔnuadi yeni i. ⁴ Ki canpandiga lanbu tabi o lanŋaangu nni, ki dugni u ñuñuunu po; A bila buali mi jiema po, ama, libakuli ki ye ke bi ba teni ba. ⁵ Yaaba n den maani yeni ti jiemandi yeni, mi koma ji kpa bani i, a sanjala po yieni. Ban den wubi yaaba, ki yiendi ba ya tiadi n mɔni colcolcoli yeni, bani n ji puagi, ki fiidi a tinbena po yeni. ⁶ N diema dogtieba bisiaba tagli yabi boncianla, ki cie Sodomi, ama, bi den bolini o yenma i, ke obakuli ki tieni liba, ki ba faabi o. ⁷ Bi yudanba pala den pieni ki cie a taatana, ki pieni nani mi naaŋanma yeni; Bi gbanu den den ŋani, ki go ñilgi, ke bi go pia u fidu mo. ⁸ Mɔla wani ii, bi ji bɔni nani fantanjiandi yeni i. Bi ya la ba u sanu nni, bi kan bandi ba. Bi gbanli, sani ki tabni bi kpaba; hali ke bi kuodi ki cie daakuondi. ⁹ Ban den kpaa yaaba yeni ki jugsiega ya yaali tu yeni mi koma ń ba kpa yaaba, bani yaaba n dondi, ki kuodi, kelima kuanu nni jiema ki pɔa. ¹⁰ Ya puoba n jie mi niñima boncianla n ji ŋaani bi bila; bi bila nandi n ba tua bi jiema, ban wangi n dogu yaaba bisiaba fala ya yognu kuli. ¹¹ O Diedo dɔgdi o pabienciali, ki waani; o wuli o pabiencianli yaali n tie nani muñima yeni. O sia Siyɔn u mu, ke u juu o fiagli tanpuukaana. ¹² Ki tinga nni baditieba yeni ŋanduna niba kuli den ki bani, ke yibalinba ba tɔgni a bulñɔna, ki kua Jerusalema nni. ¹³ Bi kua Jerusalema nni, kelima bi sawalpuaba yeni bi koopadcianba tuonbiadi yeni bi tagli po, bani yaaba n wuli bi tugpiendanba sɔma u dogu nni. . ¹⁴ Bi ji den waa, ki puagi a sanjala po, nani juama yeni i. Mi sɔma den Jɔgni ba boncianla, hali niloba kuli den kan fidi ki sii bi tiayiekaadi. ¹⁵ Bi niba den yi yigni bipo, "Fuadi mani! Jɔgindi danba! "Fuadi mani! Fuadi mani! Da sii ba mani!" Lanwani ii, bi den waa ki puagi i; i nibuoli nni, bi niba den tua, "Bi ji kan fidi ki ya ye nekanba." ¹⁶ O Diedo wani oba n den yayadi ba; waa ji den bua wan la ba mɔko. Bi den ki pia cɔlinliba kuli bi koopadcianba po, bi go den ki pia fangli bi nikpelba po. ¹⁷ Tinba wani li cini ti nuni yeni ti ninsiidi, ki guu ya todma n kan pundi hali bada. Ti den dobdi ki guu ya nibuoli n ba cua ki nan kan fidi ki faabi ti. ¹⁸ Ti yibalinba den ŋua ki tɔgdi ti taabana i, ti den kan fidi ki cunni sanjala po bii ki kua niba siiga. Ti juodma den nagi, ke bi cɔdi ti miali dana mo Ti miali bianu pundi. ¹⁹ Ti yibalinba den kagi ki cie tanpoli po kapaciigu. Bi den ŋua ki deli ti a juana nni, ki dia ti ti diadi mi fanpienma nni. ²⁰ Yua n den tie ti miali; O Diedo ń den gagdi ki ŋanbi yua tipo, tin den maadi yua ya maama, ki tua, "O baa kubi ti, tin ya ye i nibuoli nni yeni", wani ke bi cuo ki luni ku buogu nni yeni. ²¹ Edomi poŋamo, ya mangidi a pali, yinba yaaba n kua Usi dogu nni. Yin ya bani ke imo ba ñu li tadñukaaga nni; I ba ñu ki guo, ki gaadi, ki yiedi ki ŋa iba mubili. ²² Siyɔn poŋamo, a tagli gbeni, Bi ji kan gedi yeni a ti yonbidi. Ama, Edomi poŋamo, o ba buu, ki cuo ŋa; o ba dɔgdi a tuonbiadi.