¹ O Diedo, a tiegi paaa, min li cua a kani yeni ya maama kuli po. Ama, n ba waani a min bua gbandi yaali ya niima nni, a kani: Be n cedi ke bonli kuli cuoni bi nibiadiba po nanda? Bá yaaba n fiini mi yenyiema yema ŋani bipo. ² Fini n buli ba, ke bi pudi i jiini. Bi li bii ki luoni bonŋanla. A yeli ye bi ñɔna nni yognu kuli, ama bi pala wani fagi yeni a boncianla. ³ Yeni lani kuli, O Diedo, a bani nni. A ya la nni, a bani yaali n ye n pali nni. ŋan paadi ki seni ba nani ban gandi ya pee ki bua kodi yeni. Li daali ya pundi, ŋan gedi yeni ba u yankodkaanu! ⁴ Hali yeni u laa yognu i ke mi diema baa ye yeni u kuomu uu, ke i kuani nni bonpiaba ba bii ki kuoni, kelima, mi diema yaaba biadma po oo? Ti yandi yeni i nuani kuli sani ki yaadi o. Bi yedi, "U Tienu ki bani ti tuada, yeni tin bua yaali ń ba juodi maama." ⁵ O Diedo yedi, "Fini Jeremi, a ya bigni yeni bi taacendanba, ki ti cɔgi, a ba tieni ledi, ki bigni yeni i taami ii? A ya ŋmadi ki baa mi yanduanma ń ye naani, a ji ba tieni ledi i, Jurden kpenjaali po oo? ⁶ Kelima, bá a kpiiba yeni a baadiegu yaaba kuli fii ki see apo, yeni i janbi, ŋan da dugi bipo, bá bi ya maadi apo ya maamanma kuli. ⁷ N ŋa n diegu, n ñɔli, ki ŋa n faali. Mini mɔno n taa min buadi ya buolu, ki tieni ba bi yibalinba nui nni. ⁸ N faali kpandi, ki tua npo nani o yangbanlo, li fuali nni yeni; O fii ki yie npo, hali ki duni, lani n cedi ke nmo ñɔli, ki ŋa o. ⁹ N faali ji tua npo nani ya kaabo, ke o lieba kuli taani, ki bua di o yeni. Gedi mani ki taani ti fuayandi kuli na, ban cua, di mi jaanjiema. ¹⁰ Bi gobdikaaba boncianla biidi n daamɔngu tiidi kuanu. Bi ŋmaaŋma ki biidin tinbiinu faali; Bi cedi ke kuaŋamu kpandi ki tua fanpienma, nilo n ki pɔa naani. ¹¹ Bi cedi ke u kuanu yeni kpandi ki tua diegbengu, li pabɔnli kaanu. Mi diema kuli kpandi ki tua pabɔnli kaanu i. Kelima, obakuli mo ki yagni o yama lipo. ¹² Yibalinba kpendi ki ba tuogi mi diema kaani yii n ki pia guuka mi fanpienma nni, kelima, O Diedo jugsiega bolindi mi diema, ki cili bianu, ki ban tuoni u bianlielu. Faabma ki ye pia miali kuli po mi diema nni. ¹³ Bi buli li bondikaali, ki nan ba yendi i konkonni. Bi biani bi yaanma fanma, ke li naa pia mayuli. Lanwani ii, i fee ki pia yi yeni i kpanngu po oo, kelima O Diedo pabienli po n cedi ke o tieni yi lanya bonli. ¹⁴ O Diedo go yedi mine, Israyeli kuantalieba yaaba n ki ŋani po, ki fie n buolu Israyeli tinga, mi biadma po yeni, "Diidi, Mini n ba deli ki yaani ba bi tinga po, n ba deli ki yaani Juda buolu bi siiga. ¹⁵ N ya deli ki yaani i nilanbuoli, mi niñima ba guani ki cuo nni, bipo, min guani yeni ba, ki kaani ba yendo yendo, yuakuli o tinga nni, yeni o diema nni. ¹⁶ Bani n bangi n buolu ban pugi o bulo Baali maama; li ya tie ke li nilanbuoli bangi nani n buolu yeni, ban taagi n yeli ki pugi nni maama 'Nani O Diedo yua n fo' lanwani ii, n ba guani ki kaani ba n buolu siiga. ¹⁷ Ama, bi siiga nni, yua n ki cengi n maama, lawani ii, n ba yaani ba cain, ki bolini ba; O Diedo ñɔbonli n yeni."