¹ Juda buolu diema tagli diani yeni kudi ya magmuanu i, yu ya juoga po tie Diama tanli. Li diani bi pala nni, yeni bi padbinbinda yina po. ² Bá bi ya tiadi bi bila po, bi ba tiadi bi padbinbinda po, yeni bi bulo Akera daacaadi po, yia n den ye ya tiidi n bundi bonŋanla yeni a juabila po yeni. ³ O bulo Akera daacaadi go den ye a juaciama yuli po, li fuasieli nni. Juda buolu yaaba, n ba cedi ban fagi i ŋalmani yeni i piama kuli, ki taani yeni i juaciama kuli, kelima ya tuonbiadi ke i tieni mi diema nni kuli po. ⁴ Yinba n ba sani ki ŋa min den puni yi ya tinbiinu. N ba gedi yeni yi, yin ki bani ya diema nni, ti yonbidi, yin tua i yibalinba yonbi. Kelima, i cedi ke n pali beni, ki tua nani ya mu n co, ki kan jundi hali yognu kuli yeni." ⁵ O Diedo yedi, "Sola, ya nilo n dugi o nisaalilielo po; O kuani o dudugdi yeni o paalu kuli o nisaalo kani i, ki ji cedi ke o pali fagdi yeni O Diedo. ⁶ O baa tie nani ya faatuugu n see u tialu nni yeni i, o kan gbadi yemanmaba kuli. O yakaanu n baa tie mi fanpienma tansaga nni, ya kaanu n tie tinlianli nni, nilo ń ki kua naani. ⁷ Ama, yua n dugi O Diedo po, ye yeni li seli yeni mi yedŋanma i, kelima O Diedo n tie o yanŋaali yeni o suginma. ⁸ Kelima, o baa tie nani ban ŋuu ya tibu u ñinkunu yeni i, bu jiina ba tandi ki gedi hali ku baagu nni. Bu kan ya jie ku wulgu yognu, kelima bu faadi baa sɔngi yognu kuli. Bu kan ya pia yanyagdi u siakuomu binli, bu baa luoni yognu kuli a luana i. ⁹ O nisaalo pali pia i bɔndi, ki cie bonli kuli. Lanya yianu ki pia ñɔgu, ŋma nan bani li niima nni? ¹⁰ Mini n tie O Diedo, yua n bigindi bi niba maalma, ki bani yaali n ye o nisaalo pali nni. N ba guani ki ŋmiani yuakuli, lan ŋɔdi o sanbila yeni o tuada ń tie maama i. ¹¹ Nani ya kpañuuli n wuugi lan ki ŋaa ya jena po yeni, li tie yeni i, yua n tɔgni ya sani n ki tiegi, ki baa ŋalmani yeni, ama, hali o miali yema n ba kua siiga, o ba lagdi ki baa o panma nni i, o piama ń yaadi ki ŋa o, o ba juodi yanpiidaano i." ¹² Bi tua,"Ti jaandiegu tie nani ya ya badkalkaanu n pia ti kpiagdi hali boncianla yeni. Li jaagi ya juali n kpedi boncianla po, hali mi cilma. ¹³ O Diedo n tie Israyeli dandanli. Yaaba n sani ki ŋa ŋa kuli ba di i fee. Yaaba n buli ŋa bi nunga mi diema nni kuli, bi ba kpe, ban diani bi yela mi tama nni. Kelima, bi sani ki ŋa Fini, O Diedo, yua n tie li miali ñinbunli. Jeremi jaandi. ¹⁴ O Diedo, tebi nni, lani n tie min paagi! Faabi nni, lani n tie mi baa mi faabma. Kelima, Fini n puni nni u sanu, ke mi ya kpiagdi a yeli. ¹⁵ Diidi, bi tua nni, 'O Diedo maama yeli i? Man cua ne na!' ¹⁶ A bani, ke mini wani naa yie ke n kan tua gobdika, ki ya ŋua ŋa. Mini ka den mia ke fala daali ne ń cua. A nan bani ke ya maama n ña n ñɔbu nni. Mani kuli ye a nintuali i. ¹⁷ Da tua jawaanciandi npo. Fini n tie n wuonkaanu mi yebiadma daali! ¹⁸ Cedi yaaba n sedi npo ń di i fee, ama, ki ki da fiagi mini wani. Cedi ban digibi, ki da cedi mini wani ń digibi. Cedi fala daali ń cua bipo, ŋan cedi fala buoli lie ń taani ki cuo ba yenma, ki bolini ba." ¹⁹ O Diedo den yedi nni ya maama ne, "Gedi ki sedi Juda dogu bulñɔbu kani, o bado ń pendi naani, ki kua yeni o niba kuli, ki go gedi Jerusalema bulñɔbu kani. ²⁰ Yedi ba, 'Cengi mani O Diedo maama, fini Juda bado yeni Juda yaaba kuli, yeni yinba Jerusalema yaaba kuli, yinba yaaba n kua a bulñɔna kani. ²¹ O Diedo yedi ya maama ne: "Fangi mani i yula, ki kubi i miana, yin da tugi tugkpiagli Saba daali, ki tɔgni Jerusalema bulñɔbu kani. ²² Da ñani mani tugkpiagli i diena nni, Saba daali. Da tuuni mani tuonli ba kuli Saba daali, nani min den bili i yaajanba li ñɔbonli ke ban ya tiendi maama yeni.'" ²³ Baa den cengi nni, baa den diadi bi tuba ke ban cengi nii mɔno, Bi den juagi bi pala, kaa bua ban cengi, bii ki ga tundi mɔko. ²⁴ O Diedo yedi, "Cengi mani n maama bonŋanla, yin da tugi tugkpiaga, ki pɔndi u dogu bulñɔna kani, Saba daali, mi fuodma daali. Yin gagdi ki ŋanbi lanya daali Mini O Diedo po, ki da sɔni tuonli ba kuli li daali. ²⁵ Lanwani ii, yinba Juda yaaba yeni Jerusalema dogtieba, li daali, bi baditieba, bi badijaba, yeni yaaba n kaa Daafiidi badigbandi po kuli, ba cua u dociamu ne bulñɔna kani, yeni bi turdi, yeni bi taami, bani yeni i buoli yudanba, lani n tie, i dogi ne ń ya pia bi niba yognu ń tuu yognu kuli. ²⁶ Bi ba ña Juda dogu nni yeni Jerusalema tinkundogi kuli, yeni Benjamina buolu diema nni yeni a juana tinga dogi nni kuli, yeni niganu po yaaba kuli, bi ba cua yeni a padjuukaana, yeni bi paabu pada, bi bonkukuodi jiema pada, yeni tulaale, yeni ya ŋuba n pia u nuulmanu, yeni ban pia ya paabu ki bua dondi O Diedo, ki tieni o balga. ²⁷ Ama, I ya ki cengi n maama, ki gagdi ki ŋanbi Saba daali, kaa tugi tugikpiaga, ki nagdi Jerusalema bulnɔna kani, lanwani ii, n ba juu Jerusalema bulñɔna yeni ya mu n ki pia gbindima, mun buoni ti badidiedi kuli."