¹ O Diedo den yedi Jeremi ya maama ne, "Gedi ki daa leni gaali gbanñagdigu, ki ñagni a ciaga, ama, ŋan dá da pangini li mi ñima nni." ² Lanwani ii, n den daa ku gbanñagdigu, nani O Diedo ń den maadi maama yeni, ki ñagni gu, n ciaga nni. ³ O Diedo den maadi yeni nni mi liema, ki yedi nni, ⁴ "Taa ŋan daa ya gbanñagdigu ki ñagni a ciaga nni yeni, ki, fii, ki gedi Efrati kpenciamu po, ki ban wuoni gu lanpo, u tanfalu nni." ⁵ Lanwani ii, n den gedi ki ban wuoni li gbanñagdigu Efrati kpenciamu po, nani O Diedo ń den yedi nni maama yeni. ⁶ A dana ń pendi, O Diedo den yedi nni, "Fii, ki guani Efratikpenciamu po, ki ban taa, min den cedi ke a wuoni ya gbanñagdigu yeni, gun wuo naana." ⁷ N den fii ki guani Efrati po, ki ban taa ku gbanñagdigu, kun den wuo naani yeni. Ama, ku den biidi boncianla, kaa ji pia mayuli. ⁸ O Diedo go den maadi yen nni, ki yedi, ⁹ "O Diedo yedi nanda: Yeni i, ke n ba buoni Juda yeni Jerusalema japaaciandi. ¹⁰ Ya nibuolbiadu n yie ke bi kan cengi n maama, ki cuoni bi pajuagicenli, ŋua i buli, ki gbaandi ki pugi yi yeni; bi ba kpandi, ki tua nani ya gbanñagdigu n ji ki pia mayuli ne yeni i. ¹¹ Kelima, nani ban yi ñagni ku gbanñagdigu ki ciaga nni yeni, n mo den taa Israyeli diegu yeni Juda diegu, ke ban tua n niba, ki tua n panpagdi, n yeli kpiagdi, yeni n jilma i. Ama bi nan den yie, kaa cengi n maama. ¹² Lanwani ii, ŋan maadi yeni ba, ki yedi ba ya maama ne, 'O Diedo, Israyeli Tienu yedi ya maama ne: Daacuali kuli baa gbie yeni daama i.' Bi ba guani ki buali a nanda, 'Tinba wani, ki bani ke daacuali kuli ba gbie yeni daama aa? ¹³ Lanwani ii, ŋan yedi ba, 'O Diedo yedi mine: N ba ñuni ki guoni mi diema nni ne dotieba kuli, yeni o badciamo, yua n kaa Dafiidi badigbandi po, yeni salga yidkaaba, yeni Jerusalema dogtieba kuli. ¹⁴ N ba yuandi ki kuani li ŋmadli bi siiga, ki sagni bi niba yeni bi yaba, ki sagni bibaanba yeni bi bila. N kan jie bi niñima, n go kan juogi ba mo, N kan faabi ba mi yebidma yognu.'" ¹⁵ Cengi mani, ki diadi i tuba. Da wangi mani japaaciandi, kelima, O Diedo den maadi. ¹⁶ Kpiagi mani O Diedo, i Tienu, ya yognu ke o dá ki cedi ke li biigli jiidi ipo, hali ke i taana dá ki tuudi li biigli juali. Kelima, i den guu mi yenyenma i, ama, mi ba lebdi ki tua bɔnbɔnbiigli, naniu taayinbɔnu yeni. ¹⁷ Lanwani ii, i ya kan cengi o maama aa, mini n baa buudi n baba, kelima, i japaaciandi po. N ba buudi hali n nuni ń puubi ti ninsiidi, kelima, bi ba gedi yeni O Diedo niba ti yonbdi. ¹⁸ "Yedi bi badcianba yeni bi badpuoba cannaciangu, 'Miini mani i yula, ki jiidi ki kali, kelima, ki badfegliga cibdi i yula po, ki baa.' ¹⁹ Bi ba luoni niganu po dociami, yua n ba luodi yi naa ye. Bi ba taa Juda yaaba kuli, ki gedi yeni ba ti yonbidi, obakuli kan sieni u dogu nni. ²⁰ Yaadi mani i nuni, ki diidi i yibalinba yaaba n ñani niganu po, ki kpendi. Min den piani a ya niba, yaaba n den ŋani apo hali boncianla, ke a den selni a yuli bipo yeni, ye le i? ²¹ ŋan den tama ke yaaba n den tie a dɔnlinba yeni, ya ti cua, ki pua ki paadi a, ki deidi a, a ba yedi be i? Falaciamo kan kua a, ki wudi a gbanu, nani ya pua n punbi, ki gbaani ki bua mali yeni ka aa? ²² Lanwani ii, a ba maadi a pali nni, 'Be n cedi ke ya bona ne tieni nni ii? Li baa tie a taglibiadi po ka cedi ke bi kaadi a tiadi, ki ŋa a mubili yeni i fee ee. ²³ Etiopi yua ba fidi ki lebdi o gbannanbɔnu uu, bii ki naamunpienga ba fidi ki lebdi o lega aa? Li ya tie yeni wani ii, yinba yaaba n maani yeni mi biadma, imo ba ti fidi ki tieni mi ŋanma. ²⁴ Lanwani ii, n ba yayadi ba nani mi fanpienma faali ń yi figi ki yadi ti muadi maama yeni. ²⁵ Min bili ke yaali n ba tieni a n yeni, N bili lanya biinu i apo; O Diedo ñɔbonli n yeni; kelima a sundi npo, ki ŋɔdi mi tofaama. ²⁶ Lanwani ii, Mini nba n ba yiedi a tiadi, ki cedi ban la mubima. ²⁷ Mini mɔno la a conconma yeni a cancagindi kuli, N la a biadma yeni a conconma a juana po yeni i kuani nni, N la lanya cancagintuona kuli! Sola, fini Jerusalema, falaciamo jaagi a yuli po, fini yua ki ŋanbidi a yuli ne, hali yeni u laa yognu i ke a ba ti ŋanbi a yuli ii?"