¹ O Diedo n yedi ya maama n ne, "Jiidi ki gedi Juda bado diegu nni, ki kpaandi ki yedi ba ya maama ne. ² Yedi ba, 'Juda bado, Cengi O Diedo maama, Fini yua n kaa Dafiidi badikpagli po, fini yeni a jatuada, yeni a potuada, yeni a dogtieba kuli, yaaba n kua a bulñɔna kuli! ³ O Diedo ñɔbonli n ne, ŋan ya ŋua ti mɔnkundi yeni mi teginma; ki faabi o niñinnilo, bi tugtondanba nui nni. Da cagni o caano, ki kpiebiga yeni li pakuali; da fiindi mani ti jadi, ki wulgi yaaba n ki pia tagliba kuli sɔma mi diema nni. ⁴ Kelima, i ya tiendi yeni, ya baditieba n kaa Dafiidi badikpagli po, ba tɔgni i bulñɔna, ki jagi i taami yeni ti tanturdi, ki kua i dogu nni, bani yeni bi jakɔnda, yeni bi dogtieba. ⁵ O Diedo ñɔbonli n ne, Ama i yaa cengi ya maama ne, min waani yi ya maama yeni, lanwani ii, badidiegu ba kpandi ki tua diegbengu.'" ⁶ Kelima O Diedo yedi ya maama ne, Juda badidiogu po, 'A tie npo nani Galaadi yeni, nani Liban juacianli po yeni. Ama, n ba cedi ŋan tua fanpienma. ya dogi nni ke nilo ki kua. ⁷ Kelima, n bobni apo yaaba n ba mudi a dogu, ke ban fii ki tuogi a yeni bu tɔbu! yuakuli yeni o jatiadi, bi ba cua a sedri tiidi, ki lu li daasala u mu nni tin juu ki buodi. ⁸ Lani ya pendi, i nibuoli boncianla ba pendi li dogu nni, yuakuli ba buali o lielo, "Be cedi ke O Diedo tieni ya dociamu ne maama ne?" ⁹ Lanwani ii, o lielo ba jiini o, "Kelima bi tudi u sanu, ki ŋa O Diedo, bi Tienu ń den loli ya ŋantaado yeni ba, ki gbaandi ki pugi i buli." ¹⁰ Yin da buudi yua n kpe po, ki go da fabni opo mo. Ama yin ya buudi ban cuo yua, ki ñani ki caa yeni o, ti yonbidi, kelima, o ji kan guani, o kan ji la ban mali o ya dogu nni.' ¹¹ Kelima O Diedo ń yedi Juda bado, Josiasi bujua Salɔmi, yua n den kali o baá Josiasi badigbandi po, ke bi den cuo o ki ñani o, ki gedi yeni o ti yonbidi yeni, o ji kan guani ki kpeni o dogu nni. ¹² O ba kpe ban gedi yeni o ti yonbidi naani yeni i, o ji kan guani ki la o diema.' ¹³ Sola yua n maa o diegu yeni i janbi, ki maa o dietuadigu yeni ŋalaci. Yua cedi ke o lieba tuuni opo, fanfanma, ke o naa pa ba bi tuonli pani. ¹⁴ Yua n yedi, 'N ba maa dieciangu, ki tieni a diena ń ya tiani, ki luodi a takobona yeni Sedri daadi, ki bɔlni li diegu yeni ya bɔligu n mɔni.' ¹⁵ ŋan pia sedri daadi buama boncianla yeni,n ba cedi ŋan ya tie badmɔno oo? A báa den ki di ki go ñu uu? Ama, o den ŋua ti mɔnkundi yeni, mi teginma, O nan den ye mi yemanma nni i. ¹⁶ O den jiagi talga yeni o niñinnilo buudi yeni mi teginma. Libakuli nan den ki pɔdi o. Lanka wangi ke a bani nni ii? O Diedo ñɔmaama n yeni. ¹⁷ Ama, libakuli ki ye a nuni nni, yeni a pali nni, kase i janbi ligbuacianli, yeni ŋan wuli yaaba n ki pia tagliba kuli ya sɔma, yeni ŋan fiini bi niba po ti jadi yeni ku tugtongu. ¹⁸ Lanya po i, ke O Diedo yedi Juda bado, Josiasi bijua Jojakimi: Bi kan ya buudi ki fabini opo, ki tua 'Hain n ninjua, Hain, n ninsalo!' Bi kan ya buudi ki fabni opo ki ya tua, 'Hain ti bado, Hain ti yonbidaano! ¹⁹ Bi ba piini o nani ŋunbo yeni i, Bi ba ñani o, ki fagdi yeni Jerusalema bulñɔna, ki ban lu o. ²⁰ Do Liban juaciama po, ki yigni. Duoni a nialu Basani juali po. Sedi Abirami juana po, ki yigni, kelima a dɔnlinba yaaba n den bua ŋa kuli bodi o. ²¹ N den maadi yeni a ŋan den ye mi yanduanma nni ya yognu, ama, a den yedi, 'N kan cengi.' Li den tie opo bonmaankaali, hali a panma nni, a naa den cengi n maama. ²² U faalu ba figi ki taa a gobdikaaba kuli, yaaba n mani yeni a mo ń gedi ti yonbidi. Lanwani ii, laa pia tama ke a baa di i fee, ki kua ti yanyagdi nni, kelima a biadma po. ²³ Fini yua kua Liban juali po, fini yua maa, ki kua Sedri tiidi fuali nni, a ba buudi ki fabni, falaciamo n ba baa apo ya yognu. Li fala baa tie nani ya pua n gbaa ki bua mali yeni i." ²⁴ N pia li miali, Mini O Diedo n yedi yeni.Bá fini Jojakimi bijua, Jokonia, Juda bado ya bi tie nibiñinli, n nujienu, n bi ba pidi ki lu ŋa. ²⁵ Kelima n ba mubni a yaaba n lingi ke ban gbindi a miali yeni ŋan den jie yaaba ya nui nni. Li ba fidi ki ya tie Babilona bado, Nabukanesari yeni Kalide yaaba ya nui nni ²⁶ N ba taa fini yeni a naá yua n mali a kuli, ki ban lu yi dogtianu nni, ban den ki mali yi ya dogu nni, lanpo i ke i ba kpe. ²⁷ Bi baa niani ke ban guani ki kuni bi dogu nni, ama, bi kan fidi ki lebdi bi denpo. ²⁸ Jekonia yeni ji tie ya bobikpiigu ke bi nundi yo oo? Li Jokonia ji tie ya bobmudingu n ji ki pia buama yo oo? Be n cedi ke bi luni wani yeni o puolŋuani kuli, ya dogu nni ke baa bani ii? ²⁹ Tinga, Tinga, Tinga! Cengi O Diedo maama! ³⁰ O Diedo yedi mine, 'Diani Jekonia yeli nani ya nilo n ki pia siema yeni. Nani yua n ki pia baaliba kuli saala: kelima o puolŋuani nni kuli, yua n ba baa juodŋanma ki ye, Obakuli kan ti fidi ki kali Dafiidi badgbandi po.'"