¹ O Diedo den teni nni o ñɔbonli, ki yedi, ² "Gedi ki ban kpaandi Jerusalema yaaba po ya maama ne, ban gbadi bonŋanla. Yedi ba, 'O Diedo maama n ne: N tiani ŋan den tie n cikpenga ki bua n maama, ki cɔlni min loli ya ŋantaado yeni yi , yeni payenli, ŋan den waani nni ŋan pia ya buama npo, ya yognu ke a den tie n cikpenga. ŋan den ŋua nni maama mi fanpienma nni, ya tinga nni, ke bonpiabu den ki ye. ³ Israyeli, den gagdi ki ŋua mini O Diedo baba i, a den tie n kpaangu kuli nni ya bonkpiala i! Yaaba n den dini li kpaangu bonkpiala kuli, den tugi i tagli; ke mi janjanma cua yeni mi yebiadma bipo, O Diedo ñɔmaama n yeni.'" ⁴ Cengi mani O Diedo maama, yinba Jakɔbo cugli yaaba, Israyeli diegu nni yaaba ń cengi O Diedo maama. ⁵ O Diedo den maadi ya maama ne, " I yaajanba den la be i, n kani ke li tie tagli, ke bi sani ki ŋa nni, kaa j ŋua nni? Be n cedi ke bi gedi ki ŋɔdi ya buli n ki pia fuoma, ki fanbi bi yula aa? ⁶ Bi naa yedi, 'O Diedo, yua n ñani ti Ejipti diema nni yeni ye le i? O Diedo yua n ciani ti ki cua yeni ti mi fanpienma nni, i tiali yeni ti buodi diema nni, ki tinkuonga yeni li biigli tinga nni, ya tinga nni ke nisaalmiali da ki pɔndi ki niinni ki buali ke wan kua yeni, ye le i? ⁷ N cua yeni yi i tiidi ń gbie naani, ki baa ya bonluana n ŋani, ki mua, ki go di ki tinga manu! Ama, yin pundi, i jɔgni n diema i, i cedi ke n faali diema kpandi, ki tua ti cancangindi bonli! ⁸ Salga yidkaaba ki buali, 'O Diedo ye le i? Ti buudi yudanba mo ki faami npo mɔno! Bi gobdikaaba tieni npo ti tuonbiadi. Bi sawalpuaba pua sawali o bulo Baali ya po i, ki ŋua ya buli n ki pia fuomaba kuli, bipo. ⁹ Lani n cedi ke n ba tuni yi i tagli. O Diedo ñɔmaama n yeni; li tagli baa ŋua i yaabila ya yaabila. ¹⁰ Puodi mani Kitimi kpenjaali, ki diidi. Sɔni mani a tonda ban gedi Kedari, ki ban diidi, yin kpaagi ki diidi i yema ne buolu ya ye lanpo mo. ¹¹ U laa nibuolu n ñɔli, ki ŋa bi buli, ke yii tie bi tienu? Ama, N buolu wani, sani ki ŋa yua n pia bipo mayuli, ki ŋɔdi ya buli n ki pia bipo fuomaba kuli. ¹² Tanpoli yaaba ń biidi bi pali kelima ya tuobuolu ne po! Digbi mani, ki kuodi, ti jawaanciandi po; O Diedo maama n yeni. ¹³ Kelima n buolu tieni npo ti tuonbiadi taalma lie i: Bi ŋa Mini yua n tie li miali ñima ñinbunli, ki gedi ki gbiidi, ki lugdi lugdi bi yula po ya buodi n kan fidi ki kubi ñima. ¹⁴ Li naani ke Israyeli yaaba tie yonbi, bii?Bi mali ba ti yonbdi nni yo oo? To, be n nan cedi ke bi fagi ba? ¹⁵ Ayangbanbila fii ki sedi bipo, ki duni. Bi mua ti jadi boncianla, ki kuani ti jawaanciandi mi diema nni. Bi pua ki mudi bi dociami kuli, ke bá dotielo ji ki kua li dogi nni. ¹⁶ Menfisi yeni Tapanesi yaaba mo ba kuo yi ti yonbyudi. ¹⁷ Yinba ka tieni i yula yeni ii, yin den sani ki ŋa O Diedo, i Tienu, wan den gobdi yi ya yognu u sanu nni yeni ka aa? ¹⁸ To, mɔlane, a lingi be i, Ejipti sanu po, a bua ban ñu u kpenciamu Nili ñima yo oo?A bua be i, Asiri sanu po, a bua ban ñu u kpenu Efrati ñima yo oo? ¹⁹ A biadma n nandi ki kaani a, a janbi n wangi a fala. Lanwani ii, ŋan diidi ki lia, lan gundi ki go to maama; ki ŋa Mini O Diedo a Tienu, kaa ji pia fangliba kuli npo. O Diedo, U paaciamu kuli daano