¹ Simeyɔn buolu yaaba n den tuani ki ga bi tinbiinu, ki bɔgdi bi cuga kuli, ban den tɔni tiatia ki gbeni. Bi diema den saagi Juda buolu yaaba diema siiga nni. ² Bi biinu dogi den tie, Beyerceba, Ceba, Moladha, ³ Hasari, Cihuwali,Balha, Esemi, ⁴ Elitoladi, Betihuli, yeni Hɔrmiha. ⁵ Simeyɔn buolu go den ga, Sikilagi, BetiMarkaboti, Hasari, Suciha, ⁶ Beti Labawoti, yeni Caruheni. Likuli den taani dociami piiga a taa, yeni a dogbila. ⁷ Bani n go den ga Ayini, Rimmoni, Etiheri, yeni Acihan. Lan taani dociami na yeni i dogbila. Ya dociami n den ye li gaanma nni , ki ban pundi hali Baalati Beyeri bii Ramha niganu po kuli den tie Simeyɔn buolu yaaba diema tinmu i, ke bi den ga ki bɔgdi yeni bi cuga. ⁹ Simeyɔn buolu yaaba diema den ye Juda buolu yaaba diema nni i, ama, li diema den yabdi Juda buolu yaaba po, lanyapo i, ke bi den jia li diema sinsiiga nni, ki teni Simeyɔn buolu yaaba. ¹⁰ Tiatia ń den gbeni ke ya buolu n den tua mi taama po, ki ga bi tinbiinu n den tie Sabulɔn buolu, bi den bɔgdi yeni bi cuga. Bi diema bianu den cili Saridi i. ¹¹ Bi diema den toli nintuali po i. ki gɔa Maralha po yeni, ki ban kpaa Dabbeceti; ki tandi ki ban pundi Jokneyami kpenu puoli. ¹² U bianu den ñani Saridi, ki gɔgdi ki toli puoli po ki ban tuoni Kisiloti Tabori bianu. U den ñani lankani, ki gedi Dabera, ki doni Jafiya. ¹³ U bianu den ñani lankani, ki toli pouli, ki gedi Gati Heferi, ki pendi ki pundi Etikasini; u den pendi likani, ki gedi Rimmoni, ki gɔgdi ki toli Neyiha po. ¹⁴ U bianu den gɔgdi ki toli niganu po ki gedi Hannatoni, ki ban kpaa Ifitahi Eli jualɔngu. ¹⁵ Li diema, ki taani yeni Kattati, Nahalali, Cimirɔn, Idala, yeni Betelhemi dociami. Likuli den taani piiga n dociami lie, yeni li dogbila. ¹⁶ Sabulɔn buolu yaaba tinbiinu biani n den yeni, li dociami yeni li dogbila kuli, ke bi ga ki bɔgdi yeni bi cuga. ¹⁷ Ban den gbeni tiatia, ke ya buolu n tua mi naama po ki ga bi tinbiinu n den tie Isakari buolu yaaba, bani yeni bi cuga. ¹⁸ Bi diema nni, Jesireyeli, Cesuloti, Cunemi, ¹⁹ Hafarayimi, Ciyoni yeni Anaharati. ²⁰ Dociantiami mo den ye, Rabbiti KiciyoniEbesi, ²¹ Remeti, Enganimi Enhadha yeni Betipaseri. ²² Bi diema bianu den pundi Tabori, Cahasuma yeni Beti Cemeci, ki ban kpaa Jorden kpenu. Likuli den taani piiga n dociami luoba yeni i dogbila. ²³ Isakari buolu tinbiinu n den yeni, yeni i dociami yeni li dogbila, ke bi den ga ki bɔgdi yeni bi buolu cuga. ²⁴ Tiatia puoli po, ya buolu n den tua imu po, ki ga bi tinbiinu den tie Aciheri buolu yaaba i, bani yeni bi buolu cuga kuli. ²⁵ Ya dociami n den ye bi diema nni n ne, Helkati, Hali, Beteni, Acicafi, ²⁶ Alameloci, Amadi, yeni Micihali. Nintuali po, u bianu den tandi ki pundi Karmeli yeni Cihori Libinati. ²⁷ U den gɔgdi ki toli puoli, ki gedi Beti Dagɔn, ki ban pundi hali Sebuluni, ki