¹ O Diedo ń maadi Jeremi ya maama, ki yedi, ² "Cengi mani tin loli ya ŋantaado maama, ŋan tiadi ki waani Juda yaaba kuli yeni Jerusalema dotieba. ³ Yedi ba, 'O Diedo, Israyeli yaaba Tienu yedi ya maama ne: Ti solindi baa ŋua ya nilo n yie kaa cengi u naa ŋantaado maama. ⁴ Li tie ya ŋantaado ke N den loli yeni i yaajanba i, min den ñani ba Ejipti diema nni yadaali, ban den ye naani nani ku mubuogu nni yeni. N den yedi ba, "Cengi mani N nialu, ki tieni li bona kuli nani min waani yi maama yeni, kelima, i baa tie n buolu, ke nmo tie i Tienu." ⁵ Yin cɔlni nni, lani n tie min kubi n ñɔnianu, min den poli, ki niani i yaajanba ya ñɔnianu yeni, ke n ba puni ba ya diema nni ke mi naaŋanma yeni ti siadi puubi, yin ye ya diema nni dinne.'" Lanwani ii, mini Jeremi den jiini ki yedi, Nn, O Diedo!" ⁶ O Diedo den yedi nni, "ŋan kpaadi, ki waani lanya maama, Juda dociami nni yeni Jerusalema sanjala po. Yedi ba, 'Cengi li ŋantaado ñɔmaama, ki ŋanbi ki kubi ma, ki go cɔlni ma mo. ⁷ Hali min ñani i yaajanba Ejipti diema nni ya daali, ki ban pundi dinne, n li bii ki maadi ba maayenma i, ki tua, "Cengi mani n maama.'" ⁸ Ama, bi naa cengi n maama, baa diadi bi tuba ke ban cengi mɔko. Nilo kuli ŋua o pajuagli yeni o biadma ń teli o naanpo i. Lanya po i, ke n fii ki sedi bipo, yeni ya solindi n den ye o ŋantaado nni, li ya tie ke baa cɔlni n ñɔmaama, ki yie, kaa tieni min min waani ba ke ban tieni maama yeni. Yeni lani kuli, bi nan yie kaa cengi n maama." ⁹ O Diedo go den yedi nni, "Juda niba yeni Jerusalema dotieba loli i janbi ŋantaado, ke n nan pibdi ba. ¹⁰ Bi guani ki baa bi yaajanba yaaba n den yie kaa cengi n maama, ki ŋua ki pugi i buli yeni, tudma nni, ki tugi i tagli. Israyeli diegu nni yaaba yeni Juda diegu nni yaaba miidi min den loli ya ŋantaado yeni bi yaajanba yeni. ¹¹ Lanya po i ke O Diedo yedi ya maama ne, 'Diidi, n cedi ke bi ñuni ba ki nanga, ban kan fidi ki sani ki ciadi ya yebiadma. Lanwani ii, bi ba lingi nni, ama, n nan kan cengi ba. ¹² Juda dociami yaaba yeni Jerusalema dotieba ba ki baa ban den pugi, ki padi ya buli po i, ama, bi yebiadma daali, bi kan baa faabma. ¹³ Kelima, fini, Juda, a buli yabi ki pundi a dociami. Yinba, Jerusalema dotieba mo, i padbinbinda, yin juugi li ŋubli yeni tulaale, o bulo Baali po, ya padbinbinda po yeni yabi ki pundi i sanjala. ¹⁴ Lanwani ii, fini, Jeremi, ŋan da jaandi ya nibuolu ne po. ŋan da juogi ba, ki jaandi ki mia bipo sugli. Kelima ban baa ye mi yebiadma nni ya yognu, ki yigni, ki miadi sugli yeni, n kan cengi ba. Israyeli n tie O Diedo olifie tibu. ¹⁵ O Diedo yedi, "Be n nan cedi ke min bua ya niba pali naa pieni npo, bi nan lingi be i n diegu nni? Bi tama ke ban niani ya ñɔniani, bii ban padi npo ya pada n ba faabi ba mi yebiadma yognu uu? Bi tama ke lani n ba cedi ban ciadi ii? ¹⁶ Yonuba, O Diedo den yini o buolu ya yeli ne, "Olifie tibu yaabu ya faabunli yeni bu luana ŋani." Ama i taatantandi nni i, ke n ba juu bu faadi, ki kɔnlƙɔnli bu beni. ¹⁷ Kelima, O Diedo, u paaciamu kuli daano, yua n den buli a yeni, wani go cedi ke mi yebiadma jiidi apo, kelima Israyeli diegu nni yaaba yeni Juda diegu nni yaaba ń tieni ya biadma po. Bi padi o bulo Baali po a pada, ki gbaani ki pugi o, ki fiini n pabienli.'" ¹⁸ O Diedo n waani nni bonli kuli, ke n bandi bi tuada. O Diedo n cedi ke n la bi tuada. ¹⁹ N den tie nani ya pabiga ya yama n dingi yeni, ban caa yeni yaaga u yankodkaanu yeni. N den ki bani ke bi bobni i janbi npo. Bi den tua, "Tin bolini bu tibu yeni bu bonluana kuli! Tin ñani o bi nisaalba siiga, ban da go taa o yeli, hali bada." ²⁰ Ama, yeni lani kuli, O Diedo, u paaciamu kuli daano, ti buudi yudaano yua n tiegi, wani n bani yaali n ye o nisaalo pali nni yeni o maalma nni. N ba tua kasiedi, ki la ŋan ba tuu ba li panli maama, kelima, n cua fini o candanbaalo kani, yeni n maama. ²¹ Lani n cedi ke O Diedo maadi ya maama ne, ki yie Anatoti yaaba po, bani yaaba n bua a kuuma, ki tua, 'Da pua sawali O Diedo yeli po, nekanba, lanyaaka, tinba n ba kpa a.' ²² Lanya po i, ke O Diedo, u paaciamu kuli daano yedi ya maama ne, 'Diidi, Mini n fii ki sedi bipo. Ki jugsiega ba bolini bi jawaaba. Mi koma mo n ba kpa bi bijaba yeni bi bisiaba mo. ²³ Min ba fii, ki sedi bipo ya binli, bá niyendo kan sieni, ki ciadi, kelima Mini n luni mi yebiadma Anatoti yaaba po.'"