¹ N tie ya nilo n la i fee yeni mi cacagma yeni O Diedo pabiencianli gbiamu i. ² O gobdi nni, ki cedi ke n cuoni li bɔnbɔnbiigli nni, ke li naa tie yenma nni ka. ³ O lebdi, ki fii ki sedi npo, ki pua nni hali daamunli. ⁴ O pua ki biidi n gbanu yeni n gbannandi kuli; o pua ki mumudi n kpaba. ⁵ O cedi ke bi lindi ki cebni nni yeni u tonu yeni ti jadi. ⁶ O cedi ke n ye li bɔnbɔnbiigli nni nani ya tinkpba n kpe ke li waagi boncianla yeni. ⁷ O maa ya guonli n fagi, ki lindi nni, ke n kan fidi ki yugi ki ña, ki ciadi. Wan loli nni yeni ya kudseseli kpiagi ki kandi, ⁸ Bayeni min buudi ki jaandi, ki miadi mi todma, o naa cengi n jaandi. ⁹ O pani n sanu yeni a tangbenga; o buoni n sani, ki tulni nni. ¹⁰ O tie npo nani ya yanbiadga n wuoni, ki guu nni yeni, nani ya yangbanlo n laani ki guu nni yeni; ¹¹ O tulni nni u sanu nni, ki cuo nni, ki tɔtɔdi, ki ŋa nni yeni li pabɔnli. ¹² O kpali o dabanli, ki tagni u piemu, ki dadi ki teli nni. ¹³ O yogdi o luoli kuli piemi, ki yegi ki caani n ciaga nni. ¹⁴ Mini n ji tie ban baa laa yua daali kuli, bi ji bugni mini i i yani. ¹⁵ O cedi ke n ye li pabɔnli nni yognu kuli, ki kuani nni i yanbani nni. ¹⁶ O kpaadi n ñina, ki guli nni mi tama nni, ki fili nni. ¹⁷ N yantiali ji ki bani yaali n tie yanduanma; n ji sundi yaali n tie li pamanli yeni mi yemanma. ¹⁸ Lanya po i ke n yedi, "Mii ji pia suginmaba kuli, lanwani ii, min den pia ya dandanli O Diedo po yeni gbeni." ¹⁹ Tiadi min den puagi ya yognu, ki dini ya fee, min den tugi pa pabɔnli yeni ya yanyagdi. ²⁰ N li tiani lankuli po bonŋanla, lani n wudi n gbanu. ²¹ Ama, n yi tiadi lankuli ya po, yeni lani kuli, li dandanli da ye: ²² O Diedo buama yeni o ŋanma dá ki gbeni cain, o niñingbadma mo ki pia bianu, ²³ O Diedo buama pugdi daalkuli i; a buacianma ki pia bianu. ²⁴ N yedi, "O Diedo n tie n biinu," Lani n cedi ke n baa pia opo li dandanli. ²⁵ O Diedo ŋanma yabi yaaba n dugi opo, yeni yaaba n lingi o po. ²⁶ Li ŋani, ki buali ke o nisaalo ń guudi O Diedo faabma yeni li juunli. ²⁷ Li go ŋani ke o nilo ń juuni o panma nni, ki ga fala. ²⁸ Li buali ke wan kali o baba suo, kelima O Diedo ń bili maama opo n yeni. ²⁹ Li dandanli ń dá ye opo ya yognu, li buali ke wan tieni li yumiinli i. ³⁰ Li buali ke wan tandi o kpianu, ki teni yua n pua o, ki tuo, ki guo ti sugdi. 