¹ Israyeli, Mini O Diedo yedi a, a ya lebdi a tɔgu, li tie ke a bua guani n ya kani. A ñani a cancagindi buli kuli, ki fagni n nintuali, a ya ŋa a puapuagdi, ki guani ki dugi npo, ² A ya poli yeni ti dudugdi, i mɔmɔni, yeni mi teginma, ki yedi, 'O Diedo fo!' I nilanbuoli ba dugi a po, ki yedi ke bi baa lisedi O Diedo po i, lanwani ii, bi ba teni o ti kpiagdi." ³ Kelima, O Diedo yedi nilo kuli, Juda yeni Israyeli diema nni, ya maama ne: 'Kaagi mani i kuani, ki da buu, ki ŋɔlgi ti tutuudi yeni ti konkondi po. ⁴ Kua mani ku kɔnciagu, O Diedo po, lebdi mani i tuada, ki ŋuudi i pala, yinba Juda yeni Jerusalema yaaba, lanyaaka, n pabiencianli ba fii nani u mupienu yeni i, ki juu ki kabi yi maaama ke nilo kan fidi ki jundi, kelima i tuadbiadi ń gundi maama po. ⁵ Waani Juda yaaba li maama, ki cedi Jerusalema yaaba n gbadi bonŋanla. Yedi ba, "Piebi mani a naatuna mi diema nni." Kpaandi mani ki yedi, "Taani mani na, cedi mani tin sani ki gedi a binlinguona dociami po." ⁶ Caani mani mi maalima bonli, yaali n wangi Siyɔn sanu, sani mani ki gedi ki wuonilipo, ki baa mi faabma! Da se mani ka, kelima O Diedo cedi ke mi mi yebiadma janjanma ñani nijienu po, ki kpendi, li baa tie bolincianma i. ⁷ O yangbanlo ñani o wuonkaanu, ki tiini, ki kpendi, yua n bolindi i nibuoli bobni ki gbeni o. O ñani o deni, ki kpendi yeni li yubɔnli mi diema nni, O ba cedi i dociami ń kpandi, ki tua diegbendi, nisaalo ń kan kua naani. ⁸ Lanyapo, li buali ke yin yie ti pabɔntiadi, ki fabni, ki buudi i kumoe. Kelima, O Diedo pabiencianli dá ki kagdi i yula po. ⁹ O Diedo ń yedi ya maama n ne, 'Li janjanma ń ba fidi ya daali, o bado yeni o kpaaga jigi ba cie, ti jawaanciandi ba kua salga yidkaaba, ki yaalidga, yeni i jeje ba cuo bi sawalpuaba.'" ¹⁰ Lanwani ii, n den yedi, "Hain! O Diedo, N Diedo. Diidi, a bɔndi Jerusalema yaaba yeni ya nibuoli ne ki yedi ba, 'I ba baa mi yanduanma.' To mi janjanma n paa yeni ki jugsiega ki ba bolini bi miana yeni." ¹¹ Lanyognu, bi ba maadi Jerusalema yeni ya nibuoli ne, "Mi faatonma ñani mi fanpienma po, ki figi, ki kpendi, Jerusalema yeni o niba po, ama, maa tie ya faama n ba lendi mi bima ka. ¹² Ya faalu n paa ki cie ma, ki go pia ti jadi ba cua, O Diedo yeli po, lanyognu i ke n ba jia ba ti buudi, ki cuo ba. ¹³ Diidi mani, Li taafaalu n yini, ki figdi yeni li taawalgbandi yeni. O taami jalgi ki cie kapaciidi. Ti bia n yeni! kelima li ba bolini tikuli! ¹⁴ Jerusalema yaaba, ŋuudi mani i pala, ki fagdi yeni mi biadma, lani n tie yin baa mi faabma. Hali u laa yognu i, ke a ba waagi, ki dá kubi a yanjagbiadi, ti tuonbiadi po? ¹⁵ Kelima, u nialu ñani Daani diema po yeni laabaali, ya janjanma n kpendi yeni mi yebiadma mo ñani Efrayima juana