¹ Israyeli yaaba ń dini ya faali, ke li tie tinmu Kanaha diema nni n ne, Nuni bijua Josuwe yeni Israyeli buoli yudanba yeni bi cancannikpelba n den cabi salga yidka Elehasari, ke o bɔgdi ba. ² Bi den tɔni tiatia i, ki bɔgdi buoli yian yini buolu bɔgdima li tinmu, nani O Diedo ń den tuodi ki waani maama ke Moyiisi diani yeni. ³ Kelima Moyiisi den tuodi ki teni buoli lie yeni bɔgdima, ya tinmu n ye Jurden kpenpuoli po o, ama Lefi yaaba den ki ga faali. ⁴ Josefi yaabila ji den tie buoli lie i, Manase yeni Efrayima. Lefi buolu den ki ga faali ke li tie tinmu mi diema nni, ama, bi den baa ya tinmu n lindi i dociami, ban baa ye naani yeni bi yandi, yeni bi bonpiakaali. ⁵ Israyeli yaaba den tieni nani O Diedo ń den bili li ñɔbonli maama yeni, ki bɔgdi mi diema. ⁶ Lanwani ii, Juda buolu den cua ki kali Giligali, Josuwe kani. Jefunehi bijua Kalebi, ke o tie Kenesiti buolu yua, den yedi Josuwe, "A bani O Diedo ń den yedi o naaciemo Moyiisi ya maama, ke ti dá ye Kadecihi Barneya po, ke mi nua fini yeni mini ii. ⁷ N den pia bina piina i, ke O Diedo naaciemo Moyiisi sɔni nni, ke n ñani Kadeciha Barneya, ki gedi ki kpaagi mi diema. N den guani ki togdi o nani lan buali maama n pali nni. ⁸ Ama, n kpiiba yaaba n den yegi yeni nni yeni den togdi o bi pali nni maama yeni ti jawaandi. ⁹ Moyiisi den poli li daali, ki yedi, 'Li ki pia tama,ke a taali ń ŋmaa ya tinmu po kuli ba tua a faali diema fini yeni a puoliŋuani hali ya yognu kuli, kelima a cɔlni O Diedo N Tienu maama.' ¹⁰ Mɔla, diidi, O Diedo cedo ke n bii ki pia li miali nani wan den yedi maama, hali bina piina n yeni, hali wan yedi Moyiisi li maama Israyeli yaaba sancenli yogu, mi fanpienma nni yeni. Ji diidi mɔlane! N ji pia Piiniin n bina mu i. ¹¹ Hali yeni dinne, n go dá pia mi tuama nani Moyiisi ǹ den sɔni nni ke n gedi ki kpaagi mi diema maama yeni. N tuama dá ki lebdi, mi li tie nani man den tie maama, li ya tie bu tɔbu po yeni mi kpaagma cenli po kuli. ¹² Lanwani ii, ŋan ji teni nni O Diedo ń den niani nni li daali ya diema n ye li juali nni yeni. A den gbadi li daali ke Anakimi buolu n ye li diema nni, ke i diciami yeni a bilinguona ye li niinni. O Diedo ba fidi ki todi nni min deli ki yaani ba, nani wan den yedi maama yeni. ¹³ Lanwani ii, Josuwe den yadi mi yedŋanma o po, ki teni o Hebrɔn ke u tua Jefune bijua Kalebi ya biinu. ¹⁴ Hali landaali, Hebrɔn ji tua Jefune bijua Kalebi , ke o tie Kenesiti buolu yua ya biinu i, kelima o de dugi O Diedo Israyeli Tienu po. ¹⁵ Hebrɔn cincinyeli den tie Kiriati Arba i. (Arba den tie ya nikpiagli yeli den ñani li dogu nni i.) Lanwanii, mi diema ji den fuodi yeni bu tɔbu.