¹ Jam! O diedo pabiencianli po, o cedi ke ti tawalgbanbɔndi libni o bisalo Siyɔn po. O cedi ke o poŋamo, Israyeli ñani tanpoli ki baa tinga nni. O pabiencianli po, waa ji tiadi o taaŋmaakaanu po. ² O Diedo ki jie Jakɔbo dociami kuli, niñima, o nali ikuli. O pabiencianli daali, o tudi ki guli Juda, o bisalo dogciami yeni i bilinguona kuli; o pua ki guli bikuli, ki cagni mi diema yeni bi yikodanba kuli. ³ O pabiencianli nni, o pua ki fendi Israyeli yina kuli. O kɔnli o nujienu, o yibalinba nintuali. O cuoni Jakɔbo ya mupienu n lindi ki cebni o, ki dini bonli kuli. ⁴ Nani yibali yeni, o kpali o dabanli ki dadi ki teli tinba i, O nuujienu ji bua tɔa tinba i u piemu. O cedi ke bi kodi o pali ń den mani yaaba ya po, o gbandieli nni, Siyɔn po; O wuli o pabiencianli yaali n tie nani mu yeni. ⁵ O Diedo ji kpandi ki tua yibali i. O nali Israyeli kuli. O nali o kaanjigi kuli. O pua ki bolini o kaanpaali kuli. O pugni i kuumoe yeni i fanfabni o bisalo Juda diema nni. ⁶ O cedi ke bi pua ki mudi o kaangagdiŋamu nani kuanjonli yeni. O cedi ke bi pa ki mudi u kadikaanu, wan den cendi ti naankani yeni. O Diedo cedi ke bi sundi mi jaanma yeni mi fuodma jaanma Siyɔn nni, Kelima, o pabienli po, o cedi ke bi fali bi baditieba yeni salga yidkaaba kuli ⁷ O Diedo ñani o yuli o padbinbinda maama nni, ki cedi ke bi fanbi o kaangagdiŋamu. O taa Jerusalema badidiegu, ki tieni o yibalinba nui nni. Bi ye O Diedo diegu nni, ki laa, ki yigni nani li tie jaancianma yeni. ⁸ O Diedo bobni Siyɔn, o bisalo dociamu puamudima. O bigni, ki bani a bilinguona yeni a kpakpaana kuli ń dɔa maama yo, ki pua ki mumudi likuli, kaa goni o nuu bá waamu. A guokpakpaana yeni a bilinguona kuli bili ki fabni, ban pua ki mumudi ŋa cain yapo. ⁹ O bulñɔciandi feli ki dua tinga nni; o pua ki mumudi a bulñɔkpakpaana kuli. O baditieba yeni o badbijaba kuli taani ki ye yeni i nibuoli, yikodi ji ki ye, o sawalpuaba mo ji ki gaani O Diedo sawali. ¹⁰ Siyɔn, o bisalo cancannikpelba ji kaa tinga nni i, ki ŋmini. Bi wuli bi yula po mi tama, ki yie li pabɔnli tiadi. Jerusalema jifanba tiibi, ki nua tiipo. ¹¹ N nuni cɔgi yeni ti ninsiidi, n yama mo ŋmadi; N nuadi kuli ñani, ki bili tinga nni, kelima, o bisanŋamo niba ń ye ya yebiadma nni. A canpanda yeni bi pomadba baa ki bili u dogu sanjala po. ¹² Bi buali bi naanba, "Be ya jiema n ye ke ti ba di ii?" Bi den ŋmadi ki baali u dogu sanjala po, nani ban pua ki duoli yaaba yeni. Bi yi fuodi ki jiini, ki buoni bi miana bi naanba biina po i. ¹³ O poŋamo, Jerusalema, n nan go ba maadi a be i? N ba nangi a yeni ŋma i, lan paani a pali waamu, fini Siyɔn O Diedo cikpenga? Kelima ŋan ye ya yebiadma nni yabi ki pundi mi ñincianma. ŋma nan ba fidi ki tebi a,ŋan paagi ii? ¹⁴ A sawalpuaba den ga tofaama yeni i bɔndi sawali i apo. Baa den diidi ki la yaali n tie a tagli, ki ba todi a, ki faabi a, ama, bi den pua apo ya sawali n ki pia mayuli ii, ki naa go pia fuomaba kuli, ama ki nan pua mi tofaama, ki tulini a. ¹⁵ Yaaba n pendi i sani nni puogi ti nupuodi, ki ñuadi a. Bi yi fuoni, ki papagi bi yula, O Diedo bisalo,Jerusalema po, ki tua, "Ban den yi ya dogu 'Ya ŋamu n ki pia bianu, ki tinga kuli ya pamanli ka ne ee?" ¹⁶ A yibalinba kuli yaadi bi ñɔna, ki fuoni, ki ŋmani bi ñina, ki tua, "Ti nali o o! Tin den li guu ya daali n yeni! Ti nandi li daali! Ti ji see li daali nni n yeni!" ¹⁷ O Diedo tieni wan den jagi ke o ba tieni yaali. O tieni ki tii wan den yaadi ki yedi ya maama hali yognu. O pua ki mumudi a, kaa jie niñima, kelima o cedi ke a yibalinba mangi bi pala a bodima po; O pugni a yibalinba u paalu. ¹⁸ Bi yigni yeni bi pala kuli O Diedo po, Siyɔn bisalo bilinguona! Cedi a ninsiidi ń puubi yienu yeni ñiagu nani kpenciamu ñima yeni. Da buali fuodimaba kuli po, a nuni ki pia fuomaba kuli. ¹⁹ Findi ku ñiagu nni, yeni ban ba lebdi bi guudikaaba ya yognu kuli, ki ya buudi! ŋan wuli O Diedo nintuali, a yantugmaama kuli, nani mi ñima yeni. Duoni a nui polu po, ki jaandi a bila yaaba n mɔa yeni mi koma, a sankaditaana kani yeni, laafialo po." ²⁰ Diidi, O Diedo, diidi! ŋan sɔni nni ya tuonli ne. Li buali ke bi pomadiba ń guani ki ŋmani bi bila nandi ii, ban kubi ya bila bi tugdi nni, ki ti mali ba aa? Li buali ke ban kpa salga yidkaaba yeni bi sawalpuaba O Diedo kaangagdiŋamu nni ii? ²¹ Bi jawaaba yeni a nikpela, bikuli bibili a sanjala po. N jafanba yeni n jawaaba, bikuli kpe bu tɔbu po; a cedi ke bi kpa ba, kaa jie bipo niñima. ²² A yini n yibalinba,yaaba n ye i kaani kuli, min jie yaaba yeni, ki taani ba, nani ŋan yi yini li nitaanli mi jaancianma yeni, O Diedo pabiencianli daali, obakuli ki sani ki ciadi, obakuli ki fidi ki faabi o miali; Min den wubi yaaba, ki bua ba boncianla yeni, yibalinba buoni bikuli.