ñɔmaama n yeni. ²⁰ Hali yogu, n den pua ki mudi a landli yaali n den kubi a tulu; ki cie ban den dagni a yeni ya baabi. Ama, a li yedi 'N bua min diedi n yuli i!' ŋan gbaandi ki pugi a juaciama kuli po, yeni ya tibu n bundi kuli ñiali nni yeni, a conbi n yeni. ²¹ N den ŋuu ŋa, ke a tie ku daamɔngu tiidi yia ŋani bonciala, ya daama n ŋani, ki mɔni boncianla po i. A tieni ledi i, ki lebdi, ki kpandi tiilanbu n luoni luanbedma aa? ²² Kelima a ya bua ŋan wuli yeni ya ciebu ŋani u kenu nni, a tagli baa li ŋua ŋa, n nintuali i; O Diedo, n Diedo ñɔmaama n yeni. ²³ A ba ga ledi i, ki yedi, 'Mii pia biidiba kuli! Mii kpeli ki ŋɔdi o bulo Baali sanu uu? Diidi a taaŋmaadi, ŋan tieni yaali ti julɔndi nni! Tuo ŋan tieni yaali, fini ki yuoyuoñuaga, yaaga n kpaagi ki puagi, ki lindi i kaani kuli ne, ²⁴ ya fuaŋuñuaga n maani mi fanpienma ki buadi ti cagindi gaani u faalu i! Ki ya pudi kuli, laa ji pia kipo fidma Ya ŋunjala n bua ga kuli, kan lingi ga lan waagi, ki ya pudi kuli kase ban la ga. ²⁵ Mɔndi ki da cuoni taabima, ki da cedi o ñuñuunu ń kuodi a nialu! Ama, a yedi, 'Lebdimaba kuli ji ki ye! Kelima n buadi bi canba ya yegnu i, ki ŋua ba!' ²⁶ Nani ban yi ludi, ki pibi o suuro, i fee ń cuo maama yeni, Israyeli cugli ye yeni lanya fee i; bani yeni bi badtieba, bi babijaba, bi salga yidkaaba yeni bi sawalpuaba kuli! ²⁷ Bani n yi yedi ku daagu, 'Fini n tie n báa,' ki yedi li tanli mo, 'Fini n mali nni.' Kelima, bi buli nni bi nunga, ki teni nni bi punkpaali, ki naa nua nni. Ama, bi ya ye yebiadma nni ya yognu, bi yi yedi, 'Fii ki faabi ti!' ²⁸ Yin tagi ya buli kuli yeni ye le i? Mia mani yin fii ki faabi yi, yin ye ya yognu mi yebiadma nni, kelima, Juda, a dociami ń dɔa maama, a buli mo dɔa yeni i! ²⁹ Lanwani ii, be yapo i, ke i tungi nni i tagli ii? Ikuli fii n po yeni n yenyiema; O Diedo nɔmaama n yeni. ³⁰ N dia i bijaba tuba fanfanma i, bi naa gaani tundi. I kpaa i sawalpuaba nani ya yangbanlo n bolini yeni! ³¹ Yinba ya nifiima ne yaaba! Kpaagi mani U Tienu, O Diedo maama po! N ji tua fanpienma i Israyeli yaaba po oo? Bii n tua bɔnbɔnbiigli i, ipo oo? Be ya po i, ke n buolu yaaba ba yedi, 'Ti yeni ti yula i, cedi ti, tin ya puagi, ti ji kan guani a kani ii? ³² O jafaano ba fidi ki sundi o badlaani po oo, bii, Ki cikpenga ba sundi o canyiedi po oo? Ama Mini ya buolu yaaba wani ii, sundi npo, hali ya dana n ki pia bianu! ³³ A bani ŋan ba tɔgni ya sanu ki lingi mi buama. A cedi ke a tɔgbiigu guani yeni a mi conconbiadma po i. ³⁴ Talginba yeni a luoda sɔma ŋudi, ki talni a tiayiekaadi. Ama a nanki ludi, ki pibi li niba, ke bi gbaa ke ban pua ki luodi a dieli ka. ³⁵ Ama, yeni lani kuli, a nan yedi, 'Mii pia tagliba kuli; laa pia tama ke o pabienli kan pegdi ki teli potɔgu po.' Ama, ŋan diidi! N ba jia ti buudi yeni an ki cuo ŋa, kelima, a yedi, 'N naa tieni tuonbiadi.' ³⁶ Be n cedi ke a tieni yaali ne kuli ki bua lebdi u sanu, ke laa maai a libakuli? Ejipti diema nni yaaba ba janbi ŋa, nani Asiiri yaaba ń janbi ŋa maama yeni i. ³⁷ Lankani mo, bi ba deli ki ñani ŋa, ŋan tugi a nui a yuli po i, kelima, O Diedo den deli ki ñani a ŋan dugi yaaba ya po yeni kani, a kan baa todmaba kuli bikanimo."