¹ Josefi buolu ń den tɔni tiatia ki baa ya biinu , ya diema den cili Jurden kpenu Jeriko puoli po ñinbuna kani, ki tandi ki gedi mifanpienma nni, ki taa yeni ki ya caa hali Jeriko, ki pendi Beteli, li juali dogu. ² Lanwani ii, li diema den cili Beteli, ki gedi Lusi, ki tɔgni, ki balni Ataroti, Arcihi yaaba diema nni. ³ Nintuali po, mi den cili Jafileti buolu diema nni, ki gedi hali Loweri Beti Horɔn buolu diema nni, ki pendi ki pundi Geseri; ki ban kpaa yeni li mɔgcianli. ⁴ Josefi buolu lani n tie Manase yeni Efrayimi yaaba ń den baa bi biinu ki bɔgdi maama n ne. ⁵ Efrayimi buolu ń den baa bi diema ki bɔgdi bi cuga maama n ne: Bi tinbiinu bianu, puoli po den taa Ataroti Addari hali ki ban doni Beti Horɔn, ⁶ Mi den tandi ki gedi hali li mɔgcianli. Ki cili Micimetati jienu po, ki gɔgdi ki toli puoli Taanati Cihilho, ki kandi mi ñima, ki gedi hali Janowa. ⁷ Mi den ñani Janowa, ki jiidi ki toli Ataroti yeni Naarha, ki guani ki cebi Jeriko, ki kpaa Jurden kpenu. ⁸ Nintuali po mi den cili Taapua ki ban pundi Kanha kpenu, ki gedi ki kpaa li mɔgcianli. Efrayimi buolu yeni bi cuga biinu n den yeni, ⁹ ki taani Efrayimi buolu yeni bi cuga ń den gandi ya dociami ke i ye Manase buolu biinu nni bi go den pugni ba i dociami yeni a dogbila. ¹⁰ Be den ki fidi ki deli ki yaani Kanana yaaba, yaaba n kua Geseri, lanwani ii, hali yeni mɔla kuli, Kanana buolu taani ki kua yeni Efrayimi buolu i, ama bi cedi ke bi tuuni a tuonpaala i.