1 Kelima, O Diedo kan ñɔli ki ŋa o nisalo, ya yognu ń tuu ya yognu kuli, ³² Ama, o ya waani ti fala, o go ba gbadi ti niñima nani o buacianma ń yabi maama yeni. ³³ Kelima, waa yi fiagi o nisaalo, o yanbuama ka, bii, ki wangi bi niba fala fanfanma ka. ³⁴ Bi ya ŋmaadi ki midi ki tinga po kpaada ya yognu, ³⁵ Bi ya tudi, kaa ŋɔdi ya buujiali n tiegi, Tanpoli po Badciamo nintuali ya yognu, ³⁶ Bi ya muni o nisaalo i mɔni, li bujiali yognu; O Diedo kan tuo lanya tuonbiadi kuli! ³⁷ ŋma nan yaadi ki maadi, ke li tieni, li nan yaa tie O Diedo buama yaaka? ³⁸ Tanpoli po Badciamo ñɔbu nni ka ke mi yebiadma yeni mi yeŋanma ña aa? ³⁹ Be yapo i, ke o nisaalo, yu pia miali ba biidi o pali ii? Be yapo i ke nilo ba biidi o pali, kelima bi buni ki cuo o o tuonbiidi po oo? ⁴⁰ Cedi mani tin kpaagi, ki diidi ti sani bonŋanla, ki guani ki ŋɔdi O Diedo. ⁴¹ Cedi mani tin duoni ti nui, ki jaandi yeni ti ppala kuli, ki mia Tanpoli po Tienu: ⁴² "Ti tudi, ki fiini mi yenyiema, O Diedo dá ki tieni tipo sugli. ⁴³ A fiini a pabienli, ki fii ki sedi tipo, a kpaa bi niba kaa jie bi niñima. ⁴⁴ A kua ki wuoni ti talwadi nni, kaa bua ti jaandi ń pundi a kani. ⁴⁵ A cedi ke ti tua baadi, ban sengi yaali i nibuoli nni. ⁴⁶ Ti yibalinba kuli yaadi bi ñɔna, ki solni ti i, ⁴⁷ Tinba wani ii, ti jawaanciandi yeni ti yanyagciandi n tie ti yema, mi bolinma yeni u nufanu. ⁴⁸ Ti ninsiidi puubi n nuni nni nani kpenu yeni, kelima, bi bolni n diema nni niba. ⁴⁹ Ti ninsiidi baa cuudi n nini nni, kaa pia kɔlma, fuomaba kuli ki ye, ⁵⁰ Hali yeni ya yognu ke O Diedo yua n ye tanpoli ba faami, ki diidi ki la o. ⁵¹ N nunbu ń la yaali kuani nni li pabɔnli nni, kelima, ban tieni n dogu nni jafanba yaali yapo. ⁵² Yaaba n den tien yibalinba ŋua ki deli nni nani n tie nuanga yeni; bi ŋua ki deli nni fanfanma. ⁵³ Bi luni nni ku buogu nni, ki biini ku tangu ki pibni nni. ⁵⁴ ke mi ñima milni n yuli. N yedi, "Li gbeni minwani yapo n yeni!" ⁵⁵ N yigni, ki taa a yeli, O Diedo, hali ku buoñuangu nni. ⁵⁶ A gbadi n nialu, min yedi ya yognu, "Da biini a tuba, min yigni ya yognu ki miadi a mi todma." ⁵⁷ A den nagni n kani, min taa a yeli ya daali; a den yedi, "Da jie libakuli." ⁵⁸ O Diedo, a kɔni ki ga nni, a faabi nni, ki puni nni li miali! ⁵⁹ O Diedo, a la ban tuni nni ya tagli kuli; saa npo i mɔmɔni. ⁶⁰ A nan la ban tuu bi panli maama, ban taani ñɔbu ku janbi nni maama. ⁶¹ O Diedo, a nan gbadi ban taani ñɔbu, ki sugdi nni maama, ban taani ki bobni ya janbi npo. ⁶² Yaaba n fii ki sedi npo yeni bi ñɔna yeni ban tuni nni ya tagli kuli yagni n yama daamunli. ⁶³ Diidi ban kaa, yeni ban see kuli; bi bugni nni i yani, ki yiini, ki ñuadi nni. ⁶⁴ O Diedo, Tuu ba li panli, nani ban tieni nni maama yeni. ⁶⁵ ŋan dini ba i fee, ki cedi lan yaalidi ba!ŋan jiini a solindi bipo! ⁶⁶ O Diedo, ŋan ŋɔdi ba yeni a pabienli, ki deli, ki bolni ba a tinfanma nni!