¹ Josuwe den fii ke li siŋaapanpangu, ke bi ñani Sitimi, ki cuo li cenli. Bi den pundi Jurden kpenu kani, wani yeni Israyeli nitaanli; bi den kali likani waamu, ki fidi ki puodi. ² Lan tieni dana taa, ke bu tɔbu yudanba kua ti jondi nni, ki waani li nitaanli, ³ " I ya la ke Lefi salga yidkaaba tugi O Diedo ti Tienu ñɔmaatana kpagu, yin fii tin kaa naani ne, ki ya ŋua gu. ⁴ Nani yin dá ki kpeli ki tɔgni li sanu yeni, guni n ba waani yi yin ba tɔgni naani. Ya banli n ba paadi yinba yeni guni baa tie nani kilometri yenli yeni. Yin da nagni gu ka. ⁵ Jsuwe den waani li nitaanli, " Saala, yin gagdi ki ŋanbi i yula bonŋanla, kelima O Diedo won ba tieni yaalidgu bona i siiga nni." ⁶ Josuwe den yedi salga yidkaaba, "Taa mani O Diedo ñɔmaatana kpagu ki bugi, ki ga li nitaanli liiga." Lanwani ii, bi den yugdi a ñɔmaatana kpagu ki bugi, ki ga li nitaanli liiga. ⁷ O Diedo den yedi Josuwe, "Dinne n ba cedi ŋan tua nikpiaglo, Israyeli yaaba siigs nni. Bi ba bandi ke min den ye yeni Moyiisi maama yeni, N go baa ye yeni amo yeni i. ⁸ ŋan waani ya salga yidkaaba n bugi a ñɔmaatana kpagu, 'I ya pundi Jurden kpenu kani, yin sedi Jurden kpenkunu."' ⁹ Josuwe den maadi Israyeli nitaanli, "Nagni mani ne, ki cengi O Diedo, i Tienu maama. ¹⁰ Min ba tieni yaali yin bandi ke ya Tienu n fo ye i siiga nni, ki ba todi ki deli ki yaani ipo Kanana yaaba, Heta yaaba, Hefa yaaba, Perusi yaaba, Giligesa yaaba,Amola yaaba yeni Jibusi yaaba n ne. ¹¹ Diidi mani! Bi ba bugi ki tinga nni kuli Tienu ñɔmaakpagu, ki ga i liiga Jurden kpenu nni. ¹² Mɔla ŋan gandi jaba piiga n bilie, Israyeli nitaanli nni kuli, buolu kuli niyendo. ¹³ Salga yidkaaba yaaba n bugi O Diedo, ki tinga kuli Tienu ñɔmaakpagu taana ya sii Jurden kpenu ñima, Jurden kpenu ñima ba jia ki sedi, bá a ñima n ñani polu, ki puubi ki jii, ba sedi ki tua nani ñinguoli yeni." ¹⁴ Lanwani ii, li nitaanli ń paani ki bua puodi jurden kpenu, salga yidkaaba yaaba n tugi a ñɔmaatana kpagu den ga li nitaanli liiga. ¹⁵ Yaaba n bugi a ñɔmaatana kpagu ń li pundi Jurden kpenu kani, ke bi taana sii li ñima, li yogu den tie ku jetaagu jognu i, ke Jurden kpenu gbie ki yayadi ki puubi a bɔnjaana nni, ¹⁶ Ya ñima n ñani polu ki puubi ki jii den sedi nani guonli yeni hali fagma, kaa ji pubi, ki cili Adama dogu yu n kuu yeni Saritani dogu yeni yaama n jii mi ñincianyaama po den fuadi ki ŋa kuomu. Li nitaanli den den puodi taakuomi i, ki tuoli Jeriko. ¹⁷ Salga yidkaaba yaaba n den bugi O Diedo ñɔmaatana kpagu den see Jurden kpenu siiga nni i, yeni taakuoma, hali yeni Israyeli nitaanli ń ban puodi yeni a taakuoma ki gbeni.