¹ O Diedo den yuandi ki maadi yeni nni, ki yedi, ² "ŋan da taa pua nekanba, ŋan da mali a bijaba bii a bisiaba nekanba. ³ Kelima, O Diedo yedi ya maama ne ke mi nua nekanba bijaba yeni li bisiaba, yeni bi naanba yaaba n mali ba, yeni bi baanba yaaba n cedi ke bi mali nekanba, ya diema nni ne, ⁴ 'Bikuli ba kpe yianbiadu ya kuuma i. Bi kan baa kuuŋanbili ii, bi go kan pii ba mo. Bi ba tua nani ti bugdi yeni, u tingbanu po. Kelima bu tɔbu yeni mi koma n ba ba dudi ba, bi gbannandi ń tua jiema tanpoli po nuani yeni ti muayandi po.' ⁵ O Diedo maadi yeni nni, ki yedi ya maama ne, 'Da kua mi kuuma ń ye ya diegu nni. Da gedi kuuŋanbili ń ye naakani, ŋan da gedi kuufuondu, kelima Mini n muni u naa nibuolu mi yanduanma, N muni ba ki taani yeni min den loli ya ŋantaado yeni ba yeni n niñingbadma kuli; O Diedo ñɔmaama n yeni. ⁶ Li nikpela yeni li bila kuli ba kpe mi diema nni ne i. Bikan piini ba, bi kan ŋanbi bi kuuma ki buali ban tieni kuubogdliba kuli; obakuli kan kogdi bii ki kuo bi kuuyudi. ⁷ Obakuli kan taani ki kali yeni ba, ki di kuujiedi, ki baagi ba kelima mi kuuma fala po, obakuli kan cabi ñincabli bii ki padi padliba kuli, kelima nilo naá lanyaaka o báa kuuma po, ke wan baagi o. ⁸ ŋan da kua badu ń ye naakani, ki kali yeni ba ke abua di bii ki ñu yeni ba.' ⁹ Kelima, O Diedo, u paaciamu kuli daano, Israyeli Tienu maadi ya maama ne, 'Diidi min ba tieni yaali a nunbu nni, ke a dá ye nekanba ne, N ba cedi i pamanyani ń gbeni, o pocaano yeni o pocaancalo pocaayani ba gbeni.' ¹⁰ Li ba fidi ŋan waani u naa nubuolu, mi naa maama ki gbeni, ban buali a, 'Be cedi ke O Diedo maadi tipo mi naa yebiadma maama? Ti tagli tie ile i, ti tieni be ya tuonbiadi i, O Diedo, ti Tienu po oo? ¹¹ Lanwani ii, ŋan yedi ba, 'Kelima, i yaajanba sani ki ŋa Mini O Diedo, O Diedo ñɔmaama n yeni; bi sani n kani ki ŋɔdi i buli, ki gbaandi ki pugi yi. Bi sani ki ŋa nni, kaa cɔlni n yikodi ñɔmaama. ¹² Ama, yinba iba, i tieni bmi biadma ki cie i baanba, kelima, diidi mani, nilo kuli ji ŋua o pajuagli yeni o pali nni biadima ya sanu i; bá niyendo ji ki cengi n maama. ¹³ Lanwani ii, N ba deli ki yaani yi ya diema nni ne, yin gedi, yinba yeni i yaajanba ń ki bani ya diema po, lanpo i ke i baa ŋua ki gbaandi, ki pugi i buli yienu yeni ñiagu kuli, kelima, N kan teni yi nunmanga, ki gbadi i niñima.' ¹⁴ Lanya po i, ke O Diedo yedi, Diidi mani, a dana kpendi, ke bi ji kan yedi, 'O Diedo fo, wani yua n den ñani Israyeli buolu Ejipti diema nni.' ¹⁵ Ama, 'O Diedo fo, wani yua n den ñani Israyeli buolu yaaba nijienu po diema nni yeni wan den yayadi ba ya tinbuona nni.' Kelima, N ba guani yeni ba, min den puni bi yaajanba ya diema yeni nni. ¹⁶ O Diedo ń yedi ya maama n ne, Diidi mani, N ba sɔni bi jankpaanba boncianla, ban cua ki kpaani ba, ki yaadi yeni ba. Lani ya pendi, N ba sɔni a waala, ban cua ki waali ba, a juaciama yeni a juabila nni kuli, yeni ti tankuodi yeni a tanlona nni kuli. ¹⁷ Kelima, n nunbu maa ban tiendi yaali kuli; Bi kan fidi ki wuoni nni labakuli. N nua bi tagli yeni bi tuonbiadi kuli. ¹⁸ N ba pa ba bi tagli yeni bi tuonbiadi pani taalma lie i, kelima, bi jɔgni n diema yeni ban tagi ya buli, yeni ya bonyuoyuodi, ke i kpe yeni, yeni ban gbieni n tinbiinu yeni bi cancaginbuli ya po. ¹⁹ O Diedo, fini n tie n gbanmanu yeni n wuonkaanu, li pabɔnli daali, n ba sani ki deni fini i. I nilanbuoli ba ña hali u tinbianu, ki cua a kani, ki yedi: "Ti yaajanba ń den dini ya faali den tie tofaama baba i. Li tie fanma i, ya faama n ki pia mayuli. ²⁰ Bi niba ba fidi ki tagi bi yula po i buli ii? Ama, li buli naa pia mayuli.' ²¹ Lanya po i, ke O Diedo yedi, "Mɔla wani ii, N ba cedi ban bandi n fidu yeni n paaciamu, Lanwani ii, bi ba bandi ke Mini n tie O Diedo.