¹ O Diedo ń maadi Jeremi ya maama, ke mi nua ku siakuongu po n ne, ² "Juda diema ye li pabɔnli nni, mi diema dogi baa ki mumudi. bi kaakaa tinga nni ki buudi ki fabni yeni li pabɔnli, mi diema nni; bi buudi, ki yigni Jerusalema po. ³ Bi paatieba sɔni bi tuonsɔnba a caana po, li ñinluli. Bi pundi u kpenu po, ki sua kpenkuomu. Bi guani ki lebdi yeni a cuakuona. I fee yeni i tagli kuli cuo ba, ke bi tibni bi yula. ⁴ U kuomu po cedi ke ki tinga pudi, ki yagdi yagdi, kelima taaga ki nii mi diema nni. A kpaakuola jigi cie, ke bi tiibi tiibi, kaa bani ban ba bili bi yula naani. ⁵ Kelima, bá li pawanli yi mali li biga, ki siedi ki ŋa ga, kelima, muasɔngidi ji ki ye. ⁶ I fuaŋunbi ye a juana po i, ki gaani u faalu nani i fuasangbanli yeni. A ya nuali bi nunga nni, li pia mi niñima, kelima, muadi ji ki ye." ⁷ Bá yeni ti tagli ń yabdi ki pendi maama kuli, O Diedo, ŋan diidi ŋan ba tieni maama, a yeli ń da fiagi. Kelima, ti yenyiema cedi ke ti dudma apo yabdi boncianla. ⁸ Fini n tie Israyeli dandanli, fini yua n den faabi o mi yebiadma yognu, Be n cedi ke a tiendi nani a tie caano yeni mi diema nni ne, nani ya caano n lingi wan ba duani naani, ki fandi ki pendi yeni? ⁹ Be n cedi ke a tie nani yua ya pali n biidi yeni, nani ya jakɔndo n ji kan fidi ki faabi niloba kuli yeni? Kelima, Fini O Diedo, a ye ti siiga nni i! Ti taagi a yeli daali kuli, ŋan da ñɔli, ki ŋa ti. ¹⁰ O Diedo ń maadi li nibuolu ya maama n ne: "Nani ban yabdi ti puapuagdi yeni, baa bua ban kali kaanyendu." O Diedo pali ki mani bopo. Mɔla, o tiedi bi taglibiadi po, ki wangi ba fala, bi tuonbiadi po. ¹¹ O Diedo den yedi mini, Jeremi, "Da jaandi ki mia bonŋanli ya nibuolu ne po. ¹² Kelima, bá bi ya loli ñɔbu, n kan cengi bi bubuuli yeni bi fabni, bi ya cua yeni bi padjuukaana yen bi paabu pada, n pali kan mangi bipo. Kelima n ba cedi bu tɔbu, mi koma, yeni u yianbiadipuodikou ń bolini ba." ¹³ Lanwani ii, n den guani ki yedi, "Hain, N Diedo, O Diedo, diidi, bi sawalpuaba maadi yeni ba, ki tua, 'Tɔbu kan baa yi, koma kan baa yi, kelima n ba puni yi mi yanduanma nekanba.'" ¹⁴ O Diedo den yedi nni, "Bi sawalpuaba pua tofaama sawali i, n yeli po. Mini ka sɔni ba, mii go bili ba ñɔbonli mo, mii maadi yeni ba mɔko. Ama, bi pua mi tofaama, ke li bonli dɔgdi bipo, u baayuadiidu yeni i buli ya ŋɔdma n tie bi tuonli, bi pala nni ya tofaama i ke bi pua yi ki tua ke bi pua sawali ipo." ¹⁵ Lanya po i, ke O Diedo den yedi ya maama ne, "Ya sawalpuaba n pua sawali, n ya yeli po, ke n naa sɔni ba, yaaba n tua ke tɔbu kan baa, ke koma mo kan baa mi diema nni ne: bu tɔbu yeni mi koma n ba kpa li sawalpuaba. ¹⁶ Ban pua yaaba ya po bi sawali mo, bu tɔbu yeni mi koma n ba bolina ba Jerusalema sani nni, obakuli kan ya ye, ki piini ba mo. Bani ii, bi denpuoba, bi bijaba, yeni bi bisiaba; N ba wuli bi biadma bi yula po i. ¹⁷ Yedi ba ya maama ne: 'Cedi mani min buudi yienu yeni ñiagu, hali ti ninsiidi ń puubi n nuni nni. Kelima mi yebiadma baa n niba po; lanya yiagu ki pia gbenma. ¹⁸ A ya gedi ku muagu po, a ba la bu tɔbu ń dini yaaba! N ya guani u dogu nni mo, diidi u yianbiadu yeni mi koma ń kpaa yaaba n yeni. O sawalpualo yeni o koopadciamo waa, ki diidi mi diema nni, ke li cuo ba yaalidigu. Baa bani yaali n tieni mi diema nni.'" ¹⁹ N tua a luni ki ñɔli Juda cain i? Li naani ke a pali biidi Siyɔn po boncianla i? Be n nan cedi ke a pua ti ke gaapo kuli naa ye ee? Ti bi daani mi yanduanma i, ama, mayuli ji ki ye, laa ŋani tipo; ti den daani laafia i, ama jawaanciandi baba i. ²⁰ O Diedo, ti tuo ti biadma, yeni ti yajanba tagli, kelima ti tieni ti tuonbiadi a nintuali. ²¹ O Diedo, da ñɔli, ki diani ti! A yeli kpiagdi po, ŋan da fali a balkalkaanu. Tiadi ŋan den loli ya ŋantaado yeni ti, ki da miidi, ya kubi li ŋantaado bonŋanla. ²² I nibuoli ne buyuoyuodi siiga, pia ya bulo n ba fidi ki cedi ki taaga ń ña ti talwadi nni, ki nii ii? Fini O Diedo, t Tienu baba ka tiendi lankuli ii? Ti daani a ya niinni i, kelima, fini n tieni lanya bona kuli.