¹ O Diedo den maadi Jeremi ya maama ne, ² "Gedi ki sedi O Diedo gbandieli bulñɔbu kani, ki maadi ya maama ne! Yedi ba, 'Yinba Juda yaaba, cengi mani O Diedo ñɔbonli, Yinba Juda yaaba, yinba yaaba n kua ya bulñɔbu ne, ki gbaandi ki pugi O Diedo. ³ O Diedo, u paaciamu kuli daano, Israyeli Tienu yedi ya maama ne: ŋmagdi mani i sani, ki ya ya tiendi a tuadŋama, lani n tie, min cedi yin ya ye nekanba. ⁴ Yin da dugi mi tofaama po, ki ya bɔndi i yula, ki tua, "O Diedo gbandieli! O Diedo diegu! O Diedo diegu nne!" ⁵ Li ya tie ke i lebdi yeni i mɔmɔni, i tɔgu yeni i tuada; i ya tiendi bi niba kuli po nani lan buali maama, ⁶ i yaa janbidi o caano, ki di ki kpienbiga yeni li kpepuoli jodi, i yaa wulgi yaaba n ki pia tagliba kuli ya sɔma, nekanba, i yaa ŋua ki pugi nitianba buli, ki ba biani i yula fanma, ⁷ lanwani ii, N ba cedi yin ya ye nekanba, min den puni i yaajanba ya diema yeni nni hali ya yognu n ki pia gbenma. ⁸ Diidi mani! I bɔndi i yula yaali n ki pia fuoma, kaa pia todliba kuli po. ⁹ I dá li bii ki su, ki kpa m kuuma, kiconbi ii? I dá li bii ki polgi, ki gbaandi ki pugi o bulo Baali, ki tiini, ki ŋua ya buli ke yii den bani kuli ii? ¹⁰ Lanwani ii, i yi cua, ki sedi n nintuali, ya diegu ne niinni, ban yi n yeli ya diegu nni, ki yedi, "Ti baa mi faabima," ki nan kandi lankani ki ban ya tuuni ya tuongunda ne kuli ii? ¹¹ I bani ke ban taagi n yeli ya diegu nni n tie a suura yeni a concona wuonkaanu ipo oo? Ama, diidi mani, Mini n kpaagi ki sua ke li tie yeni. O Diedo ñɔmaama n yeni. ¹² 'Lanwani ii, yin gedi Silo po, min den gagdi ki ŋanbi ya kaanu, ki cedi ke n yeli ye likani hali mi cilma yeni, gedi mani ki diidi min sɔni li kaanu maama, kelima n buolu Israyeli yaaba biadma po. ¹³ Mini O Diedo ñɔbonli nne, nani yin kubi ya tuada ne, nani min maadi yeni yi yognu kuli, ke i naa cengi nni yeni, nani min yi yi yugnu kuli, ama ke i naa tuodi n yiini yeni. ¹⁴ Lanwani ii, min tieni Silo maama yeni, n go ba tieni yin dugi ya diegu po, ki taagi n yeli yeni, min puni yinba yeni i yaajanba ya kaanu ne mo yeni i. ¹⁵ Kelima, N ba deli ki yaani yi n nintuali, nani min den deli ki yaani i kpiiba, Efrayima puolŋuani maama yeni i.' ¹⁶ Fini mo, Jeremi, ŋan da jaandi ya nibuolu ne po, da kpaandi ki fabni bipo ke a bua juogi ba, ŋan da kua n kani ki jaandi ki mia todmaba kuli, bipo, da mia nni liba kuli bipo, kelima, n kan cengi a a miabu. ¹⁷ ŋaa nua ban tiendi yaali Juda dociami nni yeni Jerusalema sanjala po oo? ¹⁸ A bila kpaagi ti daadi, ke bi baanba congi u mu! Bi puoba to mi yoma, ki ba pua ti lalaadi, tanpoli pobado po, ki kpidi li ñincabli daama ya buli n sieni po, ke ban fiini n pabienli. ¹⁹ Bi li lingi ke ban bieni mini ya pali yo oo,? O Diedo ñɔmaama