¹ O Diedo yedi ya maama ne: " Gedi ki lingi ku yɔgu bobli, ki go yini bi nikpelba yeni salga yidkaaba. ² Gedi Beni Hinoni jualɔngu nni, naani n kuu yeni u tiamaakaanu bulñɔbu kani, N ba waani a ŋan ba maadi yaali. ³ ŋan kpaandi ki yedi: 'Yinba Juda baditieba yeni Jerusalema dogtieba kuli, yin cengi mani O Diedo, maama! O Diedo, u paaciamu kuli daano, Israyeli yaaba Tienu yedi ya maama ne: "Diidi mani, N bobindi mi yebiadma ya diema ne po. Ya tubli n gbadi ya maama ne, li ba cuo o i jawaani yeni ku yaalidgu. ⁴ N ba tieni ba lanya biadma, kelima, bi sani ki ŋa nni, ki gbaani ki pugi ya buli, ke bani yeni bi yaajanba yeni Juda baditieba den ki bani, ki puni yi tulaale, ki ŋubni yi a ŋuba , ki padi yi a pada, ki wuli yaaba n ki pia tagli sɔma, ki jɔgni n diema. ⁵ Bi maa a padbinbinda a juaciama po, ki padi bi bila ki juu a padjuukaana o bulo Baali po. Mini O Diedo ń den ki bili ba ya ñɔbonli, ya bonli n den ki kua n maalma nni mɔko. ⁶ Lanya po n cedi ke O Diedi yedi,ke a dana kpendi, ke bi ji kan ya yi likani Beni Hinoni jualɔngu nni, ban baa padi ki juugi bi bijaba yeni bi bisiaba naankani, i buli po, ama bi ji baa yi likani, ku nikpabaagu. ⁷ Lankani, ke n ba fanbi Juda yeni Jerusalema yanjaga. N ba cedi bu tɔbu ń kpa ba bi yibalinba yeni yaaba n lingi ke ban gbindi bi miana nintuali n. N ba yuadi ki cedi tanpoli po nuani yeni ki tinga nni fuayandi, ń taa bi gbannandi, tin tua bi jiema. ⁸ N ba yuandi ki cedi li dociamu ń tua diegbengu yeni laadi bonli. Kelima, yaaba n tɔgni li dogu nni kuli, bi ba yigni yeni ti jawaandi yeni ku yaalidgu yeni ya yebiadma n baa upo. ⁹ N ba cedi ban ŋmani bi bijaba yeni bi bisiaba nandi; yibalinba yaaba n lingi ban gbindi bi miana yeni ba kuani ba ti yanyagidi yeni i yanbani nni ki cedi yuakuli ń ŋmani o kuantalielo nandi.'" ¹⁰ A ya maadi ki gbeni, ŋan mudi ku yɔgu tiagu yeni ya niba n ye yeni a yeni nunga nni, ¹¹ ki yedi ba, 'O Diedo, u paaciamu kuli daano ñɔbonli nne: Min ba mudi ya nibuolu yeni ya diema ne maama n yeni, nani ban yi mudi ku yɔgu tiagu maama, ke ku kan fidi ki guani ki maa yeni. Bi baa piindi bi kpienba Tofeti, kelima u piikaanu pɔdi. ¹² Min ba tieni u kaanu ne yeni u niba nani min tieni Tofeti maama yeni i; O Diedo ñɔbonli n yeni. ¹³ Lanwani ii, Jerusalema yeni Juda baditieba diedi ba kpandi ki tua nani Tofeti yeni, ki taani yeni ya diedi polu po ke bi den ŋubindi a ŋuba, ki gbaandi ki pugi tanpoli po ŋmaabila ki cabni li ñincabli yeni mi daama kuli i buli po yeni. ¹⁴ Jeremi den ñani Tofeti, O Diedo ń den sɔni o naankani, ke wan pua sawali yeni. O den sedi U Tienu gbandieli luolu nni, ki yedi ku niwulgu kuli, ¹⁵ "O Diedo, U Paaciamu kuli daano, Ki pia gbenma, Israyeli Tienu yedi ya maama ne: 'Diidi, n ba cedi min den bobni ya yebiadma yeni ya fala ń baa ya diema ne yeni ya dociami ne yeni i kaalindma kuli po, kelima bi wagni bi pala, kaa cengi n ñɔmaama.'"