¹ O Diedo den yedi Josuwe, "Da jie; da cedi a pali ń wadi. Taa a tɔtieba kuli. Gadi mani ki ban tuogi Ayi dogu. Diidi, N tieni a nuu nni Ayi bado, u niba, u dociamu yeni u tinfanma. ² I ba tieni Ayi dogu yeni u bado nani yin den tieni Jeriko yeni u bado maama yeni i, mi paadma tie ke i ba taa li dogu tiafagkaadi yeni u yandi kuli ń tua i yuli po piama. Yin cedi tɔtietianba ń́ wuoni ki dia li dogu u diagu." ³ Lanwani ii, Josuwe den fii ki taa bi tɔtieba kuli ki ba gedi ki tuogi Ayi dogu. Josuwe den gandi jakɔndipaala tuda piitaa, ki sɔni ba ku ñiagu. ⁴ O den puogi ba ne, "Diidi mani, i ba nagni u dogu puoli po, ki wuoni ki dia u ku diagu. Yin da fagdi yeni u dogu, ama, ikuli ń bobni ki ya guu. ⁵ Mini yeni ya niba n sieni ba nagni u dogu, bi ya fii tuogi ki ba woli ti, yin sani ki pibi ba bi puoli po. ⁶ Bi ba ŋɔdi ki deli ti hali tin dadi ki fagdi ba yeni bi dogu. Bi ba yedi, 'Bi tiini ti, ki lebi nani ban den sani kpiama maama yeni.' Lanwani ii, ti ba sani ki fagdi yeni ba, ki ciadi ba. ⁷ Lanyognu i ba ña i wuonkaanu, ki kua ki woli u dogu, ki baa u. O Diedo i Tienu ba tieni li dogu i nuu nni. ⁸ I ya baa u dogu, yin juu u u mu. I ya paadi u dogu, yin tieni nani O Diedo ń bili yi ya ñɔbonli yeni. Diidi mani, min teni yi ya ñɔbonli n yeni. ⁹ Josuwe den cedi ke bi ñani ki gedi bi wuonkaanu, bi den wuoni u dogu nituali, Beteli yeni Ayi siiga nni. Lanya ñiagu, Josuwe den dua bi tɔtieba yaaba n sieni siiga nni i. ¹⁰ Josuwe den yagdi ki fii siŋaapanpangu ki fiini, ki bobni o sejenba, Josuwe yeni Israyeli yudanba , ke bi gedi ki tuogi Ayi dogu yaaba. ¹¹ Ya jakɔnda n den ye yeni o kuli den gedi ki nagni Ayi dociamu. Bi den nagni ki kali u Ayi dogu nijienu po. Ku jualɔngu den ye bani yeni Ayi siiga. ¹² O den cedi ke tɔtieba nani tuda piimu gedi ki wuoni u dogu nintuali, Beteli yeni Ayi siiga. ¹³ Bi den seni a jakɔndpaala u dogu nijienu po i, ke ya tɔtieba n sieni mo ye u dogu nintuali po. Josuwe den duani landaali ku jualɔngu nni i. ¹⁴ Ayi bado ń la ba ya yognu, wani yeni o tɔtieba den fii tonma ki ñani ki ba tuogi, ki woli Israyeli yaaba ban kali naani Jurden baagu po yeni. Bi den ki bani ke jakɔnda wuo puoli po, ki ba kua ki woli ba. ¹⁵ Josuwe yeni o niba den tieni nani bi paadi ba yeni i, ki sani ki teli mi fanpienma. ¹⁶ Bi den yini Ayi tɔtieba kuli ke bi ñani ki ba taani ki deli ba, Bi den ŋɔdi ki deli Josuwe, ki ban fagdi yeni bi dogu. ¹⁷ Nilo ji den ki sieni Ayi yeni Beteli dogi nni kaa ñani ki deli Israyeli yaaba. Bi ji den ñɔli ki ŋa u dogu ke li bilinguonli bulñɔcianbu yaa, ki ŋɔdi ki deli Israyeli yaaba. ¹⁸ O Diedo den yedi Josuwe, "Tandi ŋan muubi ya kpaanli yeni , ki toli Ayi dogu, kelima n ba tieni Ayi dogu n nuu nni." Josuwe den tandi wan muubi ya kpaanli, ki toli Ayi dociamu. ¹⁹ Wan duoni o nuu ya yognu, ya jak̇ɔnda n bi wuo yeni ń sɔdi ki ña, ki sani ki kua u dociamu nni, ki baa u. Bi den juu tontoni li dogu u mu. ²⁰ Ayi tɔtieba den gbagi ki sua ke i muñii ña bi dociamu nni, ki do