suagi Ifitaheli jualɔngu po, Betelmeki yeni Neyiyeli nijienu po. U den suagi ki gedi Kabuli nijienu po. ²⁸ U den suagi ki pundi Ebrɔn, Rehobi, Hammoni yeni Kanha hali yeni Sidoni dociamu. ²⁹ U bianu den gɔgdi ki lebdi Ramha ki toli Tiiri dociamu bilinguonli. U den gɔgdi ki gedi Hosiha, ki ban kpaa ku mɔgciangu, Acisibi tinfuali nni, ³⁰ Ummiha, Afeki, yeni Rehobi. Likuli den taani piilie n dociami lie yeni i dogbila. ³¹ Aciheri buolu yaaba ń den dini bi faali, ki ga ya tinbiinu, ki bɔgdi bi buolu cuga n yeni, i dociami yeni i dogbila kuli. ³² Ya buolu n den tua mi luobma po, ki ga bi tinfaali biinu den tie Nafitali buolu yaaba, bani yeni bi cuga. ³³ Bi diema bianu den cindi Helefi ki taa Owaki, ki ban gedi Sananimi, ki tandi ki gedi Adaminekebi yeni Jabneyeli, ki ban pundi Lakumi, ki gedi ki kpaa Jurden kpenu. ³⁴ U bianu den gɔgdi ki toli nintuali, Asinoti, Tobɔri, ki ban gedi hali Hukoki, ki pundi Sebuluni, u ganu po, ki tuoni Aciheri nintuali po, Juda puolino yeni Jurden kpenu. ³⁵ Ya dociami n den pia a bilinguona den tie, Sidimi, Seri, Hammati, Rakati, Cinereti, ³⁶ Adamha, Ramha, ³⁷ Kedeci, Edreyi, yeni Hasɔri. ³⁸ Ya dogi n de pugdi den tie Yirɔn,Migdale, Horemi, Beti Anati, yeni Beti Cemeci. Likuli den taani piiga n dociami yian yeni i dogbila. ³⁹ Nafitali buolu yaaba n den baa ya tinbiinu n yeni, ki bɔgdi bi buolu cuga, li dociami yeni li dogbila kuli. ⁴⁰ Ya buolu n den tua mi lelema po, tiatia puoli po, ki ga bi tinbiinu den tie Dani buolu, bani yeni bi buolu cuga. ⁴¹ Bi diema dogi den tie, Soriha, Ecitawoli, Iri Cemeci, ⁴² Calabini, Ayijalɔn yeni Itilahi. ⁴³ Ya dogi mo den pugdi n ne: Elɔn, Timina, Ekrɔn, ⁴⁴ Elitekehi, Gibetihɔn, Balati, ⁴⁵ Jehudi, Bene Beraki Gati Rimoni, ⁴⁶ Me Jarkɔn, yeni Rakɔni yeni ya tinfanma n lindi Japa dogu. ⁴⁷ Lan den bua paagi Dani buolu yaaba bi diema nni, bi den gedi ki woli Lecemi buolu dogu, ki paadi ba, ki kpaa bi niba yeni ki jugsiega, ki kali likani. Bi den lebdi li dogu yeli, ki taa bi yaaja yeli, ki puni likani, lani n tie Dani. ⁴⁸ Dani buolu yaaba tinbiinu n den yeni, ke bi den bɔgdi yeni bi buolu cuga, li dociami yeni li kuni po dogbila kuli. ⁴⁹ Israyeli yaaba ń den bɔgdi bi diema bi siiga nni, buolu buolu ki gbeni, bi den tiadi ki puni Nuni bijua Josuwe mo u tinbiinu. ⁵⁰ Nani O Diedo ń den bili ya ñɔbonli yeni, bi den teni o wan den mia ya dociami, yini n tie, Timnati, Sera, Efrayimi juali nni diema. O den guani ki maa li dociamu, ki kali li niinni. ⁵¹ Salga yidkaaba ciamo Eleyasari, Nuni bijua Josuwe yeni Israyeli buoli yudanba ń den kali Ciliho dogu nni, u kadkaanu gbandieli bulñɔbu kani, O Diedo nintuali, ki bɔgdi mi diema Israyeli buoli yeni bi cuga kuli siiga nni maama n yeni, ke buolu yeni cugli kuli ga u biini n yeni. Lanwani ii bi den bɔgdi mi diema ki gbeni.