¹ Josuwe ji den ciandi boncianla, ke O Diedo yedi o, "A ciandi boncianla, ama mi diema boncianla go sieni, ke a ba paadi, ki diedi. ² Ya diema n sieni n ne: Filisiti yaaba diema yeni Gecihuri yaaba diema, ³ (ki cili Cihihɔri yu n ye Ejipti puoli po, ki ya caa ganu po, Ekurɔn banlu po, Lanya diema ti kanana yaaba diema i, Filisiti badtiemuuda n yeni, Gasa bado, Acihidodi yua, Acikeloni yua, Gati yua yeni Ekurɔn bado, Afita yaaba diema mo ye). ⁴ Kanana yaaba diema go ye nijienu po yeni Meyara yaama n tie Sidoni diema yeni Afeki yeni Amori yaaba buolu banlu. ⁵ Gebaliti diema, ki ya caa Liban puoli po, ki cili Baali Gadi, Hermoni juali jiidma, ki gedi Lebo Hamati. ⁶ Liban juana diema mo ye, ki taani Misirefoti, Mayimi, yeni Sidoni yaaba kuli. N ba deli ki yaani ba ki sua ke Israyeli tɔtieba pundi. Nani min den bili ya ñɔbonli yeni, tama ki ye ke lanya diema kan tua Israyeli yaaba faali. ⁷ ŋan taa li diema ki bɔgdi Israyeli buoli yian yii sieni yeni Manase buolu bɔgdima siiga." ⁸ Manase buolu bɔgdima, yeni Rubeni buolu yeni Gadi buolu den ga bi ya faali Jurden kpenpuoli po o. ⁹ Ki cili Aroweri yaama n ye Arnoni kpenjaali po, Jɔrji jualɔngu kani, ki taani ya diema n ye Medeba gbangbanli po yeni Diboni kuli; ¹⁰ Amori bado Sihɔn yua den diedi Heciibɔntinfanma kuli ki ban tuoni Amoni yaaba diema; ¹¹ Gileyadi yeni Gecihuriti diema nni, yeni Maakatiti, Hermoni juali nni kula, yeni Basihan ki ban gedi Selika; ¹² Ogi o badciamo yua n den diedi Acitaroti yeni Edreyi diema, Basihan kuli. Ya diema n den sieni ki tie Rifayima buolu yaama n yeni. Moyiisi den woli ba ki deli ki yaani ba. ¹³ Ama Israyeli yaaba den ki deli ki yaani Gecihuriti yeni Maakatiti yaaba. li dogliedi yaaba bii ye likani hali yeni mɔlane. ¹⁴ Lefi buolu baba i, ke Moyiisi den ki teni faali ke l tie diema. O diedo, Israyeli Tienu paabu yeni a padjuukaana n tie bi ya faali nani U Tienu ń den bili li ñɔbonli, ki yedi Moyiisi maama. ¹⁵ Moyiisi den bɔgdi Rubeni buolu li faali , cugli cugli i. ¹⁶ Bi diema den cili Arowe, ki gedi Arnoni kpenjaali po, yeni ya diema n ye u tialu siiga, yeni Medeba gbangbanli po. ¹⁷ Rubeni buolu go den g Hecebɔn diema yeni mi dogi yia n ye li gbangbanli po, Dibɔn, yeni Maboti Baali, yeni Beti Baalmeyɔn. ¹⁸ yeni Jahasi yeni Kedemoti, yeni Mefaati, ¹⁹ yeni Kiriyatayimi, yeni Sibima, yeni Sereticihaberi li juali tinga laagu nni. ²⁰ Rubeni buolu go denga Beti Pewɔri yeni Pisigati juali jiidma, Beti Jecihimoti, ²¹ Li gbangbanli dogi kuli yeni Amori badciamo Sihɔn, yua den kali Hecibɔn, Moyiisi ń den paadi ya badtieba yeni Median yaaba yeni, lani n tie, Efi, Rikemi, Suuri, Huuri, yeni Reba , Sihɔn badbijaba yaaba n den ye mi diema nni yeni diema. ²² Israyeli yaaba den kpa Beyɔri bijua Balaama mo yeni ki jugsiega, o den tie jaba i, ki ye ban den kpa yaaba siiga nni. 3 Nintuali po, Rubeni buolu diema bianu den tie Jurden kpenu i; li kpaali n yeni. Mani n den tie Rubeni buolu faali, ke bi den bɔgdi cugli kuli yeni li dogu yeni li dogbila. ²⁴ Moyiisi ń teni Gada buolu yaali n ne, ki bɔgdi ba cugli cugli: ²⁵ Bi diema den tie Jaseri, Gileyadi dociami kuli yeni Amoni diema bɔgdima, ki ban pundi Arowe yu n ye Raba puoli po, ²⁶ Ki cili Ecihebɔn, ki ban dagdi Ramati Misipa yeni Botonimi, ki taa Mahanayimi, ki ban kpaa Debiri diema nni. ²⁷ Jurden tialu nni mo, Moyiisi den teni ba Beti Harami, Beti Nimira, Sukɔti yeni Safoni yaama n den sieni Hecihebɔn bado Sihɔn dociamu nni, ke Jurden kpenu tie li kpaali, ki gedi Cinereti ñincianma tialu nni, ki gedi puoli Jurden kpenpuoli. ²⁸ Gadi buolu ya faali n den yeni, ke bi bɔgdi ba cugli cugli, li dociami yeni li dogbila kuli. ²⁹ Moyiisi den teni Manase buolu bɔgdima mo bi faali. Lani den tie Manase buolu bɔgdima ya faali i, ke li ŋua bi cuga ń dɔa maama. ³⁰ Bi diema den cili Mahanayimi, Bacihan kuli, Bacihan bado, Sihɔn diema kuli yeni Jayiri dociami kuli, dociami piitaa (30); ³¹ Gileyadi diema bɔgdima, Acitaroti, Edreyi (Bacihan bado Ogi dociamu). Bi den puni Manase bijua, Macihiri ya cugli i lanya diema. Bi den tie Macihiri nitaanli bɔgdima, ke bi bɔgdi diegu diegu. ³² Moyiisi ń den ye Mohabi tiali nni, Jurden kpenpuoli, Jeriko puoli po, ki bɔgdi ba ya faali n yeni. ³³ Moyiisi den ki teni Lefi yaaba faali. O Diedo, Israyeli Tienu n tie bi ya faali, nani wan den waani ba maama yeni.