poli po, bi ji den ki bani ban ba tɔgni naani ki ga bi yula. Kelima Israyeli tɔtieba yaaba n bi tiini yeni den lebdi ki tuogi bani yaaba n bi deli ba. ²¹ Josuwe yeni Israyeli yaaba ń diidi ki sua ke ya tɔtieba n bi wuo yeni kua ki baa u dogu, ke i muñii do poli po, ke bi lindi ki cebni Ayi yaaba, ki kpa bi jaba kuli. ²² Ya tɔtieba n bi kua ki baa u dociamu yeni den ñani ki togi Ayi jakɔnda. Lanwani ii, Israyeli tɔtieba den cebni ki lindi Ayi tɔtieba, bine ye liiga po, ke bine ye buanu po. Israyeli yaaba den kpa Ayi yaaba kaa sieni bá yendo, ke o pia miali; bá niyendo den ki fidi ki sani ki ciadi. ²³ Bi den cuo Ayi bado baba i, ke o fo, ki gedi yeni o Josuwe kani. ²⁴ Israyeli yaaba ń kpaa Ayi yaaba ki gbeni ya kuani n kuu yeni mi fanpienma yeni nni, ban den deli ki sedi naani yeni, ban li la ke bikuli bili yeni ban juodi ki pua yua yeni ki jugsiega, ke o mo bili, Israyeli yaaba kuli den lebdi ki kua Ayi dociamu nni. Bi den kpa ba yeni mu jugsiemu i. ²⁵ Yaaba n den kpe li daali, bi jaba yeni bi puoba kuli den pundi piiga n tuda lie, Ayi yaaba kuli. ²⁶ Josuwe den ki jiini o nuu yu ke o den duoni yeni li kpaanli yeni hali yeni wan ban la ke bi baa Ayi dogu kuli. ²⁷ Israyeli yaaba den taa ti yandi yeni ti tiafagkaadi, bi yula po piama po, nani O Diedo ń den bili Josuwe ya ñɔbonli yeni ²⁸ Josuwe den juu Ayi dogu, ki cedi ke u tua digbena hali yeni ya yogu n ki pia gbenma. Li dogu li bii bili digbenkuoma i hali yeni mɔla. ²⁹ O den cedi ke bi jɔni Ayi bado bu tibu po, ki sadi o, ke o juani hali yeni ku yenjuogu. U yienu ń den nagi baama i, ke o den cedi ke bi jɔndi o, ki kedi ki luni o li bilinguonli bulñɔcianbu kani. Lankani i ke bi den dogni o kuuma po li tantinli. Li tantinli bii bili likani hali yeni dinne. ³⁰ Josuwe den maa padbinbindli O Diedo Israyeli Tienu po Ebali juali po. ³¹ Nani O Diedo naaciemo Moyiisi ń den bili Israyeli yaaba ya ñɔbonli yeni, ke li cɔlni yaali n diani Moyiisi yikodi tili nni yeni: "Ya padbinbindli ke bi maa yeni ya tana n ki kpiedi, ban ki sii ya tana yeni kudi tiagu." O den padi a padjuukaana li binbindli po, O Diedo po, ki puni o bu paabu boncianla. ³² Likani, o den diani a binbindtana po Moyiisi yikodi maataana Israyeli yaaba nintuali. ³³ Israyeli yaaba kuli, bi yudanba, bu tɔtieba yudanba, ti buudi yudanba den see a ñɔmaatana kpagu kaanliedi kuli kani, salga yidkaaba yeni Lefi yaaba yaaba n bugi O Diedo nɔmaatana kpagu yeni ya canba n den ye bi siiga nni kuli nintuali, Bi niba bɔgdima den see Gerisimi juali po, ke bɔgdima mo seeEbali juali po. Bi den yadi mi yedŋanma Israyeli yaaba kuli po nani O Diedo naaciemo Moyiisi ń den tuodi ki bili ba ya ñɔbonli kpiama yeni. ³⁴ Lani ń pendi i, Josuwe den cogi ti yikodi tili kuli, mi yedŋanma yeni ti solindi kuli nani ban diani maama ti yikodi tili nni yeni. ³⁵ Lanbonli den ki ye Moyiisi yikodi ñɔmaama nni, ke Josuwe den ki cogi Israyeli nitaanli nintuali, li den taani yeni bi puoba, a bila yeni ya canba n ye bi siiga nni.