¹ Benjamina yaaba, sani mani ki ña Jerusalema nni, ki faabi mani i yula. Tekɔa dugu nni yaaba Piebi mani a naatuna. Fiini mani ki sieni li tuudicabli Beti Hakeremi dogu nni, kelima falaciamo yeni mi yebiadma ñani nijienu po, ki kpendi. ² Fini Siyɔn bisalo, Jerusalema, o poŋamo yua n sigdi o yuli, bi ba bolni a. ³ Bi ba pundi bi dogu nni nani a yankpaala yeni bi yankuli yeni; bi ba kpaa bi jondi, ki lindi u dogu, ki ba bobni bu tɔbu, ki tuogi yi; yuakuli lingi o kaanu, ki bobni o tɔgoli. ⁴ Bi tua "Fii mani, tin pua bu tɔbu ti buli po. Fii mani, tin baa u u yensiicocoligu. Ti yula ki mani, kelima u yienu ji peli mi baama, li ji ŋmani yenjuogu i. ⁵ Cedi mani tin tuogi ba ku ñiagu, ki bolini Jerusalema diecianŋama." ⁶ Kelima, O Diedo, u paaciamu kuli daano yedi nanda: Cua mani ti daadi, ki tiini ki deni, ki lindi Jerusalema bilinguona, yibalinba ń do, ki kua, ki baa u dogu. Li dogu n ba la fala, kelima, u niba ki pia pukuli, se ti jadi yeni ku tugtongu baba. ⁷ Nana caali nni ń kan luo ñinŋanma yeni, Jerusalema nni mo, n li cengi mi biadma yeni ku tugmɔngu laabaalo i; n nintuali i, ke bi wangi n niba fala, ki pua ki duolidi ba. ⁸ Jerusalema, tuo ki ga n tundi, lanyaaka, n ba buli a n nunga, ki sani ki ŋa ŋa, ki cedi ŋan tua diegbengu, nilo ń ki kua ya diema nni." ⁹ O Diedo, u paaciamu kuli daano yedi nanda, "Laa pia tama ke yibalinba kan guani ki liegi ya niba n sieni Jerusalema diema nni, nani ban liegi ku daamɔngu tiidi luana maama yeni. ¹⁰ N nan ba la ŋma i, ki maadi yeni o, wan tua n kasiedo, min maadi yeni ba, ban ga n tundi ii? Diidi, bi tuba ñali o, bi ji kan fidi ki cengi bonŋanla! Diidi! O Diedo yeli n bi ba ŋmagdi ba, ama lanya yeli n ji pia ba i fee, ki kpandi bipo ñuali bonli." ¹¹ Ama, O Diedo pabiencianli ji ye yeni nni. N ji kubi li ki cɔgi. O yedi nni, " Wuli li, ya bila n puagi a sanjala po, yeni bi nipaanba po. kelima bi ba cuo bi jaba yeni bi puoba; yeni yaaba n ciandi, ki podi kuli. ¹² Bi diena ba tua nitianba ya diena i, nitianba n ba diedi bi kuani yeni bi puoba kuli. Kelima, N ba duoni n nuu ki pua mi diema nni niba kuli; O Diedo ñɔmaama n yeni. ¹³ O Diedo yedi nanda: Ki cili yua waa ki cie, ki ban tuoni yua n yabi, ki cie, bikuli tie jiekoiendiila i, bi ye janbi baba ya po i. Ki cili o sawalpualo, ki ban tuoni o koopadciamo, bikuli li di jodi i. ¹⁴ Bi buu n niba tugtongu yeni bi cacagma maama yeni u yualu i, ki tua, 'Mi yanduanma ye, mi yanduanma ye,' ama ke yanduanma naa ye. ¹⁵ Ban den ŋua bi tuongunda ya yognu yeni, li den ki pundi i fee ń cuo ba aa? Ama, fee naa den cuo ba; baa den bani ban ba tieni maama ki dɔgdi bi tuonbiadi, ki lebdi bi pala! Lanya