¹ Hain, mani ke n yuli bi ba fidi ki bundi mi ñima, ke n ninbina bi tie ñinbunbuna i! Kelima, n bi sugni ke min buudi yieni yeni ñiagu, kelima ban kpaá ti kpiiba, Juda diema nni niba yaaba ya po. ² N ya bi ba baa bi sancenba wuonkaanu, mi fanpienma nni, n bi ba sani ki ŋa n diema nni niba, ki fagdi yeni ba! Kelima, bikuli tie conconma danba, janbi danba baba i! ³ O Diedo yedi ya maama ne, "Bi cuani bi landi, nani a dabana yeni, mi tofaama po, ama, li nan ki tie i mɔmɔni yeni bi yantugpiengu bi kpiiba po ka, ke bi baa u paalu, mi diema nni. Bi li ŋua biadma ń tuu biadma ya po i. Baa bani mini O Diedo." ⁴ Yuakuli ń fangi o yuli yeni o kuantalielo, oba kuli ń da dugi o naataano bá yendo po. Kelima, nikpiilo kuli tie janbi daano i, ke dɔnli kuli mo tie tingbangbaabo i. ⁵ Nilo kuli bɔndi o lielo i, baa maadi mɔni. Bi landi bua mi tofaama baba i. Bi cɔgni bi yula, ki tiendi ti tuonbiadi, ki tugi i tagli. ⁶ O Diedo yedi ya maama ne, "Jeremi, a kua ti tuonbiadi danba siiga nni i; bi ya ñani u naa tugmɔngu nni, bi baan kua tugmɔntɔgu nni, ki ña mi naa tofaama nni, ki ban kua mi naa liama nni; ki yiedi ke baa bani nni. ⁷ O Diedo, u paaciamu kuli daano yedi mine, "Diidi, n ba cedi ban nandi ba mi fantama nni, min biigi ba ki diidi ban pia ya mayuli. N buolu ń tieni yaali ne, n go ba fidi ki tieni be i, yeni ya nibuolu ne? ⁸ Bi landi sondi nani a penmɔla yeni; bi ba maadi yeni bi lielo mi yanduanma nni, ki nan bani bi pala nni ke bi pua o mi tofaama, ki dia o ku diagu i. Li bubuuli yeni i fanfabni yognu. ⁹ O Diedo yedi mine, "Lanya po, n kan fii ki sdi bipo oo, N kan tuu u naa nibuolu li panli ii? ¹⁰ N ba yiini i kuuyani, ki buudi ki figindi, ki mɔa i kuumoe, a juana po, bi ba yiini i kukuanyani ku yankpaamuagu po. Kelima bi juu likuli, ke nilo ji kan pɔndi lankani. Bi ji kan gbadi yankulu fuugu. Tanpoli po nuani yeni ti yandi kuli sani ki yaadi likani. ¹¹ Lanwani ii, n ba cedi Jerusalema ń tua diegbengu, i fuasangbanli wuonkaanu. N ba cedi Juda diema ń tua diegbengu, niba ń ki pɔa naani." ¹² O laa nilo n pia mi yanfuoma, ki ba cengi ya maama ne? O Diedo ba yaadi o ñɔbu ki maadi ŋma i, wan togdi ba, ban gbadi ii? Li tieni ledi i, ke mi diema mumudi, ki bodi nani ya fanpienma ke nilo ke nilo ji kan pɔndi mi niinni yeni ii? ¹³ O Diedo yedi, "Li tie, kelima, bi ŋa n yikodi ñɔmaama, min den bili ba yaama yeni, kelima, bi ji ki cengi n nialu, baa ŋɔdi min den waani ba ke ban ya ŋua maama yeni. ¹⁴ Kelima, bi ŋɔdi bi tujuagyema, yeni Baali buli, nani bi yaajanba ń den maani ba ya buli yeni. ¹⁵ Lanwani ii, O Diedo, u paaciamu kuli daano, Israyeli Tienu yedi ya maama ne, 'Diidi, N ba cedi ya nibuolu ne ń ŋmani ya tiidi n to, ki ñu ya ñima n pia ti lɔbdi. ¹⁶ Lani ya pendi, n yayadi ba i nilanbuoli siiga, bani yeni bi yaajanba ń den ki kpeli ki bani naakani. N ba sɔni a tɔgola yeni mu jugsiemu, ban ŋɔdi ki bolini ba cain.'" ¹⁷ O Diedo, u paaciamu kuli daano yedi ya maama ne, "Kpaagi mani yaali n tieni po: Yini mani ya puoba n bani i kuumoe; Cedi mani ban cua. Sɔni mani ki yini ya puoba n ba fidi ki buudi ki figindi, ki fabni, ban cua. ¹⁸ Cedi mani ban cua tonma, ki mɔa i kuumoe, ki yiini i kuuyani tipo, lani n tie tin buudi, ti nuni ń wuli ti ninsiidi, tin puubi nani mi ñima yeni ti kpiani po. ¹⁹ Kelima, li bubuuli yeni i figindi ñani Siyɔn po, ki kpendi, 'Diidi ban baa ti maama, ki mumudi likuli. Diidi tin dini i fee maama, kelima, ti sani ki ŋa mi diema ki sua ke bi mumudi ti diendi.' ²⁰ Lanwani ii, yinba bi puoba, yin cengi mani O Diedo maama, yin faama, i tuba ń gbadi o ñɔbu ń yaadi ki bili ya ñɔbonli. Lani ya pendi, yin yuandi ki bangi i bisiaba i kuumoe, yeni i kuuyani, ki bangi i kuantalieba denpuoba, i kuuŋanbiyani. ²¹ Kelima, mi kuuma tɔgni ti takobona, ki kua ti ti dieŋama nni. Mi kpa a bila niinpo, ki kpa bi nipaanba mu daamu nni. O Diedo bandma n tie mi yanfuomɔnma. ²² Fini Jeremi, ŋan waani ba, ban gbadi, mani n tie O Diedo ñɔbonli, 'Bi niba ba kpe, ki wudi i kuani nni, nani ti bugdi yeni; nani ban ban yendi ya dikala ki luni o diyendo puolpo yeni, obakuli nan kan gandi lanya dikala.'" ²³ O Diedo yedi mine, "O yanfodaano ń da selni o yuli, o yanfuoma po, O gbanmandaano mo ń da selni o yuli ,o gbamanu po. O ŋalmandaano ń da selni o yuli, o piama po. Yaaba n tama ke bi kua ku kɔnciagu ń fangi bi yula. ²⁴ Kelima, nilo ya selni o yuli bonli po, wan mangi o pali, kelima, o pia ya yanfuoma n cedi, ke o bani nni, ki bani ke mini n tie O Diedo. Kelima Mini n tie O Diedo, ki bua yaali n tiegi, li mɔmɔnsaali yeni yua tie mi ŋanma ki tinga nni." ²⁵ O Diedo yedi ya maama ne, "Diidi mani, u yogu kpendi, N ba dadi yaaba n yedi ke bi kua ti gbannandi kɔnciagu,ki naa lebdi bi pala tuba. ²⁶ N ba mɔndi n nuni Ejipti yaaba po, yeni Juda yaaba po, Edomi, yeni Amoni yaaba po, Mowabi yeni ya nibuoli n kogdi, ki kuogi bi langbiadi kuli. Kelima lanya nibuoli kuli ku kua kɔnciagu, bi tie Israyeli cuga niba, yaaba n ki pia yaaba n kua ku kɔnciagu yama i."