¹ Immeri bijua, Pacihuri, yua n den tie salga yidka, ki go tie U tienu gbandieli gɔndka den gbadi ke Jeremi pua sawali O Diedo nintuali. ² Lanwani ii, pacihuri den pua o sawalpualo Jeremi, ki cuo o, ki luoni li kpaardieli nni, yaali n den kuu yeni Benjamina polu po bulñɔbu, U Tienu gbandieli nni. ³ Ama, lan fandi, Pacihuri den luodi Jeremi li kpaadidieli nni, ke Jeremi yedi o: "O Diedo ki puni a Pacihuri ka, ama, a yeli baa tie Magori Misabibi. ⁴ Kelima O Diedo yedi, 'Diidi, n ba cedi fala jawaanciandi ń jiidi apo, fini yeni a dɔnlinba kuli; yibalinba jugsiemu n ba kpa ba, a nunbu ba lan lanya bonli. N go ba taa Juda diema kuli ki tieni Babiloni bado nui nni, wan gedi yeni ba ti yonbidi Babilona dogu nni. Bi ba kpa ba lanpo i yeni ki jugsiega. ⁵ N ba taa Juda piama yeni o ŋalmani kuli, o tuana ñuadi kuli, yeni wan pia ya bonkubkaamɔnli kuli; n ba taa Juda baditieba ŋalmani kuli, ki tieni bi yibalinba nui nni. Bi ba wodi bi piama kuli man tua tiafagikaadi, ki ñani ba, ki gedi yeni ba ti yonbidi babiloni dogu nni. ⁶ Ama, fini pacihuri yeni yaaba n ye a diegu nni kuli, bi ba gedi yeni yi ti yonbidi. A ba gedi ti yonbidi, Babilona dogu nni, a baan kpe lanpo i. Bi ba piini yi lanpo i, fini yeni a dɔnlinba, ŋan den pua yaaba mi tofaama yeni. ⁷ O Diedo, A paagi n pali , ke n mo ŋa ke a paagi n pali. A paalu cie nni, ke a diedi nni. N ji tua daali kuli li ñuali yeni ti laadi bonli; yuakuli ji laa nni i. ⁸ Min ba maadi ya yognu kuli, li buali ke min duoni n nialu, ki maadi ti jadi yeni mi biadma ya po i. Ke O Diedo maama ji tua npo nani i fee yeni ti laadi bonli, daali kuli. ⁹ N ya yedi, 'N ji kan tiadi o O Diedo po' N ji ka maadi maama o yeli po.' Li ba tieni nni nani u mupienu yeni i, n pali nni, ki ban kua n ciaga nni yeni n kpaba nni kuli. N yi bigni ke min cuo nbá, ki gbali i. ¹⁰ Kelima n cengi bi niba boncianla yaaba n ye yeni nni, yanjagibiadi. 'Jalgi o mani, tin tuni o i tagli!' Yaaba n kpali ke bi mani yeni nni, ŋua ki kpaagi nni, ki lingi min ba kua mi tudma nni ya yognu i, ban libi nni, ki cuo nni, ki tuu li panli. ¹¹ Ama, O Diedo ye yeni nni nani ya jakɔndo n pia u paaciamu yeni, lani n cedi ke yaaba n ŋua nni yeni i janbi, ba gbali nni, bi kan fidi ki tieni nni libakuli. . Bi ba di i fee, kelima, ban bi kan nandi ban lingi yaali. Bi ba di ya fee n ki pia gbenma, ban kan sundi ya fee po hali bada. ¹² Ama fini, O Diedo, u paaciamu kuli daano, fini yua n bigni, ki bandi yua n tiegi, ki bani yaali n ye o maalma nni yeni o pali nni. Cedi min bandi ŋan ba tuu ba li anli maama, kelima, n taa n maama kuli, ki mubni a nuu nni. ¹³ Yiini mani i yani, ki dondi O Diedo! Kelima, o faabi talga bi tugtondanba nui nni. ¹⁴ Sola ban mali nni ya daali. U Tienu ń da puni o ŋalbalgo, n naá ń mali nni ya daali. ¹⁵ Sola ya nilo n gedi ki waani n báa li laabaalo, Yua n yedi o 'Bi mali apo bonjaga', ki mangi o pali boncianla. ¹⁶ Li nilo ń tua nani O Diedo ń bolini ya dogi, kaa pia niñingbadma bipo yeni. Wan ya gbia mi cacagma yigni ku siŋaagu, ki gbia bu tɔbu yigni u yensiinu. ¹⁷ Kelima, waa den kpa nni o tugu nni, ki cedi ke n naá tua n kakuli, ya tugu n bi baa kubi ti tugpunbidi, ki nan kan mali hali bada. ¹⁸ be n cedi ke n ñani n naá tugu nni, ki laadi mi cacagma yeni fala aa ki ba juodi n dana yeni i fee ee?"