po, ke ti gbia. ¹⁶ Tiadi mani i nibuali, ban ya bani, waani Jerusalema dogu niba ke a jakɔnda ñani hali banfagli, ki kpendi ki ba kɔni, ki paadi Juda dociami, ki baa yi. ¹⁷ Bi ba sedi ki lindi u dogu nani yaaba n guu u kuanu yeni i, kelima u niba fiini npo mi yenyiema; O Diedo ñɔmaama n yeni. ¹⁸ A tɔgbiigu yeni a tuadbiadi ń cua yeni apo ya janjanma n yeni. Ya pabɔnli n baa a yuli po ne, ba gbadi a boncianla, ki nandi a, ki kua hali a pali nni. ¹⁹ Hain, n pali! N pali kɔni! Ti yanyagdi cuo nni, ki kua hali n pali nni. N pali pua nani li bua ŋab yeni. N kan fidi ki juuni, ki ya ŋmini, kelima n gbia ke a naatuna piebi, ke bi tɔtieba mo kuudi. ²⁰ Janjanma ń tuu janjanma baba; Kelima mi diema kuli ji bili diegbendi baba i. Bi li cua yenma i, ki ludi ti, ki pua ki jugi ti diena, yeni ti jondi. ²¹ Hali yeni u laayognu i ke n baa bii ki nua ya tuudcabli ne? hali yeni u laa yognu i ke n baa bii ki cengi a naatuna piebma? ²² Kelima, n buolu yaaba yanluoma po, baa bani nni. Bi tie yanpiidanba buolu i, baa pia yama. Bi bani ti tuonbiadi tienma baba i, bi naa bani ban ba tieni mi ŋanma maama. ²³ N diidi mi diema tinfanma, ki sua ke maa ji pia nunga, pukuli ji ki ye mi niinni. Kelima, tanpoli po ji ki pia yenyenma. ²⁴ N diidi a juana, ki sua ke a bedi ki baali, ke a juabila mo digbi. ²⁵ N kpaagi, ki sua ke niloba kuli ji ki ye, ke tapoli po nuani mo sani ki yaadi. ²⁶ N diidi, ki sua, i tiidi kuani kuli ji bili fanpienma i, ke i dociami kuli ji bili diegbendi, O Diedo nintuali, kelima o pabiencianli po." ²⁷ O Diedo ń yedi ya maama n ne," Mi diema kuli ba kpadi ki tua diegbendi, ama, n kancedi ban mudi mikuli ka. ²⁸ Kelima lani n cedi ke mi diema ye yeni li pabɔnli, ke tanpoli mo biigi cinm. Kelima mi jagi yaali n yeni; N kan sudi puoli po, n kan lebdi pu mo. Bi nikpaba kua Siyɔn dogu nni. ²⁹ I dociami nni niba kuli sani ki yaadi, a tanjagla yeni a dabantuada kuudi po; bi sani ki kua ti tutuudi nni yeni ku muagu nni. U dogu nni yaaba kuli sani ki doni ti tantiadi po yeni ti tankuodi nni. Bi niba sani ki yaadi, ki ŋa dogkuomu, dogtielo ji ki ye dogu nni. ³⁰ Fini Jerusalema, ban pua ki jugi yua, a ji ba tieni ledi i? Mɔlane, bá a ya yie a tiaŋandi yaadi n mɔni colcoli, ki ŋanbi a yuli yeni i badlaani yeni wula tiadi, ki diani a nuni cilo, ki sigdi a yuli, a tieni lankuli fanma i, ja ji kan nagni a. A jakpaga ji fala i, hali ki ji lingi a kuuma mɔno. ³¹ N gbia li dunli, nani ya pua n gbaani ki bua mali ń duni maama yeni, i yanbani yeni i fanfanbni, nani ya madsiaga n dá bua mali o cincinbiga yeni, Siyɔn badbisaalo ya nialu i. O fuodi, ki jingi. O tandi o nui, ki yedi, ' N bia n yeni! N bonli pia mi niñima! N ji ye falaciamo nni, kelima bi nikpaba ne po.