¹ Israyeli yaaba ń den paadi mi diema ki gbeni, li nitaanli kuli den taani Cihilɔn. Bi den kpaa likani U kadkaanu gbandieli. ² Li den sieni buoli lele, Israyeli nitaanli siiga, yaaba n dá ki baa tinbiinu. ³ Josuwe den yedi Israyeli yaaba, "I ba guudi hali yeni o laa yogu i, ki fidi ki gedi, ki kali O Diedo i yaajanba Tienu ń puni yi ya diema nni ii? ⁴ Yin gandi buolu kuli niba taa, n ba sɔni ba. Bi ba gedi ki ban kpaagi ki bandi mi diema ń bili maama i kaani kuli. Bi ba diani ki waani mu tinmu kuli yeni mu biani ń bili maama, ki guani yeni ban bobni maama na. ⁵ Bi ba bɔgdi mi diema kaani lele i. Juda buolu yaaba baa ye bi diema nni niganu po, ke Josefi yaabila mo ye bi ya diema nni nijienu po. ⁶ I ba diani ki paadi mi diema kaani lele i, ki guani yeni yin bobni maama min diidi. N ba jia yuakuli ya biinu nekanba i, O Diedo, ti Tienu nintuali. ⁷ Lefi buolu yaaba ki pia biinu i siiga, bi ya biinu tie O Diedo salga yidma yeni a pada i. Gadi, Rubeni yeni Manase buolu yaaba, bɔgdima den ga bi ya biinu Jurden kpenpuoli po o. O Diedo naaciemo Moyiisi n den teni ba bi ya biini." ⁸ Lanwani ii, ban den gandi ya jaba den bobni ki ba gedi Josuwe tondu. Josuwe den bili li ñɔbonli ki waani ba, ke ban diani ki waani li inmu ń bili maama, ki yedi ba, "Gedi mani ki ban diidi i kaani kuli, ki diani ki waani tinga kuli yeni kipo, yeni mun tietie maama, ki guani mani na. N ba tɔ tiatia Cihilo ne i, O Diedo nintuali, ki bɔgdi ikuli. ⁹ Li niba den gedi, ki ban waa, ki diidi diidi, ki diani tinga kuli yeni ki biani, diema kuli mipo mipo. Bi den guani Josuwe kani Cihilo nagli nni. ¹⁰ Josuwe den tɔni tiatia O Diedo nintuali Cihilo yeni. Josuwe den bɔgdi Israyeli yaaba li tinmu, ke buolu kuli ga u tinbiinu. ¹¹ Bi den tiatia, ke Benjamini buolu ga u biinu, ki bɔgdi cugli cugli. Bi diema den saagi Juda yaabila diema yeni Josefi yaabila diema siiga nni i. ¹² U jienu po, bi bianu den cili Jurden kpenu kani i. U den kogni Jeriko jienu po, ki ban kua li juali diema nintuali. Ki pendi ki kua Beti Afeni fanpinmaa nni. ¹³ U ganu po, u bianu den toli Lusi, bii Beteli. U den gedi ki jiidi Ataro Addari, ki balni li juali yaali n bili Beti Horɔn ganu po. ¹⁴ U bianu den pegdi likani, ki toli nintuali, ki guani ki toli ganu po, ki pɔndi ki kua Beti Horɔn, ki ban tuoni li juali. Li kpaali ji den juodi Kiriati Baali, bii Kiriati Jeyarimi, li dogu den tie Juda buolu yaaba dociamu i. Lankani i n ji den tie li kpaali po, nintuali po. ¹⁵ U ganu po u bianu den cili ki kagni Kiriati Jeyarimi. Li kpaali den ñani likani, ki gedi Efrɔn, ki pundi Nefitoya ñinbuna kani. ¹⁶ Li kpaali den jiidi ki tuogi li juali ki tuogi ya kpaali n ye Beni Hinomi jualɔngu, , kaa fagi yeni jienu po Rifayimi jualɔngu. U bianu den jiidi ki pundi Hinomi jualɔngu, Jebusi yaaba juabiga jienu po, ki pendi ki jiidi Eni Rogeli. ¹⁷ U biani den pegdi, ki toli jienu po, Eni Cemesi , ki ñani lankani, ki kogni Geliloti, ya dogu n buogi Adumimi. U den ñani likani, ki jiidi, ki pundi Rubeni bijua, Bohani tangu kani. ¹⁸ U den tɔgni ki balni Beti Araba ganu po, ki jiidi Araba. ¹⁹ U den kogni ki ñani Beti Hogla. li kpaali den ban juodi mi ñincianyaama kani i, Jurden kpenu ń kua mi niinni naani yeni.Niganu po kpaali nden yeni. ²⁰ Jurden kpenu den tie bianu i, puoli po. Benjamini buolu yaaba tinbiinu n den yeni, bi den bɔgdi ba cugli cugli, ki li cɔlni cugli kuli yeni li tinbianu ki ban ban cebi. ²¹ Mɔla, Benjamini buolu yaaba, ki taa cugli cugli, dogi den tie, Jeriko, Beti Hogla,Emeki Kesisi, ²² Beti Araba, Semarayimi, Beeli, ²³ Afimi, Para, Ofra, ²⁴ Kefari Ammoni, Ofini yeni Geba. Likuli den taani dogi piiga a lie yeni li dogbila. ²⁵ Ya dogi n den pugdi, Gibeyɔn, Ramha, Beyeroti, ²⁶ Misipa, Kefira, Mosiha, ²⁷ Rekemi, Irpeyeli, Tarala, ²⁸ Seliha, Hayelefi, Jebusi bii Jerusalema, Gibeya yeni Kiriyati. Likuli den taani dogi piiga a na yeni a dogbila. Benjamini buolu yeni bi cuga tinbiinu n den yeni.