¹ "Lanyognu, O Diedo ń yedi ya maama n ne, bi ba piidi a kakula, ki ñani Juda badcianba yeni bi kpaaga kpaba, salga yidkaaba yeni bi sawalpuaba kpaba, yeni Jerusalema dogtieba kpaba. ² Bi ba ladi, ki deni li kpaba u yienu nni, o ŋmaalo nni yeni a ŋmaabila kuli nintuali; ban den bua yaaba, ki tuuni bipo, ki cuoni ki ŋua, ki pugi, ki kpiagdi yaaba ya yela yeni, bi kan wodi bi kpaba, bi go kan piini li kpaba mo. Li kpaba ba wudi mi tinfanma po i, ki kpandi, ki tua dulma. ³ Lanya nibuolbiadu siiga, yaaba n sani ki ciadi mi yebiadma janjanma nni yeni siiga, min yayadi yaaba i kaani kuli yeni, mi kuuma baa su bipo yeni li miali, bi yema nni; mani n tie O Diedo, u paaciamu kuli daano ñɔmaama. ⁴ Lanwani ii, ŋan yedi ba, 'O Diedo yedi ya maama ne: Yua n baa, ki yi fii ka aa? yua n bandi ke o tudi u sanu, ki yi ŋmagdi ki taa o sanu ka aa? ⁵ Be n nan cedi ke Jerusalema, ya nibuolu ne bii ki ye mi yenyiema nni ii? Bi tudi, ki taa i janbi sanu, ki naa bua ke bi lebdi bi pala, ki guani n kani. ⁶ N tieni suo, ki cengi ba, ama, obakuli ki maadi i mɔmɔni; obakuli ki miadi sugli o biadma po, obakuli naa buali, "N biidi be i?" Bi siiga nni, yuakuli caa wan bua naani i, nani ya tanjala n tiini bu tɔbu nni yeni. ⁷ Bá tanpoli po bonyugda, ciloonponba, i kpaajiemu, kudjaluaninba, bani bani ban tiendi yaali yeni ya yognu. Bi bani ban ba fii bi kaanu, ki yaadi ya yognu, ki ti guani ki kpeni ya yognu, ama n ya buolu ki bani O Diedo ñɔmaama ń bua yedi yaali. ⁸ I ba tieni ledi i, ki yedi, "Ti tie yanfodanba i, O Diedo yikodi ñɔmaaama ye yeni tinba i"? Mi tofaama po i, ke a tidianla fii, ki taa bi tofaama timuani, ki diani ki tudi. ⁹ Bi yanfodanba ba fiagi. Bi ye yeni jawaanciandi i, bi kɔni, ki paadi ba, ki cuo ba, ki yaadi yeni ba. Fangi mani i yula! Bi yie O Diedo ñɔmaama, bi yanfuoma nan ba pugni ba ti laa ñuadi i? Yaaba n pua mi tofaama. ¹⁰ Lanwani ii, n ba taa bi denpuoba, ki tieni nitianba nui nni, yaaba n diedi ba mo ń diedi bi kuani, kelima, ki cili yua n waa, ki cie ki ban dagdi yua n yabi ki cie, bikuli tie jejieda yaaba n ŋua i janbi yeni jodi ya jiema i! Ki cili o sawalpualo, ki ban dagdi salga yidka, bikuli tie jɔgindi yeni janbi danba i. ¹¹ Bi buu n buolu yaaba yeni u yualu, yeni mɔnkunninkpinli i, ki tua, " Mi yanduanma ye, mi yanduanma baba yo," ke yanduanma nan ki ye. ¹² Li bi dagdi i fee ń cuo ba yeni ban sɔni ya tuongunda ne po, ama, fee naa cuo ba; bi naa bani fee ń tie yaali! Lanya po i, ke bi ba kpe nani bi kpiiba yeni; min ba fii ki sedi bipo ya yognu, bi baa tuudi ki baali i, O Diedo n yedi yeni. U Tienu pali biidi ii, bi niba mɔko ya pala biidi. ¹³ N bani min ba tieni ba maama; O Diedo n yedi yeni; daamɔngu tiidi kan loni, kankanbu kan loni kankanli. Kelima, ti faadi kuli ba gbalgi, ki kuodi. Min den puni ba yaali yeni, n ba taa li yeni bani kuli ki tieni bi yibalinba nui nni. ¹⁴ Be nan cedi ke ti bii ki kaa nekanba? Taani mani; cedi mani tin sani ki gedi i gopaali po, yii n pia a bilinguona po, ti ban ba kpe lanpo i suo. Kelima O Diedo ti Tienu ba kpa ti nekanba. O ba cedi tin ñu ya ñima n pia ti lɔbdi, kelima, ti tieni ti tuonbiadi o nintuali. ¹⁵ Ti den daani mi yanduanma i, ama libakuli naa ye ne, ki ŋani tipo. Ti den guu mi paagma yognu i, ama ti jawaanciandi n sani ki cua, ki naa ti. ¹⁶ Ya gbia mani i taami dunli Daani diema po. A tanjapaala dunli cedi ke ki tinga digbi. Kelima bi ba cua ki di mi diema yeni ya piama n ye mi niinni kuli, bi ba di u dogu yeni yaaba n ye u niinni kuli. ¹⁷ Kelima, diidi mani, N ba sɔni i wee i siiga, ya waabiadi, ke yii pia i nɔgu. lanya wee n ba juni yi. O Diedo ń bili ya ñɔmaama n yeni.'" ¹⁸ Ti yanyagiciandi kubi nni, kaa pia gbenma, n pali kɔni boncianla. ¹⁹ Cengi mani! N buolu yaaba n yigni hali fagma ya diema nni! 'O Diedo ji ki ye Siyɔn yo oo? Bii, Siyɔn nni ji ki pia badciamo yo oo? Be n na cedi ke bi yagni n yama yeni bi bonnanana, yeni bi nilanba buli, yii n ki pia mayuli ii? ²⁰ U jetaagu gbeni, ku faawaagu pundi.Ama ti naa baa faabma. ²¹ Ti yanyagciandi kubi nni, kelima ti kpiiba, Juda buolu yaaba yanyagdi po. N mɔa i kuumoe, kelima ya yebiadma n baa bipo yapo. N ye yeni pabiidli i. ²² Tebgu ki ye Galaadi nni ii? Dogdo ki ye li dogu nni ii? Be nan cedi, ke bi da ki cili, ki ba tebi Juda buolu yaaba aa?