¹ O Diedi den yedi nni, "Bá Moyiisi yeni Samuyeli ya cua n nintuali, n pali kan mangi ya nibuolu ne po. Deli ba, ki yaani ba n nintuali, cedi ban yaadi ki gedi hali fagma. ² Li ba fidi, ban buali a, 'Ti nan ji ba gedi le i?' Lanwani ii, ŋan yedi ba, 'O Diedo yedi ya maama ne: Yaaba n dagdi yeni mi kuuma, man di ba; yaaba n dagdi yeni bu tɔbu mo, bu tɔbu n ba kpa ba. Lan dagdi ke mi koma ń kpa yaaba mo, mi koma n ba di ba; yaaba n dagdi ke ban gedi ti yonbdi mo, ban ya caa ti yonbdi.' ³ Kelima, O Diedo n yedi ya maama ne, N ba fii ki sedi bipo yeni fala buoli na i: Bu tɔbu ba kpa nicagyenli, i sangbanli ń fili ba ki ŋmani, ki bolini ba, i yobli yeni i fuasangbanli mo n ŋmani ki bolini tianba. ⁴ N ba cedi lan tua jawaanciandi bonli ŋanduna tinbuona kuli po, kelima, Hesekiyasi bijua, Manase, Juda bado ń tieni yaali Jerusalema dogu nni po. ⁵ O Diedo yedi, Jerusalema, ŋma ba gbadi apo mi niñima? ŋma ba gbagi ki diidi a, ki juogi a? ŋma ba nagni ki buali a yaali n pia ŋa? ⁶ A sundi npo cain, a buli nni a nunga; O Diedo n yedi yeni. Lanwani ii, n ba tandi n nuu, ki pua a, ki bolina cain. N gbadi Jerusalema po mi niñima, ki cɔgi. ⁷ Lanwani ii, N ba lendi ba, nani ku fengu yeni, ki yayadi ba mi diema nni. N ba muni ba a bila. N ba cedi n buolu niba, yaaba n naa lebdi bi sanu yeni, ń bodi. ⁸ N ba cedi bi kpepuona ń ya yabi nani mi ñincianma tanbiini yeni. N ba cedi mi yebiadima ń ŋmaa a jakɔnda naá ku yensiicocoligu. N ba cedi ti yanyagdi yeni i yanbani ń ludi o ki baa ba yenma. ⁹ Ya pua n mali jaba lele, cɔgi, o ba kpe. U yienu ba baa, ke li nan dá li yieni i. I fee ba cuo o, ki gbadi o hali bonŋanla, Kelima, yaaba n sieni, n ba ŋa ba bi yibalinba yaaba n muubi mu jugsiemu nintuali; O Diedo n yedi ya maama ne." ¹⁰ N naá, be ya yebiadma n baa nni yeni ii! ŋan mali nni ya po i n cedi ke mi yebiadma baa nni, mini baba n tie yua n fiini mi niama yeni ku fuugu mi diema nni. Mii dini nilo panli, mii go dini nilo mo panli, ama, bikuli nan kubi mini i ki solini. ¹¹ O Diedo yedi: "Mii den faabi a, a yema ŋamu po ka aa? Laa pia tama ke n ba pua yibali, apo mi yebiadma yeni fala yognu. ¹² Nilo ba fidi ki kɔnli ti kumɔndi ii? Nijienu po kudi yaadi n ŋmadi yeni tikumɔndi ba fidi ki kɔnli ii? ¹³ N ba cedi i yibalinba ń fagi i ŋalmani yeni i piama kuli. N ba tieni lankuli kelima ŋan tieni ya tuonbiadi kuli mi diema nni po. ¹⁴ N pali beni ipo nani ya mu n cuo, ki bua juu yeni, N ba ti yuandi ki cedi ban gedi yeni yi ti yonbidi, yin ki bani naani, yin ban ya tuuni i yibalinba po." ¹⁵ O Diedo, A bani nni bonŋanla! ŋan ya tiani npo, ki fabi nni. ŋan tuogi npo yaaba n wangi nni fala, ki tuu npo li panli. A pia li juunli boncianla, ama, ŋan da cedi ban baa nni, ki kpa nni. A ya po n cedi ke n tuo ki ga ti sugciandi. ¹⁶ N den ya gbadi a maama kuli, n den yi ga ma bonŋanla. A maama den yi tie npo pamancianli i, hali ki kua n pali nni, kelima fini n paadi nni, ki gagdi, ki die nni, fini O Diedo, u paaciamu kuli daano. ¹⁷ Mii gedi ki ban kali li ñuali danba yeni ti laadi danba siiga ki bua ya jeli ka. N paadi ki sedi n baba, kelima a paaciamu po i, A den bieni n pali boncianla. ¹⁸ Be n nan cedi ke n fala pugdi, ki n yiagu ki pia gbenma, kaa go pia tebgu mo? A bua tua npo ban kan fidi ki dugi ya caali po yo oo, yaali n ki pa kuodima aa? ¹⁹ Lanya po i, ke O Diedo yedi nanda, "Jeremi, li ya tie ke a lebdi a yama, ki guani n kani, N ba ga ŋa, ŋan ya ye n nintuali, ki tuuni n tuona. Kelima, a ya paadi ki ŋa ti bonyuoyuodi, ki taa yaali n pia mayuli, a baa tie nani n ñɔbu yeni i. Li nitaanli kuli ba guani ki lebdi a kani i, ama fini ka ba ŋɔdi ki taani yeni ba. ²⁰ N ba cedi ŋan tua u naa nibuolu po nani kumɔndi bilinguonli yeni. Bi ba tuogi a yeni bu tɔbu. Ama, bi kan paadi a, kelima, N ye yeni a, ki ba faabi a, ki go kubi a; O Diedo n yedi lanya maama. ²¹ Kelima, N ba faabi a bi nibiadba nui nni, ki fie a miali bi tugtondanba nui nni."