¹ Lanwani ii, O Diedo den yedi Josuwe, ² " Maadi yeni Israyeli nitaanli, ki yedi ba, 'Gandi mani ya dogi n baa tie i wuonkaani, nani mi den tuodi ki waani Moyiisi maama yeni. ³ Yin tieni yeni, ke yua n kpaa nilo, ke laa tie o yanbuama ka, o ba fidi ki sani ki gedi ki wuoni li dogi nni. Lanya dogi baa tie wuonkaani, ke yua n lingi ke wan kpa o, ki tuu o naataano o kpimo panli ń da fidi ki nandi o. ⁴ Yua n kpa nilo, ke laa tie o yanbuama ka, o ba sani ki gedi li dogi nni, doyendu nni, ki sedi bu bulñɔbu kani, ki togdi bi yudanba nintuali, lan tieni maama, ke o sani ki bua wuoni li dogu nni. Lanwani ii, bi ba ga o, ki teni o u kaanu, wan kali bi siigs nni. ⁵ Li ya tie ke o kpiemo naataano ya ŋɔdi li dogu nni ki bua tuu li panli ki kpa li daano, li dogu nni yaaba kan tuo ki cabi u sanu, ban ñani li nilo ki teni o, kelima laa tie o yanbuama ka ke o kpa o, yibalma bakuli go den ki ye bi siiga nni. O baa ye li dogu nni hali yeni ya yogu ke ti buudi yudanba ba kali ki jia o buudi, lanyaaka yua n den tie salga yidkaaba ciamo ya kpe. lanwani ii, o ba fidi ki ña o wuonkaanu, ki guani wan den ye ya dogu nni, ki kpa o nilo yeni nni, ki kuni o denpo.'" ⁷ Lanwani ii, Israyeli yaaba den gandi Kedeci, Galile diema nni, Nefitali buolu juali dogu nni, Cecemi, Efrayimi buolu juana dogu nni, yeni Kiriyati Ariba bii Ebrɔn, Juda buolu juana dogu nni. ⁸ Jurden kpenjaali puodma po, bi den gandi Beseri, Rubeni buolu diema gbangbana po mi fanpienma nni, Ramoti Gileyadi, Gadi buolu diema nni yeni Golani, Bacani dogu nni, ki ye Manase buolu diema nni. ⁹ Ban den gandi ya dogi Israyeli niba yeni ya canba n ye bi siigs nni yeni po n yeni. Lanwani ii, yua kpaa nilo, ke laa tie o yanbuama po ka, o ba fidi ki sani ki wuoni li dogi nni, ki mia ti candandi. O kpiemo kpiilo kan kpa o, ki tuu li panli, hali yeni ban ba yini o nikpalo li nitaanli siiga ki jia ti buudi.