¹ O Diedo den maadi yeni Jeremi,ki yedi ya maama ne, ² "Fii ki ña, ki gedi o tiamaalo deni, lankani i, ke N ba maadi yeni a" ³ Lanwani ii, n den ñani ki gedi o tiamaalo deni, n den sua ke o maa tiagu, yeni ku yɔgu. ⁴ Ama, wan den maa ya tiagu den biidi o nui nni, ke o lebdi, ki guani ki maa tiatiangu n tie wan bi tia, ki bua maa yugu. ⁵ Lanwani ii, O Diedo den waani nni o ñɔbonli, ki yedi, ⁶ "Yinba Israyeli yaaba, Mii pia ya fidu n ba tieni yi nani o naa tiamaalo ń tieni o tiagu maama yeni ii, O Diedo ñɔbonli n yeni. Diidi mani! Israyeli yaaba nani ku yɔgu ń tie maama o tiamaalo nui nni yeni, imoko tie yeni i, N ya nuu nni, ⁷ Yognuba, N yi maadi yeni buoluba bii diemaba, ke N ba pua ki ŋabi ba, ki bolini ba. ⁸ Ama, Min maadi yeni ya nibuolu bii ya diema ya lebdi bi pala, ki cedi bi biadma, yaama n den bieni n pali, lanwani ii, N mo yi lebdi min den jagi ke N ba waani ba fala maama. ⁹ U yogtianu mo, N ba taa jagli yeni buoluba, bii diemaba, ke N ba maa ba, bii, ki ŋuu ba. ¹⁰ Ama, bi ya tieni biadma n nituali, kaa cengi n maama, lanwani ii, N ba lebdi mi den jagi ke N ba tieni ba ya ŋanbli. ¹¹ To, mɔla wani ii, ŋan maadi yeni Juda yaaba yeni Jerusalema dogtieba, ki yedi ba mine: Diidi mani, N ba jiini ipo yebiadmaba. N bobni mi yebiadima ipo. Yuakuli ń lebdi o sanu, ki ŋa o tɔgibiigu yeni o tuadiyuoyuodi, i yema ń ya ŋani ipo. ¹² Ama, bi ya yedi, 'Laa pia maayuli. Ti baa ŋua ti sani, tin li jagi maama i, nani ti pajuaga ń jagi ya biadma yeni i. ¹³ Lanya po i, ke O Diedo yedi ya maama ne, 'Buali mi diema nni yaaba, ŋma n kpeli ki gbadi ya bonli ne buolu? N cikpenga Israyeli sɔni ya tuona n gundi boncianla. ¹⁴ I la ke Liban juaciama po ba luo ñinguankaama aa? Ya ñima n ñani a juana po, ki puubi, ki sɔngi yeni, ba fidi ki ñuudi faala aa? ¹⁵ Ama, N ya buolu wani ii, sundi npo. Bi gbaani ki pugi i buli, ki padi yi a pada, lanya tuada n bili a tantuudkaana bi sani po; bi ŋa u sankpelu, ki pɔni, ki ŋua ban ki kɔdi, ki bili ya sani. ¹⁶ Bi cedi ke bi diema kpandi ki tua li yanŋmadli yeni li ñuali bonli. Yua n tɔgni li diema nni kuli, ti jawaanciandi yeni ku yaalidgu ba cuo o, wan papagi o yuli. ¹⁷ N ba yayadi ba bi yibalinba nintuali, nani puoli po faalu yeni. N ba buli ba n nunga. N kan teni ba nunmanga bi yebiadma daali.'" ¹⁸ Lanwani ii, li nitaanli den yedi,"Cua mani, tin bobni ki kɔni yeni Jeremi, ki dugni yiko kan bodi, kelima, salga yidka luoma bii yanfodaano cegli po, bii sawalpualo maadɔgdikaama luoma po. Cua mani, tin maadi ki biani o, tin da cengi wan ba maadi ti ya maama kuli" ¹⁹ Hain, O Diedo, jien n niñima, ki cengi n yibalinba ń maadi ya maama npo. ²⁰ Bi ba guani nni mi yibalma, kelima, min tieni ba ya ŋanma po oo? Kelima bi gbiidi ku buogu, ki ba biani n miali. Ya tiani min sedi a nintuali maama, ki maadi ba ban ba tieni maama ki ŋanbi b yula, ki lɔgdi a pabienli. ²¹ Lanya po i, ke n miadi ke ŋan cedi mi koma ń biani bi bila, bu tɔbu mo ń biani bikuli cain. Cedi bi puoba bila yeni bi ciaba kuli ń kpe ban tua pakuana, u yianbiadu ń kpa bi jaba kuli, bi jawaaba mo ń kpe bu tɔbu nni. ²² Ban ya gbia fala yigni baba, bi diedi nni, hali yeni ya yognu ke a ba sɔni a tɔgola ban cua ki naa ba. Kelima, bi gbiidi ku buogu ki ba cuo nni, ki dia ti diadi, ki ba cuo nni. ²³ Ama, Fini O Diedo, a bani ban bobni ya janbi, ki ba biani n miali. Da di sugli bi tagli yeni bi tuonbiadi po. Da piini bi tuonbiadi a kani. Ama ŋan cedi baa fiagi ba a nintuali n. ŋan waani ba fala a pabienli yognu.