¹ N ba buali yi ya buali ne, yin jiini nni, o ja ya ñani o denpua, ke o gedi ki kuni jatɔa, li pua go ba guani o jakpelo kani ii? Mi diema kan jɔgni boncianla aa? A ñani n kani nani ya poconconli n pia a jakpaga ke bi yabi yeni, ki go maali ŋan guani n kani ii? O Diedo ñɔmaama n yeni. ² Yaadi a nuni, ki diidi a juaciama yuli po, li go pia naani ke a ki jɔgni a yuli nani li poconconli yeni ii? A yi kaa i sankuni, ki guu a jakpaga nani ya sanjiaba n jia u sanu mi fanpienma nni yeni. A tieni a conconma yeni a biadma cancangintuada, ki jɔgni mi diema. ³ Lanya po i, ke n muni a ki taaga, ki taayuandikaaga mo nan kan nii. Ama, a juagi a nuni nani ya poconconli n n kpaagi ki dagi jaba kuli yeni, ki naa jie fee mo yeni. ⁴ Mɔla wani ii, a ji kpaandi ki tua, 'N báa, fini n den tie n bonwaama nni, n nidugika! ⁵ A pali ba be npo lan waagi ii? A ba fidi ki fiini a pabienli npo ke laa pia gbenma aa?' Diidi! ŋan ji maadi yeni nni maama n yeni, ama, ki nan tieni ya tuonbiadi kuli ke a jagi a pali nni!" ⁶ O Diedo den maadi yeni nni, o bado Josiasi bali yognu, ki yedi, "A la Israyeli, kan kali jadiegu ń sɔni ya tuonli ii? O puagi ki gedi a juaciama kuli po yeni ya tiidi n bundi kuli po, ki cagni o yuli nani li poconconli yeni. ⁷ N den yedi n yuli nni, 'O ya tieni lanya cancangindi kuli, ki gbeni, o ba guani n kani, ama, o naa guani. Bá o ninsalo Juda la lanya bona kuli. ⁸ Lanwani ii, bá yeni min ñani Israyeli, o conconma po, ki teni o o poñantili, o ninsalo, o conconlielo, Juda, o janbidaano mo ki jie li tuadbiigu, omo gedi ki cagni o yuli nani li poconconli yeni i. ⁹ O cancagintuada yaa n ki wuo yeni, jɔgni mi diema, o puagi ki conbi, ki pugi ti daadi yeni a tana kuli. ¹⁰ Lanwani ii, wan tieni lani ki gbeni, Juda,o ninsalo, o janbidaano den guani n kani, ama, yeni o pali kuli ka, kase tofaama baba; O Diedo ñɔmaama n yeni." ¹¹ Lanwani ii, O Diedo den yedi nni, "Israyeli, kan kali jadiegu den tiegi ki cie Juda o janbidaano! ¹² Gedi ki kpaandi ki waani nijienu po yaaba li maama, ki yedi ba, 'Israyeli, kan kali jadiegu, N ba dingi n pali apo, guani n kani; O Diedo ñɔmaama n yeni. N pali kan go waagi ki be apo yognu kuli. ¹³ ŋan tuo ki tugi a tagli, kelima a li fiini a yenyiema O Diedo, a Tienu po i; a yegi yeni bi canba ki gbaandi ya tiidi n bundi ñiali nni! Kelima ŋaa bua ŋan gbadi n maama! O Diedi ñɔmaama n yeni. ¹⁴ Guani n kani, kan kali jadiegu buolu! O Diedo ñɔbonli n yeni. Mini n tie a calo! N ba taa ŋa, cincinli, ŋan tua n dogcelu, mi liema, ŋan tua n diecelu, yeni, n ba gedi yeni a Siyɔn! ¹⁵ N ba lingi apo n pali po yankpaalo, ban ya kpaa yi yeni mi yanfuoma yeni mi buama. ¹⁶ Lanwani ii, i ya pɔli, ki gbieni mi diema ki loni ya luana n ŋani ya yognu, bi kan ya tua, " O Diedo ŋantaadi kpagu maama! Ku maama kan kua bi yula nni mɔno, bi kan tiadi ki buali kupo; bi kan go bobni bontɔgu mo.' ¹⁷ Lanyognu, bi baa yi Jerusalema, 'O Diedo badkalkaanu n yeni,' ya nibuoli n sieni kuli ba taani ki cua Jerusalema, O Diedo yeli po. Bi ji kan ŋɔdi pajuaga yeni nibiadba sanu. ¹⁸ Lanyognu, Juda cugli yeni Israyeli cugli ba taani ki ya ye. Bi ba taani ki tua min puni i yaajanba ya tinfaali nijienu po diema. ¹⁹ Mini wani den maali n yama nni, 'N bi sugni ke ŋan tua n bijaba siiga yua n tie liiga yua, min ba puni yua li tinfaali siiga, ya tinga n ŋanbi ki ŋani, ki cie ŋanduna nni tinmu kuli! N bi sugni ke min yedi a, 'Ya yi nni, "N báa".'N den sugni ke a kan go buli nni a nunga. ²⁰ Ama, nani ya pua n kan kali jadiegu, ki buadi o calo yeni, Alindi n puoli, Israyeli diedu yaaba; O Diedo ñɔbonli n yeni." ²¹ Bi gbia u nialu, ke u buudi ki fabni i tiali nni, Israyeli bila n buudi ki fabni! Kelima bi tudi u sani, ki sundi O Diedo bi Tienu po. ²² "Guani n kani, kan kali jadiegu buolu! N ba paagi yi yeni i ŋanwaama tɔgu!" Bi yedi, "Diidi, ti ji kpendi a kani i, kelima fini n tie O Diedo ti Tienu! ²³ Laa pia tama, ke tin gbia ya maama a juaciama yeni a juabila po kuli, tie tofaama i. Laa pia tama, ke O Diedo, ti Tienu n tie ti candanbaalo, yua n ba faabi Israyeli yaaba. ²⁴ Hali ti bonwaama nni, i fee bulo, Baali ŋɔdma dini, ki buoni ti yaajanba ń den la fala ki bobni ya piama kuli, bi yangbenga yeni bi yabbidi kuli, bi bijaba yeni bi bisiaba kuli! ²⁵ I fee n ba tua ti duankaanu. Mi yuanma mo n ba tua ti kpalpinkaabu, kelima ti tieni O Diedo, ti Tienu po, ti tuonbiadi! Tinba tiba yeni ti yaajanba, hali ti panma nni, hali yeni mɔla kuli, ti naa cengi O Diedo ti Tienu nialu maama!"