¹ O Diedo, tiadi yaali n tieni ti! Diidi ŋan dini ti ya fee! ² Ti faali biinu ñani ti kani, ki kua bi canba nui nni; bi fie ti diedi ki teni bi nilanba. ³ Ti ji tie kpienbila i, tii ji pia baanba, ke ti naanba mo tua kpepuona. ⁴ Ti daa mi ñiñukaama yeni ti ligi i, ki ñu, li buali ke tin daa ya tigdi n ñani ti kuani nni yeni ti ligi i i, ki kuuni. ⁵ Ti yibalinba yaaba n guu ti, ŋua ki tuuli ti i; Ti tuona paa boncianla, ke tii pia fuoma bá waamu. ⁶ Ti tiani ti nui Ejipti yeni Asiiri po i, ki ba mia mi jiema, ki di ki guo. ⁷ Ti yaajanba den tieni ti tuonbiadi, ama, bi naa ji ye, Tinba n ji tugi bi tagli. ⁸ Ti yonbi n ji die ti, oba mo naa ye ki ba fie ti bi nui nni. ⁹ Ti yi lu ti miana i, ki baa li bonjekaali, kelima, mi fanpienma nni ya nibiadba n kubi mu jugsiemu yeni. ¹⁰ Ti gbannandi tuoni ki pundi fanu, kelima mi koma ya gbannantongu. ¹¹ Bi ñiigi bi puoba, Siyɔn juali po, ki ñiigi bi jafanba Juda diema dociami nni. ¹² Li pia ban cegi ki sadi ya badijaba, baa pia fangliba kuli bi nikpelba po. ¹³ Bi niini ku nipaangu, ki tuni ba a naana, ke bi jawaaba tugi a daababikpiaga, ki tuudi ki baali. ¹⁴ Bi nikpelba ji ki caa bu bulñɔbu tantaana, ku nipaangu mo ŋa bi baatiatiadi yeni bi yani. ¹⁵ Ti pala ji ki tiani pamanli po, ti ciaga mo ji kpandi ki tua pabɔnli bonli ¹⁶ ki badifegliga yidi ti yula po, ki baa; Ti ji ye yeni fala baba i, kelima ti tieni ti tuonbiadi! ¹⁷ Lanya po i, ke ti pala ye yeni fala, ke ti nuni mo biigi, ki tie daaa. ¹⁸ Siyɔn juali biidi cain, lani n cedi ke i fuasangbanli gɔdi li kani. ¹⁹ Ama, Fini O Diedo yua n kaa ti gbandi po ya yognu ń tuu ya yognu kuli, Fini n baa kaa li balkalkaanu, nifiima ń tuu nifiima. ²⁰ Be nan cedi ke a sundi tipo, ya yognu ń tuu ya yugnu uu? Be n cedi ke a ñɔli ki ŋa ti hali ti miali yema kuli ii? ²¹ O Diedo, pegdi ti, tin guani a kani, lanwani ii, ti ba guani a kani! Guani ki pandi ti dana, nani lan den tieni maama yognuba yeni; ²² Li nan ya ki tie ke a bua lu ki diani ti yaa ka, ke a pali beni ki kandi u bianu.