¹ Ya dogi n den ye Jurden kpenkunu julɔndi nni yeni a juana nni ki ya caa hali ku mɔgciangu jaali yeni Liban po kuli, Heta yaaba, Amori yaaba Kanana yaaba, Hefa yaaba, Perisi yaaba yeni Jibusi yaaba yeni bi badtieba kuli den gbadi Israyeli yaaba ń sɔni Ayi yeni Jeriko dogi maama. ² Bi den taani ñɔbu, ki ba tuogi Josuwe yeni Israyeli yaaba bu tɔbu. ³ Gabehɔn yaaba ń gbadi Josuwe yeni Israyeli yaaba ń sɔni Ayi yeni Jeriko dogi maama, ⁴ Bi den tieni bu ninfanbu. Bi den gedi ki la Josuwe nani bi tie tonda yeni. Bi den taa ti kpalpacadi, ki ŋuuni bituga, ki tuni bi ŋunbi. Ki go taa ya daayuakpedi n cadi, ke bi lilibi. ⁵ Bi den lani tiacadi, ki pili taacaakpela ke ta cacadi. Ban den kubi ya kpani den kuodi, ki cabdicabdi. ⁶ Bi den gedi ki la Josuwe, ke o ye Giligali, ki yedi wani yeni Israyeli yaaba, "Ti ñani ya dogu n fagi, ki miadi ke yin loli ku dɔnlgu ŋantaado yeni ti." ⁷ Israyeli yaaba den jiini bani Hefa yaaba, " Li ki kandi i kua ki kuu ti i, ti ba tieni ledi i, ki loli ku daligu ŋantaado yeni yi?" ⁸ Bi den yedi Josuwe, "Ti tie a naacenba i." Josuwe den buali ba, "I tie bile i? I ñani le i?" ⁹ Bi den jiini, "A naacenba ñani hali ya dogu n fagi yeni ne, kelima O Diedo i Tienu yeli po. Ti ga o laabaali yeni wan sɔni ya tuona kuli Ejipti diema nni. ¹⁰ Ti go gbadi wan tieni Amori badtieliedba, yaaba n ye Jurden kpenpuoli maama, lani n tie Hecibɔn bado Sihɔn yeni Bacihan bado Ogi, yua n den ye Acitaro. ¹¹ Ti Yudanba yeni ti dogu nni yaaba n yedi ti, "Bobni mani mi sancenjiema, gedi mani ki cendi ba, ki yedi ba, "Ti tie a naacenba i, ti miadi ke ŋan loli ku dɔnlgu ŋantaado yeni ti i." ¹² Ti kpanu n yeni, tin fii ya daali, ki ba cua i kani, li den tie kpanu tona i. Ama mɔlane, ji diidi, li ji tie kpanu kuoma i, ki cabdicabdi. ¹³ Ya dayuadi ne den tie daayuapaandi i, ke ti gbieni ku daamɔngu, ji diidi mani tin papadi maama. Ti tialakaadi yeni ti taacaadi kuli cadi li sencenli po i."' ¹⁴ Lanwani ii, israyeli yaaba den ga ban kubi ya paabu, ama bi den ki kua O Diedo kani ki buali ban ñani naani, ki ga i cegli. ¹⁵ Josuwe den loli mi yanduanma yeni kudaligu ŋantaado yeni ba. Israyeli yudanba mo den loli mi yanduanma dɔnlgu yeni ba. ¹⁶ Ban loli yeni ba mi yanduanma ŋantaado, ke dana taa pendi, bi den gbadi ke bi tie yaaba n kua kaa fagi yeni Israyeli yaaba i. ¹⁷ Lanwani ii, Israyeli yaaba den ñani, ki gedi bi diema nni, li daataali daali. Bi dogi den tie Gabehɔn, Cifira, Behero yeni Kiriyati Jeharim. ¹⁸ Israyeli yaaba den ki woli ba, kelima bi yudanba den loli mi yanduanma ŋantaado yeni ba O Diedo, Israyeli Tienu nintuali. Israyeli yaaba kuli den bulni bulni i ki jalgi bi yudanba i. ¹⁹ Ama bi yudanba den yedi Israyeli yaaba, "Ti den poli O Diedo, Israyeli Tienu nintuali i, yeni ba, ti ji kan fidi ki tieni ba yaali n bia. ²⁰ Tin ba tieni ba maama n ne: Ki fidi, ti lɔgdi ya pabienli n ba wuli tipo kelima ti den poli ki loli u dɔnlgu yeni ba yeni, ti ba ŋa ba ban ya fo i." ²¹ Bi yudanba den maadi Israyeli yaaba, "Cabi ba mani yeni li miali" Lanwani ii, Gabehɔn yaaba ji den tua yaaba n den kpaagi ti daadi, ki lu mi ñima Israyeli yaaba kuli po i nani bi yudanba ń den jagi maama bipo yeni. ²² Josuwe den cedike bi yini ba, ke o yedi ba, "Be n cedi ke i pua ti mi tofaama, ki yedi ke i ñani fagma, ki nan bani ke i ye kɔmanne, ti siiga? ²³ Lanyapo, i baa ti solindi nni, i siiga nni nitianba ba tua yonbi i, hali yeni ya yognu kuli, bani n baa kpaagi ti daadi, ki lu mi ñima Ti Tienu diegu po." ²⁴ Bi den jiini Josuwe, ki yedi, "Ti tieni yeni, kelima tinba a naacenba gbadi ke O Diedo, I Tienu den bili li ñɔbonli, ki niani o naaciemo ke o ba puni yi ti diema, ke yin pua ki mudi ya diema n ye i liiga, ki kpa bi niba. Lanwani ii, ti den jie yi ti miana po. Lanyapo i ke ti tieni yeni. ²⁵ Mɔlane, i ji muubi ti yeni u paalu, i nuu nni i. Yin bani ke i ba tieni ti maama kuli lan ya ŋani ipo, yin tieni ti." ²⁶ Lanwani ii, Josuwe ń den tieni maama n ne: o den ñani ba Israyeli dogtiedi nni, ke Israyeli yaaba kan kpa ba. ²⁷ Li daali i, ke Josuwe cedi ke Gabehɔn yaaba tua daakpaagla yeni ñinlula li nitaanli po yeni O Diedo padbinbindli po, hali yeni denne, O Diedo n gandi naani kuli Gabehɔn yaaba n tuuni lanya yonbtuona.