¹ Ya dociamu n den milbi yeni bi niba n ji bili dokuongu yeni. U ji kpandi ki tua nani pakuali yeni, ki nan den tie ti kpiagdi diema. U den tie badbisalo i, i nibuoli kuli siiga, ama, bi niini u niba, ki gedi yeni ba ti yonbidi. ² Mi diema buudi, ki fabni, ñiagu kuli, ke o nunga yeni o kpiani kuli gbie yeni ninsiidi baba. O buakaaba siiga, obakuli naa baagi o. O dɔnlinba kuli lindi o puoli. Bikuli ji tua o yibalinba i. ³ Juda diema mo kua mi luoma yeni mi cacagma nni, ke bi taa o niba, ki gedi yeni ba ti yonbidi. O kua ki taa yeni i nibuoli, kaa pia fuoma bá waamu. O pabɔnli ji yabdi boncianla, yaaba n sedi opo kuli, kase ban paadi o. ⁴ Siyɔn sanjala kuli ye yeni kuububuuli i, kelima obakuli ki kpendi u badu po. O bulñɔna kuli ye yeni fala i. Bi salga yidkaaba kuli ye yeni li dunli. O powandiana ye li pabɔnli nni, ke u dogu kuli ye li pabiidcianli nni. ⁵ Bi yibalinba ji tua bi canbaanba; bonli kuli ji cuoni bipo lan buali maama. O Diedo pali biidi boncianla kelima bi tuonbiadi kuli po. O yibalinba taa o bila ki gedi yeni ba ti yonbidi. ⁶ Siyɔn kpiagdi kuli caa ki bua bodi. O badbijaba ji tua nani ya kabli n ki pia muaŋmankaadi yeni, ki ji waa kaa pia paaluba kuli a waala nintuali nni. ⁷ Jerusalema bii ki tiani wan dini i fee yo yognu, ki waa ki puagi. Waa sundi wan den pia ya ŋalmani yeni ya bonmɔnli kuli. O niba ń den baa yibalinba nui nni ya yognu, obakuli den ki ye, ki ba baagi o. Yibalinba den nua o, ki laa o, kelima, o pia yaama n bodi kuli po. ⁸ Jerusalema tieni ti tuonbiadi boncianla, laayapo i ke yaaba n den kpiagdi o kuli ji fali o, kelima o jɔgni, ke bi la o mubili. O ji yi duni i, ki fuadi bi kani. ⁹ O jɔgindi talni o tiayiekaadi, waa den bobni oba, saala po. O tingbali ki pia maama. obakuli naa ye ki ba baagi o. O buudi ki tua, "Hain, O Diedo, diidi min dini i fee maama, kelima, yibalinba wani ya bali li pugdi i!" ¹⁰ Yibalinba maani bi nui yaali n tie bonmɔnli tipo kuli. O la ke bi canba cua ki kua hali u kaangagdiŋamu nni. bayeni ŋan den kuani yaaba ke ban da kua a nitaanli nni yeni tantaankaanu yeni. ¹¹ O niba kuli duni, ki lingi mi jiema. Bi taa ban pia ya bonmɔna kuli, ki lebdi ki ga mi jiema, ki ba faabi bi miana. O Diedo, diidi nni, ŋanbi ki diidi nni, kelima, bi fali nni boncianla, mii ji pia mayuli. ¹² Yinba yaaba n tɔgni i sani kuli po lan da tie ipo nani tinba yeni; diidi mani ki lia, fala ye, ki naani yeni ti ya fala aa? Kelima, O Diedo pabiencianli po, o cedi ke n pali bɔndi boncianla. ¹³ O sɔni u mu hali tanpoli, ke u jiidi ki juu, ki kua n kpaba nni, ki sia ŋa cain. O dia nni ku diagu, ke n baa ku niinni, ke ku mubni n taana. O cedi yognu kuli, ke n ye li pabɔnli nni, kaa ji pia paaluba kuli. ¹⁴ Bi cuo o ki loli n yeni, bi taani ki loli o nui, ki pɔni o tulu nni, ke li ji tie nani naadaapanduu yeni opo. O paalu kuli gbeni. O Diedo n taa nni ki tieni n yibalinba nui nni, n ji kan fidi ki fii, ki sedi. ¹⁵ O Diedo cedi ke min dugi ya jakɔnda po yeni, sani ki yaadi ki ŋa nni. O Diedo yini ki taani a tɔgola ke ban tuogi nni, ki biani n jawaaba fanma. O Diedo cedi ke bi ŋmiani ki ñani Juda, o powandiali gbannanñima cain, nani ban nugi ku daamɔngu tiidi luana maama yeni. ¹⁶ Lankuli ne n cedi ke n buudi, Hain, n nuni, ti ninsiidi puubi n nuni nni nani mi ñima ń puubi u kpenciamu nni maama yeni, kelima, ya baagika n bi ba baagi nni yeni nan fagdi yeni nni. N bijaba ye yeni li pabɔnli, kelima yibalinba paalu yiedi, ki paadi ba. ¹⁷ Siyɔn tandi o nui, ki mia mi todma, ama, faabika ki ye. O Diedo jagi ke yaaba n kua ki lindi Jakɔbo ń tua o yibalinba. Jerusalema ji tua jɔgindi bonli i, bipo. ¹⁸ O Diedo tie yua n tiegi bonŋanla, kelima mini n yie kaa cɔlni o yikodi. I nibuoli kuli, cengi mani nni, diidi mani min fabni maama, fala po. Bi gedi yeni n jafanba yeni n jawaaba ti yonbidi. ¹⁹ N kuudi, ki mia n dɔnlinba mi faabma, ama, bi lindi n puoli, ki kuadi nni. N salga yidkacianba yeni n cancannikpelba kuli kpe u dogu nni. ya yognu ke bi den lingi mi jiema ki ba faabi bi miana. ²⁰ O Diedo, diidi, kelima n ji ye fala nni i; n tugsɔma sani, ke n yama ŋmadi, ke n pali cie ki baa n tugu nni, kelima, n bani ke n fiini mi yenyiema! Niinpo, yibalinba kubi mu jugsimu, ki kpa n niba, ke ti diedi nni mo,kuuma baba i. ²¹ Bi gbadi ke n duni, ki miadi mi todma, ama, obakuli naa ye ki ba baagi nni. n dɔnlinba kuli gbadi min ye ya yebiadma nni, ama, bi pala mangi yeni ŋan sɔni nni ya tuoli ne. ŋan den bili ke a ba tieni yaali yeni, li yogu n pundi. Cedi bani mo ń tua nani mini yeni. ²² Dɔgdi ki waani bi tadingu a nintuali. ŋan tieni bimo nani ŋan tieni nni maama yeni, kelima min den tugi ya tagli kuli yeni. N dunli ji yabdi ki kandi, ke n yama mo ŋmadi.