¹ Li nitaanli kuli ń puodi Jurden kpenu, ke O Diedo yedi Josuwe, ² "ŋan gandi Israyeli yaaba siiga piiga n niba lie, cugli kuli niyendo. ³ ŋan puogi ba ya tuonli ne, 'jiidi mani Jurden kpenu siiga nni, salga yidkaaba ń se naani tinkuonga yeni, ki ban yugdi tangbenga piiga a lie, ki duoni ki bili ŋa yin ba duani naani ku ñiagu ne.'" ⁴ Josuwe den yini ban gandi ya piiga n jaliedba Israyeli yaaba siiga nni, cugli kuli niyendo yeni. ⁵ Josuwe den yedi ba, "Guani ki jiidi mani Jurden kpenu siiga nni, salga yidkaaba ń bugi naani O Diedo, i Tienu ñɔmaatana kpagu yeni, yuakuli i siiga nni ń bugi o buapiadi po tanyenli, nani Israyeli buolu cuga ń dɔa maama yeni. ⁶ Li tana ba tua bontiadkaali i po li ya tie ke i bila ti buali yi dayenli, 'Ya tana ne mo ya niima nni tie be i? ⁷ Lanwani ii, i ba yedi ba, 'Jurden kpenu ñima den jia O Diedo ñɔmaatana kpagu nintuali. Kun den bua puodi Jurden kpenu, mi ñinpuubkaama den jia, ki sedi. Lanwani ii, ya tana ne tie bontiadkaali i Israyeli yaaba kuli po, hali ya yogu kuli.'" ⁸ Israyeli niba den tieni nani Josuwe ń den waani ba maama, bi den yugdi tana piiga a lie Jurden kpenu siiga nni, nani O Diedo ń den yeni Josuwe ke lan tieni maama yeni. Bi den gandi li tana ki cɔlni Israyeli yaaba cuga ń dɔa maama. Bi den bugi li tana ki duoni ki bili ŋa ban ba kali naani ki fuodi. ⁹ Josuwe mo den bili piiga n tana lie Jurden kpenu siiga, salga yidkaaba yaaba n bugi a ñɔmaatana kpagu ń den see naani yeni. Li tana li bili li kani hali yeni mɔla kuli. ¹⁰ Salga yidkaaba yaaba n den bugi a ñɔmaatana kpagu den li see jurden kpenu siiga nni, hali ke O Diedo ń́ den waani Josuwe ke wan cedi li nitaanli ń tieni yaali yeni ban tieni ki gbeni, nani Moyiisi ń den tuodi ki yedi Josuwe maama yeni. Li nitaanli den tieni tontoni, ki puodi Jurden kpenu. ¹¹ Li nitaanli ń den puodi ki gbeni, A ñ̃̃ɔmaatana kpagu yeni salga yidkaaba mo den puodi, ki ga li nitaanli liiga. ¹² Rubeni buolu yaaba, Gada buolu yaaba yeni Manase buolu yaaba, bɔgdima n den bobni tɔgoli, ki ga liiga ke Israyeli nitaanli ŋua, nani Moyiisi ń den tuodi ki waani ba maama. ¹³ Ya tɔtieba n den bobni yeni bi tɔtiadi, O Diedo nintuali den pundi tɔtieba tuda piina (40.000), ki ba pua bu tɔbu Jeriko baagu nni. ¹⁴ Lanya daali, O Diedo den kpiagi Josuwe yeli hali boncianla, ke bi den fangi o hali yeni o miali kuli, nani wan den kpiagi Moyiisi yeli maama yeni. ¹⁵ Lanwani ii, O Diedo den maadi yeni Josuwe, ¹⁶ "Maadi salga yidkaaba yaaba n bugi a ñɔmaatana kpagu yeni, ke ban puodi Jurden kpenu, ki do na." ¹⁷ Lanwani ii, Josuwe den maadi salga yidkaaba, "Puodi mani Jurden kpnu, ki do na ." ¹⁸ Salga yidkaaba yaaba n bugi O Diedo ñɔmaatana kpagu ń ñani Jurden kpenu siiga ki puodi ki doni, ke bi taana sii ki tinkuonga ya yognu, ke Jurden kpenu ñima guani ki sali, ki puubi ki yayadi, ki kua a bɔnjaana nni, nani man den tie maama dana na yaa pendi yeni. ¹⁹ Li nitaanli den puodi Jurden kpenu o cincinŋmaalo o danpiiga daali i. Bi den Gilgali dogu nni, Jeriko puoli. ²⁰ Josuwe den bili ban den tugi ya tana Jurden kpenu nni yeni Gilgali dogu nni. ²¹ O den yedi Israyeli nitaanli, "I puolŋuani ya ti buali bi danba ya dana n kpendi, 'Ya tana ne mo tie be i?' ²² Yin maadi i bila, 'Ne tie naani ke Israyeli yaaba den puodi Jurden kpenu yeni a taakuoma i.' ²³ O Diedo i Tienu den cedi ke Jurden kpenu fuadi ipo hali ke i puodi u, nani O Diedo i Tienu ń den tieni maama li mɔgmɔnli yeni, O den cedi ke mi ñincianma fuadi, ke ti puodi li mɔgli. ²⁴ Li teni yeni ke ki tinga nni nibuoli kuli ń bandi ke O Diedo nuu pia ti kpiagdi, ke imo baa pugi O Diedo i Tienu, ki fangi o hali ya yogu n ki pia gbenma."