n yeni. Li ki naani ke bi tudi bi ya yula po ka aa, ke i fee n cuo ba aa? ²⁰ Lanya po i, ke n Diedo, O Diedo yedi mi naa maama, 'Diidi, N pabiencianli ba jiidi u naa kaanu po, u mu ba juu ki buodi u niba, u yandi, u tiidi, u kuani yeni u luana kuli, ki yegni yeni mi tinfanma. Ya mu n ba cuo, baa siagi, ki naa pia gbindima. ²¹ O Diedo, u paaciamu kuli daano, Israyeli Tienu yedi ya maama ne, 'Taa mani i padjuukaana, ki pugni i padfana nandi po, ki ŋmani mani. ²² Kelima, min den ñani i yaajanba Ejipti diema nni, mii den buali ba libakuli po. Mii den bili ba ñɔbonli padjuukaana yeni padfana po. ²³ Min den bili ba ya ñɔbonli n ne, "Ya cengi mani n maama, lani n tie, min ya tie i Tienu, ke imo tie N buolu. Lanwani ii, yin ya cuoni min waani yi ya sani po, lani n tie mi yema ń ya mani ipo." ²⁴ Ama, baa den cengi nni, baa den diadi bi tuba ke ban cengi n maama mo. Bi den ŋɔdi bi tujuaga yeni bi pali nii jɔgindi yanjagtuona, yeni mi biadma i, lani n den cedi ke bi guani puoli, ki naa suagi liiga. ²⁵ Hali min ñani i yaajanba Ejipti diema nni ya daali, ki ban pundi dinne, N sɔni ipo n naacenba, bi sawalpuaba, ya yognu kuli, ki naa cedi. ²⁶ Ama, ya nibuolu ne naa cengi n maama. Baa faami npo mɔko. Ama, bi juagi bi pala, ki tieni ya biadma n cie bi yaajanba yaama.' ²⁷ Lanwani ii, ŋan kpaandi ki waani ba ya maama ne, ama, bi nan kan cengi a maama. Kpaandi ki waani ba min yi ba yaali ya po, ama, bi nan kan jiini a libakuli. ²⁸ Yedi ba ke bi tie ya nibuolu n ki cengi O Diedo, bi Tienu maama, kaa go gaani o tundi. I mɔmɔni bodi bi ñɔna nni, ki ñani bi maama nni. ²⁹ Kuo mani yin den gagdi ki ŋanbi i yula, ki bili ya yudi yeni, ki ban lu. Gedi mani asala siiga, yeni a juaciama po, ki ban mɔa i kuumoe, kelima, O Diedo pabienciali po cedi ke o ñɔli, ki ŋa ya ni fiima buolu ne. ³⁰ Kelima Juda bijaba tieni mi biadma n nintuali, O Diedo ñɔbonli n yeni; bi kua yeni bi cancaginbona, yeni bi buli, ban taagi n yeli naakani, ki j ɔgni n diegu. ³¹ Bi bobni, ki ŋanbi Beni Hinoni jualɔngu nni, ban baa padi ki juugi bi bijaba yeni bi bisiaba naankani, i buli po, min den ki waani ba yaali, min den ki tia, ki taa ya yanjagli mɔko. ³² Mini O Diedo n yedi ya maama ne: Diidi mani, a dana kpendi, bi ji kan taa Tofeti yeli, ki buali li nikpali jualɔngu. Li ba kpandi, ki tua ki kakuluaga jualɔngu, ban baa piindi bi niba naani, dieli kan sieni, kelima u kaanu pɔdma po. ³³ Li niba tinkpiba ba tua jiema tanpoli nuani yeni ki tinga yandi po, niloba kuli kan ya ye likani, ki yagni bi yama. ³⁴ N ba cedi i pamanyani ń gbeni Juda dociami nni yeni Jerusalema sanjala po, i pocaayani mo ba gbeni o pocaano yeni o pocaano calo ñɔbu nni, kelima, ya pabɔnli yeni ya nifanu n ba pua mi diema po."