¹ O Diedo ń maadi ya maama Jeremi, ya yognu ke o bado Sedesiasi den sɔni Malikeja bijua Pacihuri, yeni Maaseja, salga yidka bijua, Sofoni, Jeremi kani, bi den yedi o, ² "Tieni mi lingima, ki buali i cegli O Diedo kani tipo, kelima, Babilona bado, Nabukanesari bua pua bu tɔbu yeni ti. Li ki kua O Diedo ba tieni o yaalidigu tuona ti po, nani wan den tiendi maama ti yaajanba yogu yeni, ki cedi wan lebdi ki ŋa ti yeni laafia." ³ Lanwani ii, Jeremi den yedi ba, " Min ba yedi o bado Sedesiasi ya maama n ne, ⁴ 'O Diedo, Israyeli Tienu yedi mine: Diidi N ba ŋmagdi yin kubi ya tɔtiadi, ki kɔni yeni Babilona bado yeni Kalide diema yaaba, yaaba n kuu yeni i dogi bilinguona yeni, li tɔtiadi ń guani ki biani yi! Kelima, N ba taani bikuli u dociamu ne sinsiiga nni i. ⁵ Mini O Diedo mɔno ba duoni n paaciamu nuu, ki taani ba, tin kɔni yeni li pabiencianli, yeni ti jadi ki paadi yi. ⁶ Kelima, N ba tuogi yeni mi biadma u dogu ne niba yeni ti yandi kuli. Yianbiigu yu n bia boncianla n ba kpa ba. ⁷ O Diedo ń yedi ya ñɔbonli n ne, u yianbiigu, mi koma yeni bu tɔbu ya kpaa yaaba, ke yaaba n sieni u dogu nni, Lani ya pendi, Juda bado Sedesiasi, o potuada yeni o jatuada, o dogtieba yeni yaaba n sieni u dogu nni kuli, N ba taa bikuli ki tieni Babilona bado Nabukanesari yeni bi yibala ya nui nni i, yeni yaaba n lingi ke ban gbindi bi miana ya nui nni. Bi ba kpa ba yeni ki jugsiega. bi kan jie bi niñima.' ⁸ ŋan yedi ya nibuolu ne, 'O Diedo yedi ya maama ne: Diidi, N bili i nintuali, li miali sanu yeni mi kuuma sanu. ⁹ Ya nilo n ye ya dogu ne nni kuli, ki juggsiega, bii mi koma, lanyaaka u yianbiigu n ba kpa o. Ama yua n ba sani ki ña, ki gedi Kalidi yaaba po, yaaba n diedi yi yeni, ba fie o miali. ¹⁰ Kalima, N cini n nunga ya dogu ne po, ki bua mi pua ba yeni fala, yeni mi yebiadma i, mii bua ba yaali n ŋani po ka; O Diedo ñɔbonli n yeni. N tieni li dogu Babilona bado nui nni, o ba juu li dogu.' ¹¹ ŋan go waani Juda bado diegu nni yaaba mo: Cengi mani O Diedo maama! ¹² Dafiidi diegu nni yaaba! O Diedo ñɔbonli n ne: Lan cili ku siŋaaagu nni, Yin jia ti buudi yeni ti mɔnkundi. Yin faabi o niñinnilo, bi tugtondanba nui nni, ke n pabienli ń da ti jiidi nani u mu yeni, ki cuo ya mupienu ke bi kan fidi ki jundi, kelima i tuadbiadi po. ¹³ Diidi mani, yinba ya dogtieba n kua ku jualɔngu nni, Fini u tialu nni tangu; O Diedo ń yedi yaali n yeni. Yinba yaaba n tua, "ŋma ba jiidi ki tuogi, ki kɔni yeni ti? ŋma ba kua ti diedi nni?" ¹⁴ N ba ŋmali i tuba ki dugni i tuada po; N ba juu i fuasieli, lan di ki buodi yeni li kuni kuli.'"