¹ Mɔla, O Diedo naaciemo Moyiisi ń kpe, ke O Diedo maadi yeni Nuni bijua, Josuwe, Moyiisi naaciemo, ki yedi o, ² "N naaciemo Moyiisi kpe. Molane, ŋan yugdi ki duoni u gbiamu Jurdena kpenu po, ki puodi u, fini yeni li nitaanli, ki kua Min puni ba, bani Israyeli buolu ya diema nni. ³ N puni yi yin ba puodi ki ŋmaa ya tinga kuli po. N puni yi li diema nani min den poli ki niani Moyiisi maama yeni. ⁴ Ki cili ganu po, ki ya caa jienu po, i diema kpaa mi fanpienma, ki ya caa hali Liiban diema nni. Puoli po, mi ban pundi Efrati kpenciamu, Heta yaaba diema kuli, ki ban pundi ku Mediterane mɔgiciangu, nintuali po kuli baa tie i ya diema i. ⁵ Nilo bakuli kan fidi ki sedi a nunga po hali a miali yema. N baa ye yeni a nani min den ye yeni Moyiisi maama yeni i. N kan ñɔli a, N go kan siedi ki ŋa a. ⁶ ŋan paagi a yuli, ki go paagi a pali. A ba ba cedi u buolu ne ń diedi min den poli ki niani bi yaajanba ke N ba puni ba ya diema. ⁷ ŋan ya paa, ke a pali mo paa boncianla. ŋan fangi a yuli ki cɔlni min den bili Moyiisi ya ñɔmaama, ke o waani a yeni. ŋan da kpiadi mipo bá waamu, lani n tie ŋan pundi naani kuli yeni ŋan ba tieni yaali kuli ń cuoni a po bonŋanla. ⁸ ŋan ya tiani ki diidi, ki go wangi yikodi tili ne. ŋan ya cogi, ki kpaagi yienu yeni ñiagu kuli li tili, lani n tie ŋan bandi, ki go cɔlni ya maama n diani li niinni. Yeni, ŋan jagi ya tuona kuli ba cuoni bonŋanla , lan buali maama. ⁹ N ki tuodi ki waani a n ñɔbonli ii? ŋan paagi a gbanu, ki go paagi a pali! ŋan da jie libakuli. ŋan da wadi a pali. O Diedo, i Tienu ye yeni a ŋan ba gedi naani kuli." ¹⁰ Lanwani ii, Josuwe den puogi Israyeli yaaba yudanba, ¹¹ "Yin kua ti jondi nni, ki waani li nitaanli, 'Yin bobni mi sancenjiema i diedi po. Dana taa siiga, ti ba fii li cenli, ki puodi Jurden kpenu, ki gedi ki diedi O Diedo I Tienu ń puni ti ke tin diedi ya tinga."' ¹² Josuwe den maadi Rubeni buolu yaaba, Gada yaaba yeni Manase buolu yaaba, yaaba n tie u buolu kuli bɔgdima, ¹³ "Ya tiani mani O Diedo naaciemo Moyiisi ń den bili yi ya ñɔbonli, ki yedi yi, O Diedo, I Tienu puni yi mi fuodma, ki go puni yi ya diema ne.' ¹⁴ I puoba, i bila yeni i yandi kuli baa ye Moyiisi ń teni yi ya tinga Jurden kpenpuoli yeni nni i. Ama i tɔtieba ba taa bi tɔtiadi ki puodi ki gedi ki todi i kpiiba ban diedi bi tinmu. ¹⁵ hali O Diedo ń puni ba mi fuodma nani wan puni i mo yeni. Li buali ke bani mo ń gedi ki diedi O Diedo i Tienu ń puni ba ya diema i. Lani ya pendi, i ba guani ki kali ki diedi i mo ya diema, O Diedo naaciemo, Moyiisi ń den puni yi ya diema Jueden kpenpuoli puoli po yeni." ¹⁶ Ke bi guani ki jiini Josuwe, " ŋan puogi ti ya tuona kuli, ti ba tieni, ŋan go sɔni ti naani kuli, ti ba gedi. ¹⁷ Ti ba cɔlni a nani tin den cɔlni Moyiisi maama yeni. Ti miadi ke O Diedo a Tienu ń ya ye yeni a baba i, nani wan den ye yeni Moyiisi maama yeni. ¹⁸ Yua n fiini mi yiema kaa cɔlni a ñɔmaama kuli, ti ba kpa o i. Fini wani ń paagi a gbanu, ki go paagi a pali."