¹ " Waa mani, ki diidi Jerusalema sanjala po; lingi mani o dociami tinfanma kuli nni mo. Yin kpaagi ki diidi: I ya fidi ki la ja bii niloba kuli ke o tuada ŋani, ke o yema bua ya tiegi, lanwani ii, N ba mia Jerusalema po sugli. ² Bá bi ya poli, ki yedi, 'Hali O Diedo yua n fo yelo po,' bi polgi tofaama ñɔpoli i." ³ O Doedo, ŋan bua yaali ki tie i mɔmɔni kaa aa? A nan pua ba i, li nan ki yia ba. A bigni ke ŋan bolini ba, ama, bi nan ki ga a tundi. Bi juagi bi pala, ki cie tangu, kelima bi yie kaa tuo bi tuonbiadi, ki ba lebdi bi yama. ⁴ Lanwani ii, n den yedi, "Laa pia tama, baa tie yeni bi yama ka. Bi tie yanpiidanba i, kelima baa bani O Diedo sani, baa go bani bi Tienu yikodi mo. ⁵ N ba gedi ki la bi nigbenga i, ki waani ba U Tienu ñɔmaama, banwani ii, nan bani O Diedo sani, ki bani U Tienu yikodi." Ama, bikuli tie yenma i; bikuli miidi U Tienu yikodi, ki fidi bani yeni U Tienu ń den loli ya ŋantaado. ⁶ Lanya po i, ke o yangbanlo ba ña ku tiigu nni, ki kpa ba. I tiali nni fuasangbanlo ba cuo ba, ki tɔtɔdi ba. O naamuuno se ki taabi bi dociami bulñɔna kani, ki guu ba. Yua n bua ña kuli, kase wan cuo o, ki tɔtɔdi. Kelima bi tagli yabdi ki kandi. Bi yenyiema mo ki pia bianu. ⁷ Jerusalema, be ya po i, ke n ba mia opo sugli ii? A bijaba sani ki ŋa nni, ki polgi ya buli n ki tie tienu yeli po. N puni ba li diiguoli, ke bi fii, ki cili mi conconma, ki yi taani ki gedi ki kadi biyaba a poconcona diena nni. ⁸ Bi tie ya fuatanjala n dini ki guo i, yuakuli ŋua ki cuani o lielo denpua puoli po i. ⁹ O Doedo yedi: "Lanwani ii, n ji kan dadi ya nibuolu ne tuba aa, n kan tuu ya nibuolu ne po, li panli ii? ¹⁰ Ban do ki kua bi daamɔngu tiidi kuanu nni, ki pua ki mudi, ki biidi biidi. Ama yin da bolini bikuli. Yin ŋabi i beni, kelima lanya beni ki tie O Diedo yii ka. ¹¹ Kelima Israyeli yeni Juda janbi nni boncianla; Mini O Diedo ñɔbonli n yeni. Mi yenyiema ń ba cua yeni yaali. ¹² Bi pua mi tofaama O Diedo po, ki yedi, "O kan tieni ti libakuli; fala kan baa ti, koma mo kan baa ti, ki buali tɔbu. ¹³ Bi sawalpuaba ji wolni baba i, baa ji pia maamɔnma ki ba maadi, ban tua ke yaali n ba cua yeni, lan tieni bi yula po." ¹⁴ Lanwani ii, O Diedo, u paaciamu kuli daano yedi ya maama ne, "Nani yin yedi maama yeni, diidi mani, Mini n ne, N kuani n maama a ñɔbu nni. Li maama tie nani u mu yeni i, ke ya nibuolu ne tie nani daadi yeni! U mu ba di ki buadi ba. ¹⁵ Yinba Israyeli yaaba, fangi mani i yula! Mini O Diedo n yedi yi ya maama ne, Nibuolu ba ña hali fagma, ki cua ki kɔni ki paadi yi. Lanya nibuolu ye hali yognu kuli, buoli kpelu i! Li tie ya nibuolu ke yii bani bi maabuolu, i