po i, ke n ya fii ki sedi bipo, bi baa ŋmadi ki baali yeni yaaba n baali, ki tuudi ki baali, O Diedo ñɔmaama n yeni. ¹⁶ O Diedo yedi nanda, "Fii mani, ki tɔgni i sani po, ki pundi a sakaditaana, ki buali u sankpelu po. Buali mani ki bandi u sanŋamu.' Tɔgni mani li sanŋamu po, ki baa mani i yula po mi fuodma. Ama bi guani ki jiini, 'Ti kan tɔgni li sanu.' ¹⁷ N lingi u dogu guudka, ke wan ya cengi li naatunli piebma. Ama, bi yedi, 'Ti kan cengi.' ¹⁸ Lanwani ii, yinba, bi dogtieba, cengi mani bonŋanla! Diidi mani, tua mani kasiedi, ki bandi lan ba juodi bi denpo maama. ¹⁹ Ki tinga, cengi bonŋanla! Diidi, N cedi ke mi yebiadma kpendi bi niba po, kelima bi tuadbiadi ya pani n yeni. Baa cengi n maama, baa go cɔlni n yikodi mo, ama, bi fali n ñɔmaama i." ²⁰ N ba tieni be i, yeni Seba ŋubli yeni u tulaale? Bii ya kpentiidi n pia u nuulmanu ki ñani hali fagma diema nni ii? I padjuukaana ji ki mani npo, i pada mo falgi npo. ²¹ Lanwani ii, O Diedo den yedi ya maama ne, 'Diidi, N bobindi ki ba bili a tantuudkaana ya nibuolu ne po. Bi baa tuudi ŋani i, ki baali, bani bibaanba yeni bi bijaba kuli. Bani bi mi diema yaaba, bi kuantalieba yeni bi dɔnlinba kuli mo ba bodi.' Yibali ñani nijienu po ki kpendi na. ²² O Diedo yedi nanda, 'Diidi mani, ya nibuolu n ñani nijienu diema po, ki kpendi. Kelima, nibuolciamu n ñani hali fagma diema po, hali u tinbianu po, ki fii, ki kpendi na. ²³ Bi baa kubi a dabana yeni a kpaana. Bi pia ku tugmɔngu yeni i ninkuomi. Bi yigni tie nani mi ñincianma fuugu yeni i, bi jagi i taami, ki sagni, ki cuoni nani niyendo yeni ja, bu tɔbu po, ki ba baa fini Siyɔn bisalo.'" ²⁴ Ti gbadi bi laabaalo. Ti gbanu wudi nani o pua gbaá, ki bua mali yeni. ²⁵ Da ña mani ki gedi i kuani nni, ki go da waa a sanjala po, kelima yibali jugsiega kagni ki lindi yi, ke i yanbani mo ye i kaani kuli. ²⁶ N buolu bisiaba, yie mani li pabɔnli ti adi totoni, ki duani, ki bindi, ki lebdi lebdi mi fantanpienma nni, ki mɔa i kuumoe boncianla, nani bijayenga baba kuuma ya pabiidli yeni. Yiini mani i kuuyani, kelima yibali yua ba bolni ti ba ludi i, ki baa ti. ²⁷ Jeremi, n bobni a ke a tie o bigdika nani yua n biigdi ti kudi yeni, lanwani ii, ŋan kpaagi, ki biigi n buolu sani. ²⁸ Bikuli tie yenyieda i, tingbangbaaba buolu, yaaba n gedi ki togdi nitianba ya yema. Bikuli juagi bi pala nani ti kumɔndi bii ti kubɔndi yeni i, ki kubi i janbi tuona. ²⁹ U mu tongi boncianla u maafanu nni, ki juu ku maafigdigu, ti nɔbindi mo juu ki buodi u maafanu nni. O maano biandi o yaama, ki duadi ŋanjilfa kuli, kelima jɔgindi nan kan ña. ³⁰ Bi tie ŋanjilfa jɔgindi i, ban fali yua, kelima O Diedo mo ba fali ba yeni i.