¹ Jeriko bulñɔna kuli den luo i, kelima Israyeli yaaba tɔtieba po. Nilo den kan pendi ki kua, nilo den kan pendi ki ña. ² O Diedo den yedi Josuwe, "Diidi, N mubni Jeriko a nuu nni, U bado yeni u sejenba yaaba n bangi bu tɔbu tuona. ³ I ba cuoni ki lindi u dogu, bi tɔtieba kuli ń taani ki cuoni ki lindi u dogu. I ba tieni yeni hali dana luoba. ⁴ Salga yidkaaba lele baa kubi naatuna lele, ki ye liiga, ki piebi ke a ñɔmaatana kpagu ŋua ba. Li daaleleli daali, i ba cuoni ki lindi u dogu taalma lele, ke salga yidkaaleleda yeni li piebi a naatuna i. ⁵ Bi ba ti piebi a naatuna lan waagi, yeni i yigni. I ya gbadi lanya naatunli piebma ya yognu, bi niba kuli ń taani ki yigni paama, U dociamu bilnu ba baa ki mumudi, li yogu bi tɔtieba ń woli ba, yuakuli ń toli o nintuali ki ya caa sonsonli." ⁶ Lanwani ii, Josuwe den yini salga yidkaaba, ki yedi ba, "Bugi mani a ñɔmaatana kpagu, ki cedi salga yidkaaba lele ń taa a naatuna, ki ga O Diedo ñɔmaatana kpagu liiga ki ya piebi." ⁷ O den maadi li nitaanli, "Gedi mani ki ban cuoni ki lindi u dogciamu, yaaba n muubi ti tɔtiadi n ba ga O Diedo ñɔmaatana kpagu liiga." ⁸ Nani Josuwe ń den maadi o niba maama yeni, salga yidkaaba lele den taa naatuna lele O Diedo nintuali. Bi den cuoni ki piebi li naatuna i. A ñɔmaatana kpagu den ŋua ba. ⁹ Yaniba n den kubi ti tɔtiadi den ye ya Salga yidkaaba n piebi a naatuna, ama ya tɔtieba n sieni den ŋua yaaba n den cuoni ki piebi a naatuna puoli po i. ¹⁰ Ama Josuwe den waani bi niba kuli, ki yedi ba, "Yigni ń da tieni. Maama ń da ña i ñɔna nni hali yeni ya daali ke n ba yedi yi ke yin yigni, lanwani ii, i ba fidi ki yigni." ¹¹ Lanwani ii, o den cedi ke O Diedo ñɔmaatana kpagu cuoni ki lindi u dogciamu yenma li daali, ki guani ki kua bi jondi nni ki duan ku ñiagu. ¹² Josuwe den fandi ki fii siŋaapanpangu, ke salga yidkaaba bugi O Diedo ñɔmaatana kpagu. ¹³ Salga yidkaaba yaaba n den kubi a naatna yeni den ga O Diedo ñɔmaatana kpagu liiga ki cuoni ki piebi. Bi tɔtieba yaaba n den muubi ti tɔtiadi den ye bi liiga, ki cuoni, ke bi mo piebi a naatuna. Ama ya niba n sieni den ŋua bi puoli po, ke bi li piebi a naatuna i. ¹⁴ Bi den cuoni ki lindi u dociamu yenma, li daalieli, ki guani ki kua bi jondi nni. Bi den li tie yeni i hali dana luoba. ¹⁵ Li daaleleli daali i, ke bi den tuodi ki yagdi ki fii, ki cuoni ki lindi u dociamu nani ban yi tie maama yeni, ama, lanya daali, bi den cuoni ki lindi u dogo taalma lele i. Li daali i ke bi den cuoni ki lindi u dogu taalma lele. ¹⁶ Li daaleleli daali i, salga yidkaaba ǹ́ den piebi a naatuna ke li waagi, ke Josuwe den puogi li nitaanli, ki yedi ba, "Yigni mani! Kelima O Diedo mubni u dogu ne i nuu nni. ¹⁷ Li dogu yeni yaali n ye u niinni kuli dagdi O Diedo po ke lan mudi i. Li poconconli Rahaba baban dagdi yeni li miali, wani yeni o baa diegu yaaba kuli yeni yaaba n ye o diegu nni, kelima, o den wuoni tin den sɔni yaaba ke bankpaagi ki diidi u dogu ń bili maama yeni. ¹⁸ Ama yinba, yin fangi i yula yeni yin taa i yuli po, yaali bi dagdi ke lan bodi. Yaali n dagdi ke lan bodi kuli, yin da sii bá bonyenli li niinni. I ya sii bonli , i ba kuani ti jondi mi tudma nni, man cua yeni tu bolima. ¹⁹ ŋanjilfa, wula, ti kumɔndi tiadi yeni ti kubɔndi tiadi kuli gagdi ki tie O Diedo yaali i, likuli dagdi ke lan kua O Diedo ŋalmandiegu nni i." ²⁰ Ban li piebi a naatuna keli waagi, ke li nitaanli taani ki yigni, ke u dogu bilinguonli yigi, ki baa, ki mumudi, ke yuakuli yugi ki kua u dogu nni, ki caa sonsonli ki ba baa u dogu. ²¹ Bi den pua ki mudi u dogu, ki biidi yaali n ye u niinni kuli yeni mu jugsiemu; bi jaba, bi puoba, ku nipaangu yeni a nikpela, i nee, ti yanbidi, i ŋunbi." ²² Josuwe den yedi wan den sɔni yaaba ke ban kpaagi u dogu yeni, ki yedi ba, "Gedi mani li poconconli diegu nni. Yin ñani li pua yeni o kpiiba yaaba n ye o diegu nni kuli na, nani yin den poli ki niani o maama yeni." ²³ A tonda yeni den gedi ki guani yeni Rahaba yeni o kpiiba kuli. Bi den guani yeni o báa, o naá, o ninjaba, o ninsiaba yeni o kpiiba yaaba n den ye yeni o kuli. Bi den gedi yeni ba Israyeli yaaba jondi kunu. ²⁴ Bi den juu u dogu yeni yaali n ye u niinni kuli. Bi den ŋa ŋanjilfa, wula, ti kumɔndi yeni ti kubɔndi tiadi baba i, ki kuani O Diedo ŋalmandiegu nni. ²⁵ Ama Josuwe den cabi Rahaba, li poconconli, o báa, diegu nni yaaba kuli yeni li miali. Bi dá li ye li dogu nni hali yeni dinne, kelima bi den wuoni ban den sɔni yaaba ke ban kpaagi Jeriko dogu yeni. ²⁶ Josuwe den waani ba yeni ti solindi, ki yedi, " Sola yeni O Diedo ń ba la ya nilo ke o bua guani ki maa Jeriko ya dogu ne. Li tanpuuli yognu, o bijakpelo ba kpe, wan ba gbeni a bulñɔna ya daali, o bijuodga ba kpe." ²⁷ O Diedo den ye yeni Josuwe, ke o yeli kpiagdi yadi mi diema nni kiuli.