¹ Hasɔri bado Jabini ń gbadi yaali n tieni kuli, ke o sɔni u tondu, ki teni Madɔni bado Jobabi, Cimirɔn bado yeni Acihafi bado. ² O go den sɔni u tondu, ki teni nijienu juana po dogi badtieba, yeni Jurden kpenu tialu nni dogi yeni Cinereti ñincianma gani po kunu dogi yeni ya dogi n ye ti baadi nni yeni Dori yeni nintuali juana nni dogi. ³ O go den sɔni u tondu ki teni puoli yeni nintuali Kanana yaaba, yeni Amola yaaba, yeni Heta, Perisa, Jebusa juana nni dogi, yeni Hefa yaaba, yaaba n ye Hermoni juali gumu, Misipa diema nni. ⁴ Bi den taani yeni bi tɔgola, ki yabi boncianla nani i kpentanbiini yeni. Bi den pia i taami yeni ti tɔturdi boncianla. ⁵ Li badtieba kuli den taani ki kadi yeni biyaba ban bili ya yognu, ki kpaa bi tɔnagli Meromi ñincianma kani, ki bua tuogi yeni Israyeli yaaba bu tɔbu. ⁶ O Diedo den yedi Josuwe, " Da jie ba, kelima ne yeni saala ya yognu ne, N ba taaba nani nikpiema yeni, ki tieni Israyeli yaaba nuu nni. ŋan jia ki kadi bi taami taagada jiina, ki juu bi tɔturdi." ⁷ Josuwe yeni o tɔgoli den pundi. Bi den ludi ki taani Meroni ñincianma kani, ki woli bi yibalinba. ⁸ O Diedo den taa yibalinba ki tieni Israyeli yaaba nuu nni, ki bi kpa ba yeni mu jugsiemu, ki ŋɔdi, ki deli ba hali Sidoni, Misirefoti Mayimi, yeni puoli, Misipati jualɔngu nni. Bi den kpa ba, kaa sieni ba niyendo yeni miali. ⁹ Josuwe den tieni ba nani O Diedo ń den waani o maama i. O den jia ki kadi bi taami taagada jiina, ki juu bi tɔturdi. ¹⁰ Josuwe den lebdi ki guani ki paadi Hasɔri dogu. O den kpa bi bado yeni ki jugsiega (Li gaanma nni Hasɔri n den tie dociamu n piati kpiagdi.) ¹¹ Bi den kpaa pia miali kuli li dogu nni, ki tieni ba yaaba n dagdi yeni mi bolima, lanwani ii, bonliba kuli den ki sieni li dogu nni, ki pia miali. O den juu Hasɔri dogu. ¹² Josuwe den paadi li badtieba dogi kuli. O go den cuo li badtieba, ki kpa ba yeni ki jugsiega. O den bolini cain, yeni ki jugsiega nani O Diedo naaciemo Moyiisi ń den bili ya ñɔbonli yeni. ¹³ Israyeli yaaba den ki juu ya dogciami ke bi den maa a juana po, kase Hasɔri baba, ke bi den juu. ¹⁴ Israyeli tɔtieba den taa li dogi tiafagkaadi kuli yeni li jiedi kuli ke ti tua bi diecedi. Bi den kpa bi niba yeni ki jugsiega, ki gbeni bikuli. Bi den ki sieni bá pia miali li dogi nni. ¹⁵ Nani O Diedo ń den bili Moyiisi ya ñɔbonli yeni, Moyiisi mo den bili Josuwe lanya ñɔbonli i, ke Josuwe cɔlni li, lan buali maama. O den tieni O Diedo ń den bili Moyiisi ya ñɔbonli kuli, kaa ŋa libakuli. ¹⁶ Josuwe den paadi lanya diema, li juali po dogi, yeni niganu po diema,Gociheni diema, u tialu po diema, Jurden tialu diema, Israyeli juali diema yeni ku baagu nni kuli. ¹⁷ Ki cili Halaki juali, Edomi kani, ki ya caa jienu po, ki ban gedi hali Baali Gadi, Liban jualɔngu nni yeni Hermoni juali tinga, o den cuo li badtieba kuli, ki kpa ba. ¹⁸ Josuwe ń den pua ya tɔbu yeni li badtieba kuli den waagi boncianla. ¹⁹ Bá dogyendu den ki loli yanduanma dɔnlgu yeni Israyeli yaaba, lan ñani Hefa yaaba, yaaba n ye Gabehɔn yaaka. Israyeli yaaba den paadi ya dogi n sieni yeni bu tɔbu i. ²⁰ Kelima O Diedo n den juagi bi pala, ke ban tuogi Israyeli yaaba ki pua bu tɔbu yeni ba, lani n tie, ban bolini ba cain, kaa jie bipo niñima, nani wan den bili Moyiisi ya ñɔbonli yeni. ²¹ Lan pendi, Josuwe den guani ki paadi Anakimi dogu. Li den tie a juana nni, Hebrɔn, Debiri, Anabi, yeni Juda juana nni dogi, yeni Israyeli juana nni kuli. Josuwe den bolini li dogi kuli. ²² Anakimi buolu ji den ki sieni Israyeli diema nni, lan ñani Gasa, Gati yeni Acidodi dogi nni yaaka. ²³ Lanwani ii, Josuwe den paadi mi diema kuli, nani O Diedo ń den waani Moyiisi maama yeni. Josuwe den teni li diema, ke mi tua Israyeli yaaba faali, buolu kuli yeni wun dagdi yeni yaama. Lanwani ii, Israyeli yaaba ji den fuodi yeni bu tɔbu mi diema nni.