¹ Ama Israyeli yaaba ki cɔlni yeni payenli ya bona n bo dagdi ki lan bolini po. Karmi bijua, Acihan, Sabdi yaabili, Sera yaabilieli, ke bi tie Juda cugli nni yaaba, den taa ya bona n den dagdi ki ŋan bolini, ke O Diedo fiini o pabienli Israyeli yaaba po. ² Josuwe den sɔni bi niba ke bi ñani Jeriko, ki gedi Ayi, ya dogu n ki fagi yeni Beti Afen, ki ye Beteli puoli. O den yedi ba, "Gedi mani ki ban kpaagi u dogu ne." Lanwani ii, li niba den gedi ki ban kpaagi Ayi dogu. ³ Ban den guani Josuwe kani, bi den yedi o, "Da cedi bi tɔtieba kuli ń gedi ki ban baa Ayi dogu. Sɔni nani niba tuda lie bii tuda taa yeni, ban gedi ki woli Ayi. Da cedi pugdi bi niba boncianla a tuona fanma, kelima bi niba nan ki yabi." ⁴ Lanwani ii, tɔtieba nani tuda taa yeni n den gedi ki baan woli Ayi dogu. Ama bi den jie Ayi yaaba, ki lebdi ki sani. Ayi jakɔnda den deli Israyeli yaaba ki cili u dogu bilinguonli bulñɔna kani ki ban pundi hali Cihebare dogu nni, ki kpaa nani piitaa n bonbi luoba yeni, ke yaaba n sieni sani ki jiidi li juali. Israyeli yaaba den jie boncianla, ke bi papaali ñani ki ŋa ba. ⁶ Josuwe den padi o tialakaadi. Wani yeni Israyeli yudanba den wuli kutangungu bi yula po, ki labni tinga nni O Diedo ñɔmaatana nintuali, ki bii ki laabi hali yeni ku yenjuogu. ⁷ Josuwe den yedi, "Hain O Diedo Ti Yudaano, be n cedi ke a cedi ya buolu ne kuli puodi Jurden kpenu ki ti cua hali ne? A den ba tieni ti Amori yaaba nuu nni ban bolini ti yo oo? Ti den ya taa jagtɔli, kaa puodi u kpenu, ki ye kpenpuoli. ⁸ Ti Diedo, n na ji ba maadi be i, Israyeli yaaba nan lebdi ki sani bi yibalinba nintualiyeni ii? ⁹ Kelima Kanana yaaba yeni ya nibuoli n kuu ba kuli ba gbadi li maama. Bi ba taani ki lindi ki cebni ti, ki bolini ti, ki cedi ki tinga nni yaaba ń sundi ti buolu yeli. A ji ba tieni ledi i, a yeli ń kpiagi?" ¹⁰ O Diedo den yedi Josuwe, "Fii ki sedi! Li tieni ledi ke a laabi fanfabgu? ¹¹ Israyeli yaaba sɔni ti tuonbiadi. Bi kandi min den bili ba ya ñɔbonli po. Bi suni ya bona n den gagdi ki bili. Bi suni, ki wuoni bi tuonbiadi bona bi tiacedi nni. ¹² Lanyapo n cedi ke Israyeli yaaba kan fidi ki tuogi bi yibalinba. Bi pegdi ki waani bi yibalinba bi benbengu, kelima bi suni yaali bi dagdi ke lan bolini, bani mɔno dagdi ke ban bolini ba. N ji kan ya ye yeni yi hali yeni yin ba lingi ki ñani i tiadi nni yaali bi dagdi ke la bolini, ki nan ye i siiga nni, ki bolini la. ¹³ Fii ki sedi! Gagdi ki ŋanbi li nitaanli Npo, ŋan yedi ba 'Gagdi ki ŋanbi mani yi yula ki guudi saala. Kelima O Diedo, IsrayeliTienu yedi, "A bona ye i siiga, ki bi dagdi ke ŋan bolini, ki nan bii ki ye i tiadi nni, Israyeli. A kan fidi ki tuogi a yibalinba, kese ke a lingi ki ñani ya bona n bi dagdi bolinma, ki nan yen i siiga nni, ki bolini ŋa ¹⁴ Saala siŋaagu nni, i ba nagni O Diedo nintuali buolu buolu. O Diedo ya cuo ya buolu, ban nagni cugli cugli, O iedo ya cuo ya cugli, diegu diegu, O ya cuo ya diegu, ban nagni dansanu dansanu, O ya cuo ya dansanu, ban nagni yendo yendo. ¹⁵ Lan ba juodi maama n ne, bi ya cuo yua ke wani n kubi ya bona n bi dagdi bolinma o tiadi nni, bi ba juu o wani yeni wa pia yaali kuli, kelima o miidi O Diedo kuali, ki tieni cancagintuonli Israyeli yaaba siiga nni.'" ¹⁶ Lanwani ii, Josuwe den yagdi ki fii ke li dá biigi, ki cedi ke Israyeli yaaba nagdi buolu buolu, ke bi cuo Juda buolu. ¹⁷ Juda yaaba den nagni cugli cugli, ke li cuo Sara cugli. Ke Sera cugli yaaba nagni diegu diegu, ke li cuo SAbdi diegu. ¹⁸ Sabdi dansanu den nagni yendo yendo ke li cuo Karmi bijua Acihan, Sabdi yaabili, Sera yaabilieli, ke bi tie Juda buolu. ¹⁹ Josuwe den yedi Acihan, "N bijua, maadi O Diedo Israyeli Tienu nintuali i mɔni ki mia o a biidi sugli. N mia a sugli ŋan togdi nni ŋan tieni yaali. ŋan da wuoni nni libakuli." ²⁰ Acihan den jiini Josuwe ki yedi, " I mɔmɔni, n tieni O Diedo Israyeli Tienu po ti tuonbiadi. ²¹ Min tieni yaali n ne: Min den la ti tiafagkaadi nni kpalcianbu, ke bu ŋani hali boncianla, ki ñani Mesopotami po, ŋanjilfa den ye, dibala kobilie, ki wula cenmunli ye, ki ba pundi cilo bɔgdima kpiagu, n yama den kua li tiadi niinni, ke n taa ti. N gbiidi ki piini tikuli n jongu nni, ke ŋanjilfa ye ti tiipo." ²² Josuwe den sɔni a tonda, ke bi sani ki gedi o jongu nni ki la ya tiadi n wuo kuli, ki guani yeni ti. Bi den la li tiadi kuli o jongu nni, ke ŋanjilfa ye tiipo. ²³ Bi den la li tiadi kuli ku jongu siiga nni, ki guani yeni ti Josuwe Israyeli yaaba kuli kani. Bi den bili lankuli O Diedo nintuali. ²⁴ Josuwe yeni Israyeli yaaba den taa Aciha, Sera bijua, ki taa ŋanjilfa, bu kpalcianbu, yeni wula cenli, o bijaba, o bisaba, o nee, o yanbidi, o ŋunbi, o jongu yeni wan die yaali kuli, ki gedi yeni lankuli Akori jualɔngu kani. ²⁵ Ke Josuwe yedi, "Be n cedi ke a waani ti ya falaciamo ne? O Diedo mo ba waani a falaciamo dinne. Israyeli yaaba den lugdi o a tana. Ki tuadi ki lugdi yaaba n sieni a tana, ki juu likuli u muu. ²⁶ Bi den dogni opo ya tantinli n bii ki ye hali yani mɔlane. O diedo den jiini o pabienli. Lanyapo, hali yeni dinne, bi yii likani Akori jualɔngu.