¹ Israyeli yaaba, cengi mani O Diedo ń pia ya maama ki ba waani yi. ² O Diedo maadi ya maama ne, 'Da togdi mani i nilanbuoli tuada yeni bi yema, Yin da cedi mani ya yaalidgu bona n tiendi tanpoli ne ń jieni yi, kelima, i nilanbuoli n jie lanya bona. ³ Lanya nibuoli bogda ki pia fuomaba kuli. Bi yi cua tibu i, li fuali nni, ki cedi o kpiekpiedo ń kpiedi bu. ⁴ Bi yi baa ŋanjilfa yeni wula, ki bobni ban kpiedi ya daagu yeni. Bi yi ba a kpakpaana yeni hama, ki kpaa ku daakpiedkaagu yeni, maama ke ku kan begi. ⁵ Ban tagi yaali yeni bi nuu tie nani li bonfandikaali yeni, laa maadi, bi nan yaa tugi la yaaka, bi ki cuoni. Da jie mani lanya bona, li buni kan fidi ki tieni yi bonbiadli ii, i go kan fidi ki ŋanbi libakuli mo.'" ⁶ O Diedo, libakuli ki ye li ŋandunli nni, ki naani yeni a. A yabi boncianla, ke a yeli ye yeni ti kpiagdi yeni u paaciamu. ⁷ ŋma n ki fangi a, fini yua n tie i nibuoli kuli ya bado oo? kelima fini n dagdi yeni li fangli, kelima, obakuli ki ye, ki tie nani fini yeni, ŋanduna nni yanfodanba kuli siiga yeni mi diema kuli siiga, ki ba niagi yeni a. ⁸ Bikuli tie yenma i, yanpiidanba yeni yanluodanba, bi ŋua ki pugi i buli, yii n ki pia mayuli, ki tie daadi baba. ⁹ Bi ñangi ŋanjilfa Tarisi dogu nni, ki ñangi wula mo, Ufasi dogu nni, ya maano n pia mi tuonsɔnbanma n yi sɔni yeni li wula yeni li ŋanjilfa bonŋanla, Bi yi yuandi ki lani li buli yeni ya tiadi n mɔni colcoli, ki ŋmadi yeni ya tiadi n mɔni, ki tuudi. Lankuli li tie a tuonsɔnbanda ya tuonli n yeni. ¹⁰ Ama O Diedo wani tie U Tienu i mɔmɔni. Wani n tie ya Tienu n fo, ke o yema yeni o bali kuli ki pia juodma. O pabineli yognu, ki tinga yi digbi i, i nilanbuoli kan fidi ki sedi o nintuali, o pabienli yognu. ¹¹ Yin maadi yeni ba maama ne, "Ya buli n ki tagi tanpoli yeni ki tinga ba bodi cain, ŋanduna nni." ¹² Ama, yua n tagi ki tinga, o paaciamu po, ki tagi ŋanduna, o yanfuoma po, wani n tandi ti talwadi yeni o o yanfuoma yeni o bancianma. ¹³ O yi yedi maayenma, mi ñima n sani ki taani ti talwadi nni, ki cedi u faalu ń fii, u tinbianu po, ki do ti talwadi nni. Wani n tagi i taañigdi ń tieni, ki taaga ń ña u taayinbɔnu nni, ki nii, ki ñani u faalu, wun wuo naana. ¹⁴ Yuakuli yi tie nani yanpiidaano yeni, ki ye mi yanbɔnma nni, kaa bani lanya bona kuli niima nni. I fee yi cuo wula yeni ŋanjilfa tuonsɔnba, kelima, ban tagi ya buli yeni, ki pia mayuli; yii fo mo. ¹⁵ Li buli ki pia todmaba kuli, ki ji tua li ñuali yeni ti laad bonli; fala ya jiidi li buli po ya daali ikuli ba bodi. ¹⁶ Ama Israyeli ya Tienu naa tie nani buli yeni ka, wani n tagi ki tinga yeni ya bona n ye kuli. Wani n die Israyeli buolu; O yeli n tie O Diedo, u paaciamu kuli daano. ¹⁷ Fini Jerusalema, ban cebni ki lindi yua, bobni a tiadi, ki wodi ki yaadi mi diema nni. ¹⁸ Kelima, O Diedo yedi ya maama ne, "Diidi, mɔla wani ii, N ba lugdi Jerusalema yaaba nani ku tanpuapuagu yeni, ki yaani ba mi diema nni. N ba mabni ba boncianla, ki cedi ban ñuni ba ki nanga." ¹⁹ Jerusalema fabni, ki tua, "Hain, Mi naa yebiadma nan te? N bodi n yeni! N kpaba mudi, ke n nala kɔni. N mo den tua, "Laa bia, ama n ba toli, ki ga" ²⁰ N gbandieli biidbiidi, ke li baabi kuli mo ciecie. Bi deli ki yaani n bijaba kuli, ki ŋa nni, baa ji ye n kani. Mii ji pia yua n ba tii npo n gbandieli, mii pia yua n ba pini n diena. ²¹ Kelima, bi gobidikaaba tie yanpiidanba i, baa lingi O Diedo; lani n cedi ke baa bani bonli gagdima, ke ban gobdi yaaba mo yayadi. ²² Ti gbia mi janjanma laabaali, "Diidi li fuu ki kpendi, li janjanma ñani nijienu po i, ki tie nani mi tidigma yeni. Mi ba bolini Juda dociami, ki cedi yin tua diegbendi, i fuasangbanli wuonkaanu." ²³ O Diedo, n bani, o nisaalo kan bandi sanu, o saala po yema po. Niloba kuli kan fidi ki ya cuoni, ki fiini o taabana po, ki ŋmagdi o yuceli po sanu. ²⁴ O Diedo, tundi nni yeni mi teginma, ama, lan da tie yeni li pabienli ka, lanyaaka, n ba bia fanma. ²⁵ Cedi a pabiencianli ń jiidi ya nibuoli n ki bani a, yeni ya diedi nni yaaba n ki lingi ke ban bandi a, kaa taagi a yeli mɔno po. Kelima, bi dini Jakɔbu buolu, ki dini ba, ki bua buoni ba cain, ki cedi ke o diema tinfanma tua pabɔnli kaanu.