¹ Israyeli yaaba ń de ye Sitimi, Nuni bijua Josuwe den yini jaba lie, ki sɔni ba ŋasiili nni, ke ban puodi ki gedi ki kpaagi, ki ga laabaali Jeriko diema po. Bi den fii, ki gedi ki pundi, ki kua ya poconconli ke bi yi Rahaba diegu nn, ki cani. ² Jeriko bado den gbadi ke bi niba ñani Israyeli ki cua u dogu nni, ki bua kpaagi ki ga laabaali u dogu ń dua maama. ³ Jeriko bado den sɔni ke bi maadi Rahaba, "Ñani ya niba n cani a deni yeni ki cua yeni ba na, kelima bi cua ki bua kpaagi ki ga laabaali ti dogu kuli ń dua maama i." ⁴ Ama o pua yeni den wuoni bi jaba yeni, ki jiini a tonda, "Mɔmɔni i, bi jaba cua n deni, ama mii bani ba ñani naani. ⁵ Bi fii ki ñani ke li dá biigi, ke u dogu bulñɔcianbu dá ki luoni. Mii bani ban gedi naani. I ya ŋɔdi tontoni, li ki kandi i ba naa ba." ⁶ Ama o den wuoni ba ku dɔngu polu, ban maani naani Leni baabi tiidi i yɔgi siiga nni i. ⁷ A tonda ń den ñani ki bua ŋɔdi ba, li sua ke bi luoni bu bulñɔcianbu o, bi den toli Jurden kpenu tiigu po, ki bua lingi ba. ⁸ Rahaba den doni ku dɔngu po, bi jaba yeni kani ke bi dá ki duani mɔno. ⁹ O den yedi ba, "N bani ke O Diedo puni yi ti diema, ke i buolu cuo ti ti jawaandi. U dogu nni yaaba kuli jigi cie, ke bi pala wadi, kelima ban jie i buolu po. ¹⁰ Ti gbadi ke yin den ñani Ejipti, O Diedo ń den cedi ke li mɔgmɔnli ñincianma ñuudi maama, ke i buolu puodi yeni i taakuomi. Ti go gbadi yin sɔni Jurden kpenpuoli badtieliedba, Siyɔn yeni Ogi ya tuonli, yin bolni bi dogi maama. ¹¹ Tin li gbadi lanya laabaali, ke ti yama yagi, ke ti jigi cie, hali papaali bakuli ji ki ye ti dogu nni, kelima O Diedo, i Tienu n tie tanpoli po yeni ki tinga kuli Tienu. ¹² Mɔlane, yin poli O Diedo po, ke i ba tiadi min tieni yi ya ŋanma yeni, i mo ba guani nni li ŋanma, ki juogi n baá diegu. ¹³ Teni mani ya maalma ke i ba tieni, ki faabi n baá, n naá, n ninjaba yeni n nisiaba yei ti diegu kuli yaaba , ki ñani ba mi kuuma fiali nni." ¹⁴ Bi jaba yeni den yedi Rahaba, "Li ya dagdi bá kuuma, ti ba kpe ipo! A ya ki dɔgdi ki waani tin cua yaali ya po, li ya tie ke O Diedo puni ti i diema, ti ba guani a a ŋanma, ki colni ti niani a yaali." ¹⁵ O pua yeni diegu den taabi yeni u dogu bilnu i, lanwani ii, o den baa baabu, ki cedi ke tɔgni li takobonli, ki jiidi u dogu puoli po. ¹⁶ O den maadi ba " gedi mani a juana nni, ki ban wuoni, lanyaaka a tonda yeni ba naa yi. Yin wuoni likani dana taa hali a tonda yeni ń ba lingi yi ki luo, ki guani, yin fidi ki paani i sanu. ¹⁷ Bi jaba yeni den yedi o, "Ti baa tiani tin poli ki niani a ya ñɔnianu, ki go cɔli u mo. ¹⁸ Ti ya kua u dogu nni, ŋan ba tieni yaali n ne, ŋan baa baabmɔnu, ki loli ŋan jiini ti ya takobonli ne kani, ki taani a báa, a naá, a ninjaba, a ninsiaba yeni a baadiegu yaaba kuli a diegu nni. ¹⁹ Yua n ñani a diegu nni, ke bi kpao, o sɔma ba wuli o yuli po, lani ki la tinba wani. Ama ti nuu ya tuuni ya nilo n ye a diegu nni, ke o kpe, o sɔma ba wuli ti yula po, tin tugi ti biidi. ²⁰ Ama a ya maadi tin cua yaali ya po, li ki tie tipo tiladi ke ti cɔlni tin pol ki niani ya ñɔnianu." ²¹ Rahaba den jiini, "N miadi ke yin maadi yaali ń tieni." O den cabi ba ke bi siedi. O den loli li takobonli kani u baabmɔnu. ²² Bi jaba yeni den ñani ki ban wuoni a juana nni dana taa, hali ke a tonda yeni lingi ki luo ba ki guani ki kpeni u dogu nni. ²³ Li jaliedba den jiidi li juali, ki taa bi sanu ki puodi u kpenu ki guani Nuni bijua Josuwe kani, ki togdi o yaali n tieni ba kuli. ²⁴ Bi den maadi Josuwe, "I mɔmɔi, O Diedo li puni ti lanya diema i. Li diema nni yaaba kuli yama ŋmadi, ke bi jigi cie, kelima tinba yapo."