go kan gbadi ban maadi ya maama mo. ¹⁶ Bi luoli nni piemi kpa bi niba boncianla. Bi go tie jakɔnda i bikuli. ¹⁷ Lanwani ii, bi ba juu ki bolini i kpaangu, bi ba bolini i bijaba yeni i bisiaba, ki bolini i jiema mo. Bi ba di i yangbenga yeni i yanbidi kuli, ki di i daamɔngu tiidi yeni kankandi kpaangu kuli. Bi ba ŋɔdi ki naa yi yeni ki jugsiega i dociami yi pia a biliguona yeni nni, yin tama ke bi kan nandi yi naani yeni. ¹⁸ Bá li dana nni, n kan cedi ban bolini ikuli cain ka; Mini O Diedo n yedi lanya maama. ¹⁹ Yinba Israyeli yeni Juda yaaba ń tua, 'Be n cedi ke O Diedo ti Tienu tieni ti yaali ne kuli?' Lanwani ii, Jeremi, ŋan yedi ba, 'Nani yin sani ki ŋa O Diedo, ki tuuni bi nilanba buli po yeni, lanya po i ke i go ba sɔni bi nilanba po, ya diema nni n ki tie i docelu nni. ²⁰ ŋan waani Jokɔbo cugli nni yaaba, ya maama ne, ki cedi Juda mo ń gbadi li maama. Yedi ba, ²¹ 'Cengi mani ya maama ne, yinba ya yanluodanba n ki pia yama ne; yinba yaaba n pia i nuni, ki naa nua, ki pia a tuba, ki naa gbia. ²² I ki fangi O Diedo oo, i ki digibi o nintuali ii? O Diedo ñɔmaama n yeni. N bili i tanbiini i, mi ñincianma bianu, man ba fii ki dagdi naani, ki kan pendi lankani. Bá mi ñingola ya do, ki jii maama kuli, mi lengidi i, maa pia paalu; mi ñima kan kandi u bianu. a ñingola ya fii maama kuli, ki duni, mi ñima kan fidi ki pendi u bianu. ²³ Ama, ya nibuolu ne pali juagi boncianla. Bi yi fiini mi yenyiema i, ki sani ki yaadi. ²⁴ Kelima, bi naa tua bi pali nni, "Cedi mani tin fangi O Diedo, ti Tienu, wani yua puuni ti ki taaga, ki taakpiaga yeni ki taayuandkaaga, lan buali ya yognu, ki bili ya yognu n tie ku kpaangu yognu tipo." ²⁵ I tagli n cedi ke ke lanya bona kuli ji ki tiendi. I tuonbiadi n muni yi li bonŋana kuli. ²⁶ Kelima, n buolu yaaba siiga pia bi nibiadba. Bi gunbi nani yua n bua pibi mu nuanmu yeni; Bi diagi ti diadi, ki co bi niba. ²⁷ Bi diedi nni gbie yeni i janbi, yeni jodi piama i. Lanwani ii, bi tieni yeni i, ki wodi ŋalmani, ki gbieni bi deni, ki tua paatieba. ²⁸ Mi yemanma po cedi ke bi gbengi bonŋanla, ke bi gbanu ñilgi. Bi tieni ti tuonbiadi, ke li pendi i biani kuli. Baa kɔni ki ba ga talga bii kpienbiga. Bi tuona kuli cuoni bipo, lan buali maama, bake baa kuni i mɔmɔni, lan bi buali yaaba ya po. ²⁹ Li ki buali ke min dadi ya nibuolu ne tuba aa, li ki buali ke min tuu ya nibuolu ne po li panli ii? Mini O Diedo n maadi yeni. ³⁰ Mi diema nni ji yabdi ti tuadbiadi yeni a tuongunda. ³¹ Sawalpuaba pua tofaama sawali i, ke Salga yidkaaba mo gbaa yeni bi yuli po ŋamu baba i. N buolu yaaba mo yedi ke lani n tuo bipo, ama, li ji ba juodi ledi i?'"